(ភ្នំពេញ) ៖ កាលពីល្ងាចថ្ងៃទី ២៧ ខែមិថុនា ឆ្នាំ២០១៩ អង្គភាពប្រឆាំងអំពើពុករលួយ (ACU) បានចេញលិខិតស្តីពី អភិបាលនៃគណៈអភិបាលស្រុកខ្សាច់កណ្តាល ខេត្តកណ្តាលករណី ប្រមូលទិញដីបឹងឆ័ត្រទំហំ ៧០ហិកតា មកធ្វើជាកម្មសិទ្ធិ។
អង្គភាពប្រឆាំងអំពើពុករលួយ បានបញ្ជាក់ថា កាលពីថ្ងៃទី១២ ខែមីនា ឆ្នាំ២០១៩កន្លងទៅ អង្គភាពប្រឆាំងអំពើពុករលួយ (ACU) បានទទួលពាក្យ ប្តឹងលោក ប៊ុន ផេង អភិបាលស្រុកខ្សាច់កណ្តាល និងលោក ចាន់ តារា អភិបាលរងស្រុកខ្សាច់កណ្តាល ពាក់ព័ន្ធករណី នាំគ្នាដើរប្រមូលទិញដីបឹងឆ័ត្រ ដែលជាដីសាធារណៈរបស់រដ្ឋ ទំហំ ៧០ហិកតា នៅចំណុចភូមិកំពង់ចំលង និងភូមិត្បូងដំរី ឃុំកំពង់ចំលង ស្រុកខ្សាច់កណ្តាល ខេត្តកណ្តាល ក្រោមរូបភាពឲ្យឈ្មួញឈរឈ្មោះជំនួស ដើម្បីយកទៅធ្វើកម្មសិទ្ធិ។
ករណីខាងលើនេះ នៅថ្ងៃទី៥ ខែមិថុនា ឆ្នាំ២០១៩ លោក ប៊ុន ផេង អភិបាលស្រុកខ្សាច់កណ្តាល បានធ្វើលិខិតបំភ្លឺជូន អង្គភាពប្រឆាំងអំពើពុករលួយ ដោយបានបដិសេធទាំងស្រុងចំពោះការចោទប្រកាន់។ តាមរយៈលិខិតបំភ្លឺ លោក ប៊ុន ផេង បានប្រាប់ ACU ថា ដីបឹងឆ័ត្រ នៅចំណុចភូមិកំពង់ចំលង និងភូមិត្បូងដំរី ឃុំកំពង់ចំលង ស្រុកខ្សាច់កណ្តាល ខេត្តកណ្តាលត្រូវបានអាជ្ញាធរភូមិ ឃុំ ចែកជូនប្រជាពលរដ្ឋ តាំងពីក្រោយថ្ងៃរំដោះប្រល័យពូជសាសន៍ប៉ុលពត ឆ្នាំ១៩៧៩មកម្ល៉េះ ដើម្បីបង្កបង្កើនផលស្រូវប្រាំង និងស្រែឈូក ។
បច្ចុប្បន្នគឺពិតជាមានក្រុមហ៊ុន តូច ធំ ចុះទៅទិញដីនៅក្នុងស្រុកខ្សាច់កណ្តាល។ នៅក្នុងនោះក៏មានក្រុមហ៊ុនខិលខូចមួយចំនួន បានប្រើប្រាស់ឈ្មោះថ្នាក់ដឹកនាំដើម្បីទិញដីពីប្រជាពលរដ្ឋថែមទៀតផង។ ក្នុងនាមជាអាជ្ញាធរ លោក ប៊ុន ផេង និងលោក ចាន់ តារា គឺមានតែខិចខំតទប់ស្កាត់ និងការពារដីសាធារណៈរបស់រដ្ឋ។
សូមជម្រាបជូនថា កាលពីពេលថ្មីនេះ បន្ទាប់ពីតម្លៃដីឡើងថ្លៃកាន់តែខ្លាំង នៅក្នុងស្រុកខ្សាច់កណ្តាល ក៏មានការផ្ទុះឡើងនៅព័ត៌មានពីប្រជាពលរដ្ឋ ដោយចោទប្រកាន់ថា លោក ប៊ុន ផេង អភិបាលស្រុកខ្សាច់កណ្តាល និងលោក ចាន់ តារា ជាអភិបាលរង បានចេញមុខឈរជើងទិញដីបឹងឆ័ត្រ ដែលជាដីសាធារណៈរបស់រដ្ឋ ប្រណាំងប្រជែងជាមួយឈ្មួញទៀតផង។
សេចក្តីរាយការណ៍បានឲ្យដឹងទៀតថា បច្ចុប្បន្ន ដីបឹងឆ័ត្រទំហំជាង ៧០ហិកតា នៅភូមិកំពង់ចំលង និងភូមិត្បូងដំរី ឃុំកំពង់ចំលង ស្រុកខ្សាច់កណ្ដាល កំពុងក្លាយ ទៅជាដីដែលកម្មសិទ្ធិឯកជនបណ្តើរៗហើយ។
បញ្ហាដ៏ចម្រូងចម្រាស ពាក់ព័ន្ធករណីទិញលក់ដីធ្លីសាធារណៈរបស់រដ្ឋ (បឹងឆ័ត្រ) នេះ បានធ្វើឲ្យពលរដ្ឋសម្រេចដាក់ពាក្យប្តឹងទៅអង្គភាពប្រឆាំងអំពើពុករលួយ ដើម្បីស្រាវជ្រាវ និងស៊ើបអង្កេត វែកមុខអ្នកពាក់ព័ន្ធនៅក្នុងរឿងនេះ ៕ ដោយ៖បញ្ញាស័ក្តិ