ខេត្តព្រះសីហនុ៖ រដ្ឋបាលខេត្តព្រះសីហនុ បានជូនដំណឹងថា នៅរសៀលម៉ោង ២ និង៣០នាទីថ្ងៃទី២៨ ខែមិថុនា ឆ្នាំ២០១៩ស្អែកនេះ នាទីកន្លែងកើតហេតុការណ៍បាក់រលំអគារកំពស់៧ជាន់ នៅក្រុងព្រះសីហនុ នឹងរៀបចំពិធីបុណ្យខួប៧ថ្ងៃ ដើម្បីឧទ្ទិសកុសល ជូនអ្នកស្លាប់បាត់បង់ជីវិត នៅក្រោមគំនរអគារបាក់រលំ កាលពីព្រឹកថ្ងៃទី២២ ខែមិថុនា ឆ្នាំ២០១៩។
ទាក់ទិនពិធីបុណ្យនេះ លោកស្រី ប្រាក់ ច័ន្ទសុខា អភិបាលរងខេត្តព្រះសីហនុ មានប្រសាសន៍ថា រដ្ឋបាលខេត្តព្រះសីហនុ នឹងនិមន្តព្រះសង្ឃ ២៨អង្គមកធ្វើពិធីសាសនានៅទីតាំងបាក់រលំអគារ៧ជាន់នោះផ្ទាល់ ដើម្បីឧទ្ទិសកុសលជូនដល់វិញ្ញាក្ខន្ធជនរងគ្រោះចំនួន២៨នាក់ ដែលបានស្លាប់ក្នុងហេតុការណ៍នោះ។
គួររំលឹកថា ហេតុការណ៍បាក់រំលំអគារកំពុងសាងសង់ថ្មីមានកម្ពស់៧ជាន់នេះ ស្ថិតនៅភូមិ៣ សង្កាត់លេខ៤ ក្រុង-ខេត្តព្រះសីហនុ គឺបានបាក់រលំទាំងស្រុងកាលពីវេលាម៉ោងជិត៥ព្រឹក ថ្ងៃទី២២ ខែមិថុនា ឆ្នាំ២០១៩។
អគារដួលរលំនេះ មន្ត្រីជំនាញអះអាងថា កើតឡើងដោយសារបញ្ហាបច្ចេកទេសសំណង់គ្មានគុណភាព។ ហើយឧបទ្ទវហេតុនេះ បានបណ្តាលឲ្យមនុស្សស្លាប់ចំនួន២៨នាក់ ស្ត្រី៤នាក់ និងរងរបួសធ្ងន់ស្រាល២៦នាក់ ស្ត្រី២នាក់។ ការដួលរលំអគារខាងលើនេះ ក៏បានសង្កត់រាលដាលខូចខាតដល់ទ្រព្យសម្បត្តិ និងលំនៅដ្ឋាន របស់ប្រជាពលរដ្ឋនៅអមសងខាងមួយចំនួនទៀតផង៕ ដែន សីមា