ភ្នំពេញ ៖ លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកមួយរូបនៃឧត្ដមក្រុមប្រឹក្សាពិគ្រោះ និងផ្ដល់យោបល់ នៅព្រឹកថ្ងៃទី២៧ ខែមិថុនា ឆ្នាំ២០១៩ នេះ លោកកំពុងដឹកនាំកិច្ចប្រជុំ ឧត្ដមក្រុមប្រឹក្សាពិគ្រោះ និងផ្ដល់យោបល់ប្រចាំខែ នៅឯវិមានសន្តិភាព។
លោកពេជ្រ ស្រស់ បានបញ្ជាក់ថា “ក្នុងនាមខ្ញុំជាប្រធានប្តូរវេនប្រចាំខែ នៃឧត្តមក្រុមប្រឹក្សាពិគ្រោះ និងផ្តល់យោបល់នឹងស្នើទៅសម្តេចតេជោដើម្បីអញ្ជើញ ឯកឧត្តមប្រធានអង្គភាពប្រឆាំងអំពើពុករលួយមកជំនុំ គ្នានៅក្នុងក្របខណ្ឌឧត្តមក្រុមប្រឹក្សាពិគ្រោះ និងផ្តល់យោបល់ អំពីការបាក់អគារ ៧ ជាន់នៅក្នុងទឹកដីខេត្តព្រះសីហនុ”។
លោកបានបន្តថា “នៅព្រឹកនេះ ប្រមូលបញ្ហារបស់ពលរដ្ឋមកជំនុំនៅក្នុងឧត្តមក្រុមប្រឹក្សាពិគ្រោះនិងផ្តល់យោបល់ ដើម្បីជំរុញឲ្យមានការដោះស្រាយដោយប្រសិទ្ធភាពនិងតម្លាភាព”។
ក្នុងកិច្ចប្រជុំនេះ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ពីគណបក្សខ្មែរក្រោក បានលេីកឡើងអំពីការរកឃើញ ភស្តុតាងជា ឯកសារគតិយុត្តិ ដែលឆ្លុះបញ្ជាំងពី ភាពអសកម្មក្នុងការអនុវត្តន៍ច្បាប់ របស់ក្រសួងរៀបចំដែនដីនគរូបនីយកម្ម និងសំណង់ រួមជាមួយរដ្ឋបាលខេត្តព្រះសីហនុ ។
លោកវីល្លាម បានលើកឡើងថា ៖
១. យើងបានរកឃើញថា ក្រសួងដែនដីនគរូបនីយកម្ម និងសំណង់ មានភាពអសកម្ម មិនបានបំពេញការងារឲ្យស្រប តាមសេចក្ដីសម្រេចបង្កេីតក្រុមការងារចំពោះកិច្ច ចុះតាមដាន និងត្រួតពិនិត្យការដ្ឋានសំណង់ ស្ថិតនៅភូមិសាស្ត្រខេត្តព្រះសីហនុ លេខ ០០៧ សរ ចុះថ្ងៃទី០៤ ខែតុលា ឆ្នាំ២០១៨ ត្រង់ប្រការ២ កថាខ័ណ្ឌ១ ឲ្យមានប្រសិទ្ធភាព ដោយអនុលោមតាមអនុក្រឹត្យ ស្ដីលិខិតអនុញ្ញាតសាងសង់ លេខ ៨៦ អនក្រ បក ចុះថ្ងៃទី១៩ ខែធ្នូ ឆ្នាំ១៩៩៧ នោះទេ។
២. យើងបានរកឃើញថា រដ្ឋបាលខេត្តព្រះសីហនុ និងមន្ត្រីពាក់ព័ន្ធ មានភាពអសកម្ម ដោយបង្កប់នូវភាពមិនប្រក្រតី ជាហេតុនាំឲ្យមិនបានបំពេញការងារ ស្របតាមតាមលិខិតលេខ ២៤១៧ ដនស / អរប របស់ក្រសួងរៀបចំដែនដី ចុះថ្ងៃទី៣ ខែតុលា ឆ្នាំ២០១៨ , និងមិនអនុវត្តតាមអនុក្រឹត្យលេខ ៨៦ អនក្រ នក ចុះថ្ងៃទី១៩ ខែធ្នូ ឆ្នាំ១៩៩៧ ត្រង់មាត្រា ២៤ ។
សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក បានស្នេីសុំក្នុងកិច្ចប្រជុំ ដើម្បីឲ្យជនពាក់ព័ន្ធទាំងនោះម កទទួលខុសត្រូវ ចំពោះសោកនាដកម្មដ៏ធំ ដែលនាំឲ្យមានអ្នកស្លាប់ និងអ្នករបួសជាច្រេីននាក់ ៕ ដោយ៖កូឡាប
