តាកែវ ៖ ឯកឧត្តម យស់ ណាស៊ី ប្រធានក្រុមប្រឹក្សាខេត្តតាកែវថ្មី បានធ្វើការស្នើទៅដល់អាជ្ញាធរខេត្ត ធ្វើយ៉ាងណាទប់ស្កាត់ឲ្យបានជាដាច់ ចំពោះការលូចនាំចូលសត្វជ្រូកពីប្រទេសវៀតណាម ដោយសារជ្រូករបស់វៀណាម កំពុងផ្ទុះជម្ងឺប៉េសអាហ្វ្រិចលើសត្វជ្រូក ដែលនាំឲ្យមានការប៉ះពាល់ដល់សុខភាព និងអាយុជីវិតប្រជាពលរដ្ឋដែលទិញយកសាច់ជ្រូកនេះទៅទទួលទាន ជាពិសេសការឆ្លងរីករាលដាលពីសត្វនិងសត្វ។
ថ្លែងនៅក្នុងឱកាសអញ្ជើញចូលរួមបើកកិច្ចប្រជុំសាមញ្ញលើកទី០១ អាណត្តិទី៣ របស់ក្រុមប្រឹក្សាខេត្តតាកែវ ព្រឹកថ្ងៃទី ២៧ ខែមិថុនា ឆ្នាំ២០១៩នេះ ប្រធានក្រុមប្រិក្សាខេត្តតាកែវបានថ្លែងថា បញ្ហាការនាំជ្រូកសាច់ពីប្រទេសវៀណាម នៅតែមានលួចលាក់នាំចូលតាមច្រករបៀងមួយចំនួនខ្លះ ដែលជាប់ព្រំដែន ដូច្នេះក្នុងនាមអាជ្ញាធរខេត្ត ត្រូវតែចាត់វិធានការឲ្យបានតឹងរ៉ឹងបំផុត ដើម្បីកុំឲ្យមានការលូចនាំចូលសត្វជ្រូក ចូលមកលក់ក្នុងប្រទេសកម្ពុជាយើង ដោយធ្វើការឆ្លងកាត់ខេត្តតាកែវជាដាច់ខាត ។ ដោយកន្លងមកយើងបានដឹងហើយថា ជ្រូករបស់វៀតណាម គឺមានផ្ទុកជំងឺកាចសាហាវ ដែលធ្វើឲ្យប៉ះពាល់ដល់សុខភាព និងអាយុជីវិតអ្នកទទួលទាន ។
ប្រធានក្រុមប្រឹក្សាខេត្ត យស់ ណាស៊ី បានបន្តទៀតថា បញ្ហាទប់ស្កាត់ការនាំសត្វជ្រូករបស់វៀតណាម កុំអោយនាំចូលមកកាន់ខេត្តឬប្រទេសកម្ពុជារបស់យើងនេះ គឺមិនចង់ឲ្យកម្ពុជាយើងកើតមានជំងឺប៉េសជ្រូកអាហ្រិ្វកដែលនាំឲ្យមានការឆ្លងរីករាលដាលមកដល់ខេត្តរបស់យើង និងធ្វើអោយប៉ះពាល់សុខភាពដល់អ្នកបរិភោគ ព្រោះកន្លងមករាជរដ្ឋាភិបាលបានចេញសេចក្តីណែនាំ ហាមមិនឲ្យមានការនាំចូលជ្រូកពីប្រទេសវៀតណាម ដោយដឹងថា កន្លងមកថ្មីៗនេះ ជំងឺប៉េះជ្រូកដែលធ្លាប់តែកើតមាននៅក្នុងប្រទេសអាហ្វ្រិច ឥទ្បូវនេះវាបានផ្ទុះទ្បើងនៅក្នុងប្រទេសជិតខាង ជាប់ប្រទេសកម្ពុជាយើងហើយ ដូច្នេះដើម្បីការពារកុំឲ្យជំងឺនេះកើតមានក្នុងប្រទេសរបស់យើងបាន គឺអាជ្ញាធរគ្រប់ជាន់ថ្នាក់ត្រូវមានវិធានការទប់ស្កាត់ឲ្យបាន ពិសេសខេត្តដែលនៅជាប់ព្រំដែន ដូចជាខេត្តតាកែវយើងនេះឯង ។
ឆ្លើយតបទៅនិងការលើកឡើងរបស់ឯកឧត្តមប្រធានក្រុមប្រឹក្សាខេត្តថ្មី អភិបាលខេត្តតាកែវ ឯកឧត្តម អ៊ូច ភា បានមានប្រសាសន៍ថា ក្នុងនាមអាជ្ញាធរខេត្ត លោកនិងខិតខំចាត់វិធានការការពារ ចំពោះការលូចនាំចូលសត្វជ្រូកពីប្រទេសវៀតណាម មិនឲ្យកើតមាននៅក្នុងខេត្តរបស់យើងទៀតទ្បើយ ហើយកន្លងមកក្រសួងកសិកម្ម ក៏ដូចជាមន្ទីរកសិកម្មខេត្ត បានសហការជាអាជ្ញាធរខេត្ត ចុះធ្វើការអប់រំណែនាំ និងពន្យល់បង្ហាញពីផលប៉ះពាល់ ទៅដល់តាមបណ្តាក្រុង ស្រុក ដែលជាប់តាមបន្ទាត់ព្រំដែន ត្រូវចាត់វិធានការទប់ឲ្យបានជាដាច់ខាត ចំពោះការនាំចូលជ្រូកពីវៀតណាម ឬប្រភេទទំនិញផ្សេងៗ ដែលគ្មានគុណភាព ហួសកាលកំណត់ផងដែរ ៕ ដោយ ៖ តាកែវ