ខេត្តព្រះសីហនុ ៖ សមត្ថកិច្ចនគរបាលអន្តោប្រវេសន៍ នៃព្រះរាជាណាចក្រកម្ពុជា សហការជាមួយកម្លាំងនគរបាលជំនាញមកពីប្រទេសចិន បានចាប់បញ្ជូនជនជាតិចិនចំនួន៦៣នាក់ចេញពីខេត្តព្រះសីហនុ ឆ្ពោះទៅកាន់ប្រទេសចិនវិញ នៅវេលាថ្ងៃត្រង់ថ្ងៃទី២៦ ខែមិថុនា ឆ្នាំ ២០១៩នេះ តាមច្រកអាកាសយានដ្ឋានអន្តរជាតិខេត្តព្រះសីហនុ។
អនុប្រធានស្នាក់ការត្រៀមបណ្តេញចេញប្រចាំខេត្តព្រះសីហនុ នៃអគ្គនាយកដ្ឋានអន្តោប្រវេសន៍ លោកឧត្តមសេនីយ៍ឯក ឆាយ ប៊ុណ្ណា បានឲ្យដឹងថា ជនជាតិចិនទាំង៦៣នាក់នេះ មានប្រុស៥០នាក់ ស្រី១៣នាក់។ លោកបន្តថា ការបញ្ជូនជនជាតិចិនទាំង៦៣នាក់ ចេញពីកម្ពុជាពេលនេះ គឺដោយសារសមត្ថកិច្ចរកឃើញពួកគេទាំងនោះ មានពិរុទ្ធពាក់ពន្ធ័នឹងបទល្មើសឆបោកពីជនរងគ្រោះតាមប្រពន្ធ័ទូរគមនាគមន៍។
លោកឧត្តមសេនីយ៍ឯក ឆាយ ប៊ុណ្ណា បន្តថា ក្រៅពីការបញ្ជូនចេញជនជាតិចិនចំនួន ៦៣នាក់នៅថ្ងៃនេះ ដោយឡែកកាលពីថ្ងៃទី២៥ ខែមិថុនា កម្លាំងនគរបាលអន្តោប្រវេសន៍កម្ពុជា ក៏បានបញ្ជូនជនជាតិចិន ដែលមានពិរុទ្ធភាពដូចគ្នានេះ ចំនួន៥នាក់ ប្រុស៥នាក់ ស្ត្រីម្នាក់ ទៅកាន់ប្រទេសចិនវិញផងដែរ។ សរុបរយៈពេល២ថ្ងៃនេះ មានជនជាតិចិនចំនួន៦៨នាក់ ត្រូវបានសមត្ថកិច្ចកម្ពុជា បានបណ្តេញចេញពីកម្ពុជាស្ត្រតាមច្បាប់ នៃព្រះរាជាណាចក្រកម្ពុជា តាមច្រកអាកាសយានដ្ឋានអន្តរជាតិខេត្តព្រះសីហនុ៕ ដែន សីមា
