ក្រសួងសាធារណការ និងដឹកជញ្ជូន និងការិយាល័យទីភ្នាក់ងារ JICA នៅកម្ពុជា បូកសរុបបញ្ចប់គម្រោងទំនើបកម្មប្រព័ន្ធចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានជំនិះ និងផែនការសកម្មភាពបន្ទាប់ដើម្បីពង្រឹងប្រព័ន្ធគ្រប់គ្រងយានយន្ត ដើម្បីសុវត្ថិភាពចរាចរណ៍ និងការការពារបរិស្ថាន និងធ្វើទំនើបកម្មប្រព័ន្ធព័ត៌មានវិទ្យាដើម្បីទ្រទ្រង់ការគ្រប់គ្រងយានយន្តនៅកម្ពុជា។
នៅថ្ងៃព្រហស្បតិ៍ ១០រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ២៧ ខែមិថុនា ឆ្នាំ២០១៩ លោកតូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញជាអធិបតីនៃកិច្ចប្រជុំគណៈកម្មការសម្របសម្រួលរួមលើកទី៦ (6th JCC Meeting) ស្តីពីគម្រោងទំនើបកម្មប្រព័ន្ធចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានជំនិះ នៅសណ្ឋាគារភ្នំពេញ។
កម្មវិធីនេះមានការអញ្ជើញចូលរួមពី លោក Sugano Yuuichi ប្រធានតំណាងការិយាល័យទីភ្នាក់ងារ JICA នៅកម្ពុជា ថ្នាក់ដឹកនាំរបស់ក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូនជប៉ុន ទីប្រឹក្សាគម្រោង ថ្នាក់ដឹកនាំអគ្គនាយកដ្ឋានដឹកជញ្ជូនផ្លូវគោក នាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន និងតំណាងអង្គភាពពាក់ព័ន្ធមកពីអគ្គនាយកដ្ឋានពន្ធដារ អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ នាយកដ្ឋានអត្តសញ្ញាណសញ្ជាតិខ្មែរ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃក្រសួងមហាផ្ទៃផងដែរ។
កិច្ចប្រជុំនេះធ្វើឡើងក្នុងគោលបំណង ដើម្បីធ្វើការបូកសរុបលទ្ធផលនៃការអនុវត្តគម្រោងធ្វើទំនើបកម្មប្រព័ន្ធនៃការចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានជំនិះ MVRI ដំណាក់កាលទីមួយ ក្រោមកិច្ចសហប្រតិបត្តិការជំនួយបច្ចេកទេសរបស់ JICA ដែលបានអនវុត្តចាប់តាំងពីឆ្នាំពី២០១៦ មកទល់បច្ចុប្បន្ននេះ។
លោករដ្ឋលេខាធិការ បានលើកឡើងពីសារសំខាន់នៃសុវត្ថិភាពចរាចរណ៍ និងការធ្វើដំណើរតាមដងផ្លូវ ដែលជាកត្តាប្រឈមសំខាន់នៅកម្ពុជាសព្វថ្ងៃនេះ ព្រមទាំងការធានាឲ្យបាននូវការការពារបរិស្ថាន ខណៈដែលចំនួនរថយន្តមានការកើនឡើងបង្កជាការកកស្ទះចរាចរណ៍ និងគ្រោះថ្នាក់ចរាចរណ៍ជាដើម។ បញ្ហាទាំងនេះក្រសួងសាធារណការ និងដឹកជញ្ជូន កំពុងធ្វើការយកចិត្តទុកដាក់ ដើម្បីដោះស្រាយហើយ ក្នុងនោះគម្រោងខាងលើរបស់ទីភ្នាក់ងារ JICA កំពុងចូលរួមចំណែកយ៉ាងសកម្មផងដែរ។
លោករដ្ឋលេខាធិការ បានថ្លែងការកោតសរសើរដល់គ្រប់ភាគីពាក់ព័ន្ធដែលបានចូលរួមចំណែកអនុវត្តគម្រោងនេះទទួលបានលទ្ធផលជាទីគាប់ប្រសើរស្ទើរប្រហាក់ប្រហែលនឹងផែនការដែលបានកំណត់នៅដើមគ្រានៃគម្រោង សម្រាប់ការចុះបញ្ជីយានយន្ត ត្រួតពិនិត្យលក្ខណៈបច្ចេកទេសយានជំនិះតាមប្រព័ន្ធបច្ចេកវិទ្យាទំនើប។
ឆ្លៀតក្នុងឱកាសនោះ លោករដ្ឋលេខាធិការបានលើកឡើងថា បើទោះបីទទួលបានលទ្ធផលជាទីគាប់ប្រសើរយ៉ាងនេះក្តី ក៏នៅមានចំណុចខ្វះខាត ដែលជាតម្រូវការចំពោះមុខត្រូវដោះស្រាយជាច្រើនផ្សេងទៀតផងដែរ។ លោកបានស្នើទៅក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូនជប៉ុន តាមរយៈទីភ្នាក់ងារ JICA បន្តចូលរួមឲ្យកាន់តែសកម្មបន្ថែមទៀត បន្តគាំទ្រគម្រោងបន្ទាប់ចំនួនពីរគឺ៖ គម្រោងពង្រឹងប្រព័ន្ធគ្រប់គ្រងយានយន្ត ដើម្បីសុវត្ថិភាពចរាចរណ៍ និងការការពារបរិស្ថាន (IVRE) និងគម្រោងធ្វើទំនើបកម្មប្រព័ន្ធព័ត៌មានវិទ្យា ដើម្បីទ្រទ្រង់ការគ្រប់គ្រងយានយន្តនៅកម្ពុជា (MITA)៕ ដោយ៖កូឡាប