ថ្ងៃព្រហស្បតិ៍ ១០រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៧ ខែមិថុនា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល បានទទួលជួបលោកឡាយ គិរី ស្ថាបនិក និងជានាយកប្រតិបត្តិនៃក្រុមហ៊ុនបច្ចេកវិទ្យា CloudNet Co.,Ltd ។
នៅក្នុងជំនួបនោះ លោកឡាយ គិរី ក៏បានលើកឡើងថា៖ ក្រុមហ៊ុនមានអាជីកម្មច្រើនប្រភេទ ក្នុងនោះក្រុមហ៊ុនកំពុងបង្តើតកម្មវិធីទូរស័ព្ទដៃមួយឈ្មោះ GlobeSo ដែលមានមុខងារសំខាន់ៗមួយចំនួនដូចជាសេវាកម្មតាក់ស៊ី បច្ចុប្បន្ននេះមានអ្នកប្រើប្រាស់ជាង៥ពាន់នាក់។ កម្មវិធីនេះក៏មានមុខងារស្វែងរកការងារ Online ដំណោះស្រាយការទូទាត់ប្រាក់ E-Pay និងការកក់សេវាកម្មផ្សេងៗសណ្ឋាគារ Online ផងដែរ។ គោលបំណងនៃការបង្កើតកម្មវិធីទូរស័ព្ទដៃនេះ គឺជួយសម្រួលដល់អ្នកប្រើប្រាស់ក្នុងការស្វែងរកសេវាកម្ម និងផលិតផលផ្សេងៗឲ្យបាន ឆាប់រហ័សគ្រប់ពេលវេលា និងទីកន្លែង។
ក្រុមហ៊ុនបច្ចេកវិទ្យា CloudNet Co.,Ltd ជាក្រុមហ៊ុនបង្តើតឡើងដោយកូនខ្មែរជាង៥ឆ្នាំនៅកម្ពុជាមកហើយ និងមានសាខានៅប្រទេសមីយ៉ាន់ម៉ាផងដែរ។ ក្រុមហ៊ុនបច្ចេកវិទ្យា CloudNet Co.,Ltd មានសេវាកម្មផ្សេងៗដូចជាប្រព័ន្ធគ្រប់គ្រងរដ្ឋបាល បុគ្គលិក គណនេយ្យ ហិរញ្ញវត្ថុ ប្រព័ន្ធគ្រប់គ្រងគម្រោងសុវត្ថិភាពទិន្នន័យ ធ្វើយុទ្ធនាការលក់លើទីផ្សារឌីជីថល ផ្គត់ផ្គង់ផលិតផលឧបករណ៍បច្ចេកវិទ្យា ផ្តល់ការប្រឹក្សារៀបចំគម្រោងបច្ចេកវិទ្យា ។ល។ ក្រុមហ៊ុនបច្ចេកវិទ្យា CloudNet Co.,Ltd ក៏កំពុងទ្រទ្រង់ប្រតិបត្តិការរបស់គ្រឹះស្ថានហិរញ្ញវត្ថុ ទាំងក្នុងស្រុក និងក្រៅស្រុកមួយចំនួនផងដែរ ជាពិសេសនៅប្រទេសមីយ៉ានម៉ា ដែលជួយសម្រួលលើការគ្រប់គ្រង និងកាត់បន្ថយពេលវេលាប្រតិបត្តិការប្រកបដោយប្រសិទ្ធភាព។ លោកឡាយ គិរី បានបង្ហាញពីការតាំងចិត្តរបស់ខ្លួនក្នុងការចូលរួមចំណែកអភវឌ្ឍវិស័យសាធារណៈឲ្យកាន់តែមានការរីកចម្រើនប្រសើរឡើង។
លោកទេសរដ្ឋមន្ត្រី បានថ្លែងការកោតសរសើរចំពោះក្រុមហ៊ុនដែលអាចផ្តល់សេវាកម្មបច្ចេកវិទ្យា ដែលជាស្នាដៃរបស់កូនខ្មែរ និងអាចពង្រីកសាខាទៅក្រៅប្រទេសបាន។ លោកទេសរដ្ឋមន្ត្រីក៏បានណែនាំឲ្យស្ថាបនិកក្រុមហ៊ុនធ្វើការងារជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ ដើម្បីពិនិត្យលើកគម្រោងសហប្រតិបត្តិការតាមជំនាញរបស់ខ្លួន ហើយក៏ត្រូវខិតខំជំរុញសេវាកម្ម និងផលិតផលបច្ចេកវិទ្យាថ្មីៗរបស់ខ្លួនឲ្យកាន់តែទទួលបានភាពជោគជ័យ និងប្រជាប្រិយភាពខ្ពស់លើទីផ្សារជាតិ និងអន្តរជាតិ ក៏ដូចជាចូលរួមចំណែក ប្រើប្រាស់បច្ចេកវិទ្យាជួយដល់ការអភិវឌ្ឍគ្រប់វិស័យនៅកម្ពុជាឲ្យមានការីកចម្រើនកាន់តែប្រសើរមួយកម្រិតទៀតផងដែរ៕ ដោយ៖កូឡាប
