បាត់ដំបង ៖ ស្នងការដ្ឋាននគរបាលខេត្តបាត់ដំបង នៅថ្ងៃទី២៦មិថុនា បានឲ្យដឹងថា មេខ្លោងម្នាក់ ក្នុងករណីកាប់បំផ្កាញព្រៃឈើអភិរក្សសហគមន៍ឃុំតាគ្រាមស្រុកបាណន់ត្រូវបាននាំខ្លួនតាមអំណាចដីកាតុលាការខេត្តបាត់ដំបង។
កាលពីថ្ងៃទី ២៥ ខែ មិថុនា ឆ្នាំ ២០១៩ ដោយអនុវត្តតាមបទបញ្ជារបស់លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងអនុវត្តតាមអំណាចដីកាបង្គាប់ឲ្យនាំខ្លួនលេខ ២៨៧ត.ព្រ/១៩ ចុះថ្ងៃពុធ ២រោច ខែ ជេស្ន ឆ្នាំកុរឯកស័កព.ស២៥៦២ ត្រូវនឹងថ្ងៃទី ១៩ ខែ មិថុនា ឆ្នាំ ២០១៩ របស់ចៅក្រមស៊ើបសួរសាលាដំបូងខេត្តបាត់ដំបងលោក រ៉ែម សុភក្តិ លោក វរសេនីយ៍ឯក ប៉ាន់ វណ្ណនី អធិការនគរបាលស្រុកបាណន់ ដឹកនាំកម្លាំងនគរបាលក្នុងអង្គភាពធ្វើការនាំខ្លួនឈ្មោះ អ៊ឹម បូរី ហៅ ពៀច ភេទប្រុស រស់នៅភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបងពីបទ( ប្រមូលផល អនុផលព្រៃឈើដោយគ្មានលិខិតអនុញ្ញាត)ប្រព្រឹត្តិនៅចំណុច ភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង ដែលជាតំបន់ព្រៃអភិរក្សសហគមន៍ឃុំតាគ្រាម នាពេលកន្លងទៅ មកកាន់សាលាដំបូងខេត្តបាត់ដំបង ចាត់ការតាមផ្លូវច្បាប់ ។
សូមជម្រាបជូនថា ក្នុងរយៈពេលចុងក្រោយនេះនៅចំណុចព្រៃអភិរក្សសហគមន៍ឃុំតាគ្រាម ស្រុកបាណន់ មានក្រុមប្រជាពលរដ្ឋមួយចំនួនបានលបលួចចូលទៅកាប់បំផ្លាញព្រៃឈើនៅទីនោះយ៉ាងអាណាធិបតេយ្យជាពិសេសក្នុងពេលយប់ហើយបានបង្កឲ្យមានការព្រួយបារម្មណ៍ពីសំណាក់ប្រជាពលរដ្ឋដែលរស់នៅទីនោះ។
តាមរយៈបទបញ្ជាដ៏តឹងរឹងរបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបងក៏ដូចជាថ្នាក់ដឹកនាំគ្រប់ថ្នាក់ នគរបាលស្រុកបាណន់បានធ្វើការស្រាវជ្រាវនិងបង្ក្រាបបានក្រុមអ្នកលួចកាប់បំផ្លាញព្រៃឈើនេះជាបន្តបន្ទាប់ ព្រមទាំងដកហូតបានសម្ភារៈ ភស្តុតាងមួយចំនួនរួចបានបញ្ជូនខ្លួនទៅកាន់សាលាដំបូងខេត្តបាត់ដំបង រហូតដល់ថ្ងៃទី ២៥ ខែ មិថុនា ឆ្នាំ ២០១៩នេះកងកម្លាំងនគរបាលបានធ្វើការនាំខ្លួនជនស័ង្សយជាមេខ្លោងរូបនេះមកកាន់សាលាដំបូងខេត្តបាត់ដំបង ហើយត្រូវបានចៅក្រមស៊ើបសួរសម្រេចចេញដីកាបង្គាប់ឲ្យឃុំខ្លួននៅក្នុងពន្ឋនាគារខេត្តបាត់ដំបងរង់ចាំការស្រាវជ្រាវរួចហើយ ។ ប្រជាពលរដ្ឋដែលរស់នៅក្នុងឃុំតាគ្រាម ពិសេសប្រជាពលរដ្ឋក្នុងសហគមន៍ព្រៃអភិរក្សឃុំតាគ្រាម ស្រុកបាណន់ បានសាទរចំពោះចំណាត់ការរបស់សមត្ថកិច្ចគ្រប់ ថ្នាក់ចំពោះក្រុមជនបំផ្លិចបំផ្លាញព្រៃឈើទាំងនេះ ៕ ដោយ៖កូឡាប