ភ្នំពេញ៖ គណនីហ្វេសប៊ុក Chan Dy កាលពីពេលថ្មីៗនេះ បានសរសេររៀបរាប់ថា នេះហើយជាមន្ត្រីគ្រាប់ល្ពៅ ចុះរុះរើផ្ទះរបស់ខ្ញុំ នៅភូមិចំការឬស្សី តាមតែចិត្តគ្មានច្បាប់ទម្លាប់ ធ្វើកិរិយាដូចចោរ។ ទង្វើនេះមន្ត្រីល្អៗ គេមិនដែលធ្វើទាល់តែសោះ។
គណនេយ្យហ្វេសប៊ុកដដែល បានបន្ថែមថា ក្នុងនាមខ្ញុំជាប្រជាពលរដ្ឋសុំសួរទៅថ្នាក់ដឹកនាំគ្រប់ជាន់ថ្នាក់ថា តើទង្វើបែបនេះ ជាមន្ត្រីបម្រើប្រជាពលរដ្ឋ ឬក៏ជាមន្ត្រីសុីប្រាក់ខែរាស្ត្រ ហើយប្លន់ដីប្រជាពលរដ្ឋកណ្ដាលក្រុងបាត់ដំបង?
ពាក់ព័ន្ធករណីខាងលើនេះ ស្នងការនៃស្នងការដ្ឋាននគរបាលខេត្តបាត់ដំបង បានសេចក្តីបំភ្លឺដោយសូមជ្រាបជូនដល់សាធារណជន ពិសេសអ្នកនិយមប្រេីប្រាស់បណ្តាញព័ត៌មានសង្គមជ្រាបថា កាលពីថ្ងៃទី ២៦ ខែ មិថុនា ឆ្នាំ២០១៩ រដ្ឋបាលក្រុងបាត់ដំបង បានចុះអនុវត្តលិខិតបង្គាប់ការលេខ០៣៩/១៩លបកចុះថ្ងៃសុក្រ៤រោច ខែ ជេស្នឆ្នាំកុរឯកស័កព.ស២៥៦៣ ត្រូវនឹងថ្ងៃទី ២១ ខែ មិថុនាឆ្នាំ២០១៩ របស់រដ្ឋបាលខេត្តបាត់ដំបង ចុះរុះរើសំណង់មិនរៀបរយទៅតាមទំហំខ្នាតដីឡូត៍គម្រោងក្នុងប្លុកធំ០៥នៃគម្រោងសម្បទានដីសង្គមកិច្ច អតីតសួនច្បារព្រែកព្រះស្តេច ក្នុងទីតាំងភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។
ក្នុងភារកិច្ចនេះមានកងកម្លាំងនគរបាល នៃអធិការដ្ឋាននគរបាលក្រុងបាត់ដំបង ចូលរួមសហការជាមួយដែរ។ ជាការកត់សម្គាល់ឃេីញមានម្ចាស់គណនីហ្វេសប៊ុកឈ្មោះ Chan Dy បានបង្ហោះរូបភាព និងវីដេអូលេីកឡើង ចោទប្រកាន់ចំពោះមន្ត្រីដែលមានភារកិច្ចអនុវត្តលិខិតបង្គាប់ការ របស់រដ្ឋបាលខេត្តបាត់ដំបង ក្នុងនោះបានចោទប្រកាន់ ចំពោះមន្ត្រីនគរបាលជាតិ ដែលមានវត្តមានក្នុងភារកិច្ចនេះថា ជាមន្ត្រីដែលស៊ីឈ្នួល រុះរើផ្ទះប្រជាពលរដ្ឋដោយបំពាន។ល។ ក្នុងនាមស្នងការនៃស្នងការដ្ឋាននគរបាលខេត្តបាត់ដំបង ធ្វេីការកត់សម្គាល់ឃេីញថា ការបង្ហោះរូបភាព និងបានសរសេរខ្លឹមសារចោទប្រកាន់ ចំពោះមន្ត្រីរាជការសាធារណ: ដោយចេតនា ហើយក្នុងនោះមានមន្ត្រីនគរបាលជាតតិផង ជាហេតុនាំបង្កឲ្យមានការភ័ន្តច្រឡំជាខ្លាំង ក្នុងមជ្ឈដ្ឋានមហាជនទូទៅ ជាពិសេសក្នុងចំណោម អ្នកប្រេីប្រាស់បណ្តាញព័ត៌មានសង្គម ដែលចាំបាច់ស្នងការដ្ឋាននគរបាលខេត្តបាត់ដំបង ត្រូវធ្វេីការបំភ្លឺបកស្រាយការពិត និងទាមទារភាពត្រឹមត្រូវ ក្នុងការអនុវត្តភារកិច្ចរបស់មន្ត្រីនគរបាលជាតិ។
នៅចំពោះមុខបញ្ហានេះ យើងខ្ញុំស្នេីឲ្យម្ចាស់គណនីហ្វេសប៊ុក ឈ្មោះChan Dy ធ្វេីការកែតម្រូវ ចំពោះខ្លឹមសារចោទប្រកាន់ខាលើ ដើម្បីចៀសវាងនូវការភ័ន្តច្រឡំ និងបង្កនូវផលវិបាកផ្សេងៗ ដែលកើតឡេីងដោយចេតនា របស់ម្ចាស់គណនីហ្វេសប៊ុកខាងលើ៕ ដោយ ៖ កូឡាប