ប្រទេសអង់គ្លេស នៅថ្ងៃអង្ការម្សិលមិញនេះបានជំរុញឲ្យទីក្រុងហុងកុងឲ្យធ្វើការស៊ើបអង្កេតឯករាជ្យមួយជុំវិញបញ្ហាប៉ះទង្គិចគ្នារវាងក្រុមប៉ូលិស និងក្រុមអ្នកតវ៉ា ហើយអង់គ្លេសក៏បានផ្អាកអាជ្ញាប័ណ្ឌនៃការនាំចូលឧបករណ៍សម្រាប់គ្រប់គ្រងបាតុកម្មផងដែរ មានដូចជាគ្រាប់កាំភ្លើងជ័រ និងឧស្ម័នបង្ហូរទឹកភ្នែកជាដើម។
ការផ្អាកនេះ ទំនងជាអង់គ្លេសមានការព្រួយបារម្ភថា អាជ្ញាធរហុងកុងនឹងប្រើប្រាស់ឧបរកណ៍ទាំងនោះ យកទៅបង្ក្រាបក្រុមអ្នកតវ៉ា។
រដ្ឋមន្ត្រីការបរទេសអង់គ្លេស លោក Jeremy Hunt បានថ្លែងប្រាប់សមាជិកសភាអង់គ្លេសថា “ពួកយើងនៅតែមានការព្រួយបារម្ភពីស្ថានភាពនៅទីក្រុងហុងកុង”។
លោកថ្លែងថា “ថ្ងៃនេះ ខ្ញុំបានជំរុញឲ្យរដ្ឋាភិបាលហុងកុងបង្កើតការស៊ើបអង្កេតឯករាជ្យមួយ ដើម្បីស៊ើបលើការប៉ះទង្គិចគ្នា ដែលពួកយើងបានឃើញ”។
អង់គ្លេសបានថ្លែថា ខ្លួននឹងមិនចេញអាជ្ញាប័ណ្ឌឲ្យមានការនាំចូលឧបករណ៍គ្រប់គ្រងបាតុកម្មទៅកាន់ទីក្រុងហុងកុងទៀតទេ រហូតទាល់តែអង់គ្លេសពេញចិត្តលើការដោះស្រាយបញ្ហាសិទ្ធិមនុស្ស និងសេរីភាព។
សូមបញ្ជាក់ថា អង់គ្លេសបានចេញអាជ្ញាប័ណ្ឌចុងក្រោយបំផុតនៅខែកក្កដា ឆ្នាំ ២០១៨ ដើម្បីឲ្យមានការនាំចូលឧស្ម័នបង្ហូរទឹកភ្នែក គ្រាប់បែកដៃ និងគ្រាប់កាំភ្លើងជ័រទៅកាន់ទីក្រុងហុងកុង ដើម្បីឲ្យប៉ូលិសហុងកុងធ្វើការហ្វឹកហាត់។
បច្ចុប្បន្នទីក្រុងហុងកុង កំពុងជួបបញ្ហាសន្និសុខយ៉ាងខ្លាំង ក្រោយពេលមនុស្សរាប់លាននាក់បានធ្វើការតវ៉ាអស់ជាច្រើនសប្តាហ៍ ដើម្បីតវ៉ាប្រឆាំងទៅនឹងច្បាប់ធ្វើបត្យាប័ណ ដែលច្បាប់នេះអនុញ្ញាតិឲ្យមានការបញ្ជូនជនសង្ស័យពីទីក្រុងហុងកុងទៅកាន់ប្រទេសចិនដើម្បីកាត់ទោស។ ក្រុមបាតុករតវ៉ាប្រឆាំងនឹងច្បាប់នោះ និងទាមទារឲ្យរដ្ឋាភិបាលបោះបង់វាចោល។
ទីក្រុងហុងកុងស្ថិតក្រោមអាណានិគមនរបស់អង់គ្លេសរយៈពេល ១៥៦ឆ្នាំ ពីឆ្នាំ ១៨៤១ ដល់ឆ្នាំ ១៩៩៧។ ក្នុងឆ្នាំ ១៩៩៧ ទីក្រុងហុងកុងត្រូវបានប្រគល់ត្រឡប់អោយចិនវិញ ក្រោមកិច្ចព្រមព្រៀង “ប្រទេសមួយ ប្រព័ន្ធ ពីរ”៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
