(ភ្នំពេញ)៖ នាឱកាសចូលកាន់តំណែងជាប្រធានសហព័ន្ធខ្មែរកីឡាទោចក្រយានក្នុងអាណត្តិ ឆ្នាំ២០១៨-២០២២ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានប្តេជ្ញាពង្រឹងកិច្ចសហការជាមួយគណៈកម្មាធិការប្រតិបត្តិ និងលោកគ្រូបង្វឹកទាំងអស់ ដើម្បីបន្តដឹកនាំ និងអភិវឌ្ឍន៍វិស័យកីឡាមួយនេះ ឱ្យកាន់តែរីកចម្រើន សំដៅឈានឆ្ពោះទៅដណ្តើមជ័យជម្នះ ក្នុងព្រឹត្តិការណ៍ប្រកួតកីឡាស៊ីហ្គេម (SEA Games) លើកទី៣២ ឆ្នាំ២០២៣។
ការប្តេជ្ញាចិត្តរបស់លោករដ្ឋមន្ត្រី បានធ្វើឡើងនៅក្នុងមហាសន្និបាតវិសាមញ្ញ សហព័ន្ធខ្មែរកីឡាទោចក្រយាន ដែលរៀបចំឡើងកាលពីរសៀលថ្ងៃទី២៧ ខែមិថុនា ឆ្នាំ២០១៩ នៅទីស្នាក់ការគណៈកម្មាធិការជាតិអូឡាំពិកកម្ពុជា ក្រោមការអញ្ជើញជាគណៈអធិបតីភាពពី លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិក មន្ត្រីជាន់ខ្ពស់រាជរដ្ឋាភិបាល គ្រូបង្វឹក និងកីឡាករ-កីឡាការនី ប្រមាណជាង ១០០នាក់។
នៅក្នុងឱកាសនោះ លោករដ្ឋមន្ត្រី ប៉ាន សូរស័ក្តិ បានវាយតម្លៃខ្ពស់ ចំពោះសមិទ្ធផលការងាររបស់គណៈកម្មាធិការប្រតិបត្តិចាស់ និងការលះបង់របស់លោកគ្រូបង្វឹកខ្មែរ និងបរទេស ក៏ដូចជាកីឡាករ-កីឡាការិនីទាំងអស់ ដែលបានចូលរួមអភិវឌ្ឍន៍វិស័យកីឡាកង់កម្ពុជា រហូតទទួលបានជោគជ័យជាបន្តបន្ទាប់ជូនជាតិ នាពេលកន្លងមក មានដូចជាមេដាយមាស ១, មេដាយប្រាក់ ១ និងពានរង្វាន់កិត្តិយសជាច្រើន។
លោករដ្ឋមន្ត្រី បានលើកឡើងពីតម្រូវការចាំបាច់សម្រាប់វិស័យកីឡាប្រណាំងកង់ និងបានស្នើសុំទស្សនៈ និងការចូលរួមគាំទ្របន្តទៀត ពីសមាជិកគណៈកម្មាធិការប្រតិបត្តិ មន្ត្រីសហព័ន្ធ និងគ្រូបង្វឹកទាំងអស់ ដើម្បីដោះស្រាយរាល់បញ្ហាប្រឈមសំខាន់ៗរបស់កីឡាមួយនេះ សំដៅកសាង និងអភិវឌ្ឍន៍សមត្ថភាពកីឡាករ-កីឡាការនីកម្ពុជា ឆ្ពោះទៅរកគុណផលកីឡាកម្រិតខ្ពស់ទាំងក្នុងតំបន់ និងលើពិភពលោក។
«វិស័យកីឡាប្រណាំងកង់បច្ចុប្បន្ន គឺត្រូវការកម្រិតអាជីព និងជំនាញខ្ពស់ណាស់ គឺមិនត្រឹមតែកីឡាករ កីឡាការិនី មានសមត្ថភាពខ្ពស់ទេ សូម្បីកង់ប្រណាំង ក៏ត្រូវតែផលិត និងបំពាក់ដោយបច្ចេកវិទ្យាទំនើបៗ ទើបអាចដណ្តើមយកជ័យជម្នះនៅក្នុងការប្រកួតបាន។ កាលណាកង់កាន់តែទំនើប និងកាន់តែងាយស្រួល តម្លៃរបស់វាក៏កាន់តែថ្លៃផងដែរ» លោកប៉ាន សូរស័ក្តិ បានគូសបញ្ជាក់។
ក្នុងខណៈដែលសមាជិកប្រតិបត្តិមួយចំនួន ដកខ្លួនចេញរួមផ្សំជាមួយនឹងលោកនុត សាអាន ដែលជាប្រធានសហព័ន្ធ មិនមានពេលវេលាគ្រប់គ្រាន់នោះ លោកក៏បានប្រកាសដកខ្លួនចេញ ដើម្បីឲ្យសហព័ន្ធដែលមានសក្ដានុពលមួយនេះ ធ្វើមហាសន្និបាតវិសាមញ្ញពាក់កណ្ដាលអាណត្តិ ដើម្បីជ្រើសរើសប្រធានថ្មី ។ មហាសន្និបាតដែលធ្វើឡើង នាល្ងាចថ្ងៃទី២៧មិថុនានោះ លោកប៉ាន សូរស័ក្តិ ដែលជាប្រធានសហព័ន្ធថ្មី ។ អាណត្តិដែលមិនទាន់ចប់នេះ មានសមាជិកប្រតិបត្តិចំនួន១៥រូប តែបន្ទាប់ពីធ្វើមហាសន្និបាតវិសាមញ្ញទៅ សមាជិកប្រតិបត្តិបន្សល់ទុកត្រឹមតែ១៣រូបប៉ុណ្ណោះ។ តាមការនោះថា ប្រកាសឲ្យដឹងពីលោកវ៉ាត់ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជានោះថា លោកប៉ាន សូរស័ក្តិ ជាប្រធានសហព័ន្ធ រួមជាមួយអនុប្រធានសហព័ន្ធចំនួន៣រូប គឺលោកកឹម សុខុន ជាអនុប្រធានទី១ លោកឧកញ៉ាវង្ស ខាន់ពៅ ដែលជាអគ្គលេខាធិការសហព័ន្ធ ជាអនុប្រធានទី២ និងលោកស៊ាង ថៃ ជាអនុប្រធានទី៣ ។ លោកនូ ចំរើន ជាអគ្គលេខាធិការ លោកព្យែរ អ៊ីវកាទ្រី និងលោកសុខ ដារិទ្ធិជាអគ្គលេខាធិការរង ។លោក ឡាយ សុខសៅគន្ធាជាអគ្គហិរញ្ញិក ។ ក្រៅពីនោះ មានសមាជិកប្រតិបត្តិធម្មតាចំនួន៥រូបទៀត គឺឡុង កែវវិចិត្រលោក អ៊ូច សារិន កញ្ញាឱ ច័ន្ទន៍ កញ្ញាជ័យ ច័ន្ទរស្មី និង កញ្ញាង៉ែត ធានសិរីវល័ក្ខ ។
សូមបញ្ជាក់ថា លោកប៉ាន សូរស័ក្តិ ក៏បានប្រកាសតែងតាំង លោកនុត សាអាន ដែលសុំដកខ្លួនចេញនោះ ជាប្រធានកិត្តិយសទៀតផង។
លោកថោង ខុន បានមានប្រសាសន៍ថា ជាសហព័ន្ធមួយ គឺត្រូវរៀបចំគ្រូបង្វឹក មន្ត្រីបច្ចកទេស អាជ្ញាកណ្ដាល មន្ត្រីរដ្ឋបាលឲ្យបានត្រឹមត្រូវ ។ការប្រណាំងកង់មាន៤វិញ្ញាសា គឺប្រណាំងតាមដងផ្លូវ ប្រណាំងតាមភ្នំ ប្រណាំងក្នុង សាល និងការសំដែងកង់ចម្រុះ ។ កម្ពុជាលេងតែវិញ្ញាសាប្រណាំងតាមផ្លូវ និងប្រណាំងតាមភ្នំតែប៉ុណ្ណោះ ហេតុនេះ ត្រូវតែលើកទឹកចិត្ត ដល់កីឡាករ-កីឡាការិនី ដែលលេងវិញ្ញាសានេះ ។
គួររម្លឹក ដែរថា តាមរយៈការដាក់ចេញនូវនយោបាយ «ឈ្នះ-ឈ្នះ» របស់សម្តេចអគ្គមហាសេនាបតីតេជោ ហ៊ុន សែន បានធ្វើឱ្យកម្ពុជា ជួបនូវសុខសន្តិភាព និងវឌ្ឍនភាពគ្រប់វិស័យ ព្រមទាំងមានការផ្លាស់ប្ដូរយ៉ាងល្អប្រសើរ ទាំងទិដ្ឋភាពនយោបាយ សន្តិសុខ សេដ្ឋកិច្ច និងសង្គម ដែលបង្កើតបានជាកាលានុវត្តភាពថ្មីៗ សម្រាប់រាជរដ្ឋាភិបាល ក្នុងការពង្រឹងអនុវត្តន៍កម្មវិធីកំណែទម្រង់ស៊ីជម្រៅ ការពង្រីកមូលដ្ឋានកំណើន និងការទទួលធ្វើជាម្ចាស់ផ្ទះប្រកបដោយទំនុកចិត្តខ្ពស់ ដើម្បីរៀបចំព្រឹត្តិការណ៍ប្រកួតកីឡា SEA GAMES នៅក្នុងឆ្នាំ២០២៣ ខាងមុខ៕ ដោយ៖បញ្ញាស័ក្តិ
