មន្ត្រីជាន់ខ្ពស់ក្រសួងបរិស្ថាន បានជំរុញឲ្យមានការសហការគ្នាការពារធនធានធម្មជាតិក្នុងតំបន់ដែនជម្រកសត្វព្រៃ.ព្រៃឡង់ឲ្យបានគង់វង្សយូរអង្វែង ខណៈក្រសួងបរិស្ថានបានប្រកាសទទួលស្គាល់សហគមន៍តំបន់ការពារធម្មជាតិ ចំនួន៥ នៅក្នុងដែនជម្រកសត្វព្រៃ.ព្រៃឡង់។
ប្រសិនបើយើងមិនខិតខំប្រឹងប្រែងចូលរួមទាំងអស់គ្នា ថែរក្សាធនធានធម្មជាតិនោះទេ នោះធនធានធម្មជាតិ នឹងកាន់តែហិនហោចទៅៗ។ ក្រសួងបរិស្ថាន ធ្វើការការពារ និងអភិរក្សធនធានធម្មជាតិនៅកម្ពុជា ចាំបាច់មានការចូលរួមពីអ្នកពាក់ព័ន្ធ ដៃគូ អាជ្ញាធរ និងប្រជាពលរដ្ឋ។ នេះជាការលើកឡើងរបស់លោក រ័ត្ន វិរៈ អនុរដ្ឋលេខាធិការក្រសួងបរិស្ថាន នៅក្នុងពិធីប្រកាសទទួលស្គាល់សហគមន៍តំបន់ការពារធម្មជាតិចំនួន៥ នៅក្នុងតំបន់ដែនជម្រកសត្វព្រៃ.ព្រៃឡង់ ស្ថិតនៅក្នុងភូមិសាស្ត្រ ស្រុកថាឡាបរិវ៉ាត់ ខេត្តស្ទឹងត្រែង កាលពីពុធ ៩រោច ឆ្នាកុរ ឯកស័ក ព.ស ២៥៦៣ ត្រូវនឹងថ្ងៃទី២៦ មិថុនាឆ្នាំ២០១៩។ លោក រ័ត្ន វិរៈ បានបន្ថែមថា ដើម្បីឲ្យធនធានធម្មជាតិស្ថិតស្ថេរគង់វង្សបានយូរអង្វែងនោះ ប្រជាពលរដ្ឋតាមមូលដ្ឋានក្នុងសហគមន៍ ត្រូវសហការគ្នាយ៉ាងជិតស្និតជាមួយអាជ្ញាធរពាក់ព័ន្ធដើម្បីការពារធនធានធម្មជាតិដែលយើងមានសព្វថ្ងៃនេះ។ ឯកឧត្តម អនុរដ្ឋលេខាធិការក្រសួងបរិស្ថាន បានលើកឡើងថាៈសហគមន៍មានតួនាទីសំខាន់ ក្នុងការចូលរួមដោយផ្ទាល់ក្នុងការការពារ និង អភិរក្សធនធានធម្មជាតិប្រកបដោយនិរន្តរភាព ហើយការប្រកាសទទួលស្គាល់សហគមន៍ក្នុងតំបន់ការពារធម្មជាតិដែនជម្រកសត្វព្រៃ.ព្រៃឡង់នេះ គឺជាការផ្តល់ភាពស្របច្បាប់ជូនសហគមន៍ទាំង៥ ឲ្យមានសិទ្ធិចូលរួមការពារដោយស្របច្បាប់ និងពេញលេញជាមួយមន្ទីរបរិស្ថានខេត្ត និងជាមួយអាជ្ញាធរដែនដី នៅក្នុងភូមិសាស្ត្រព្រៃឡង់។
ក្នុងឱកាសនោះ លោក កង រ៉ែន តំណាងសហគមន៍ តំបន់ការពារធម្មជាតិព្រៃឡង់ បានថ្លៃងអំណរគុណចំពោះក្រសួងបរិស្ថាន ដែលបានទទួលស្គាល់សហគមន៍ទាំង៥ ថែមទាំងបានប្តេជ្ញាខិតខំប្រឹងប្រែងឲ្យអស់ពីកម្លាំងកាយចិត្ត រួមសហការគ្នារវាងសហគមន៍ ជាមួយនិងអាជ្ញាធរពាក់ព័ន្ធ ក៏ដូចជាមន្ត្រីឧទ្យានុរក្ស ដើម្បីការពារ ទប់ស្កាត់មិនឲ្យមានបទល្មើសនានាដើម្បីធ្វើយ៉ាងណាឲ្យតំបន់ការពារធម្មជាតិ នៅគង់វង្សស្ថិតស្ថេរយូរអង្វែង ។
សូមបញ្ជាក់ថា ក្រសួងបរិស្ថានបានប្រកាសទទួលស្គាល់សហគមន៍តំបន់ការពារធម្មជាតិ ចំនួន៥ នៅក្នុងដែនជម្រកសត្វព្រៃ.ព្រៃឡង់ រួមមាន ទី១.សហគមន៍តំបន់ការពារធម្មជាតិគីរីសុខសាន្ត ទី២.សហគមន៍តំបន់ការពារធម្មជាតិទាល់ ទី៣.សហគមន៍តំបន់ការពារធម្មជាតិផ្អាវ ទី៤.សហគមន៍តំបន់ការពារធម្មជាតិអន្លង់ភេ និងទី៥.សហគមន៍តំបន់ការពារធម្មជាតិ អូរអន្លង់ជ្រៃ នៅក្នុងភូមិសាស្ត្រឃុំអន្លង់ភេ និងឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ។
បន្ទាប់ពីពិធីប្រកាសទទួលស្គាល់សហគមន៍ទាំង៥ខាងលើ លោក រ័ត្ន វិរៈ បានចែកមុងជ្រលក់ថ្នាំការពារជំងឺគ្រុនចាញ់ចំនួន៥០០មុង ដល់សហគមន៍តំបន់ការពារធម្មជាតិទាំង៥ និងបានចូលរួមដាំដើមឈើប្រណិត ជាមួយតំណាងអាជ្ញាធរខេត្ត មន្ត្រីរាជការមន្ទីរបរិស្ថានខេត្ត មន្ត្រីឧទ្យានុរក្ស ក្រុមការងារ USAID-Greening Preylang តំណាងអាជ្ញាធរមូលដ្ឋាន រួមជាមួយប្រជាពលរដ្ឋ ផងដែរ៕ ដោយ ៖ កូឡាប
