ក្រុមអ្នកតវ៉ានៅទីក្រុងហុងកុង បានអំពាវណាវឲ្យមានការគាំទ្រពីអន្តរជាតិ ចំពោះការតស៊ូរបស់ពួកគេ ដើម្បីបានសិទ្ធិសេរីភាពនយោបាយ ដោយពួកគេបានស្នើដល់មេដឹកនាំពិភពលោកឲ្យមានវិធានការ មុនពេលកិច្ចប្រជុំកំពូល G20 ចាប់ផ្តើមនៅទីក្រុង Osaka ប្រទេសជប៉ុនសប្តាហ៍នេះ។
អ្នកតវ៉ារាប់រយនាក់ បានធ្វើការហែរក្បូននៅក្នុងទីក្រុង និងបានធ្វើដំណើរទៅកានកុងស៊ុលរបស់ប្រទេស G20 រួមមានអាមេរិច អង់គ្លេស និងជប៉ុនជាដើម ដោយពួកគេបានធ្វើការដាក់លិខិត ដោយជំរុញឲ្យមេដឹកនាំនៃប្រទេសទាំងនោះគាំទ្រដល់កិច្ចប្រឹងប្រែងរបស់ពួកគេក្នុងការប្រឆាំងទៅនឹងសេចក្តីព្រាងច្បាប់ធ្វើបត្យាប័នដ៏ចម្រូងចម្រាស់។
សូមបញ្ជាក់ថា អ្នកតវ៉ារាប់លាននាក់បានបន្តធ្វើការតវ៉ាអស់ជាច្រើនសប្តាហ៍មកហើយដើម្បីប្រឆាំងទៅនឹងសេចក្តីព្រាងច្បាប់ធ្វើបត្យាប័ន ដែលច្បាប់នេះអនុញ្ញាតិឲ្យមានការបញ្ជូនជនសង្ស័យពីទីក្រុងហុងកុងទៅកាត់ទោសនៅប្រទេសចិនបាន។
ក្រោយពេលមានការតវ៉ាដ៏ខ្លាំងខ្លា និងស្រុះគ្នាមិនធ្លាប់មានពីមុនមក មេដឹកនាំហុងកុងអ្នកស្រី Carrie Lam បានប្រកាសកាលពីជាងមួយសប្តាហ៍មុនថា រដ្ឋាភិបាលសម្រេចពន្យាច្បាប់នោះ ខណៈដែលក្រុមអ្នកតវ៉ាទាមទារឲ្យរដ្ឋាភិបាលបោះបង់ច្បាប់នោះចោល និងឲ្យអ្នកស្រីចុះចេញពីដំណែង។
គេនៅមិនទាន់ដឹងច្បាស់ទេថា តើបញ្ហារបស់ហុងកុងនឹងត្រូវគេយកទៅពិភាក្សានៅកិច្ចប្រជុំកំពូល G20 ដែលគ្រោងធ្វើនៅថ្ងៃសុក្រ និងសៅរិ៍នេះ ឬយ៉ាងណាទេ។
កាលពីសប្តាហ៍មុន រដ្ឋមន្ត្រីការបរទេសអាមេរិច Mike Pompeo បានថ្លែងថា គាត់រំពឹងថា ប្រធានាធិបតីអាមេរិច ដូណាល់ ត្រាំនឹងធ្វើការលើកបញ្ហានោះតវ៉ាជាមួយនឹងប្រធានាធិបតីចិន ស៊ី ជិនពីង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN