ព្រៃវែង ៖ កម្លាំងនគរបាលខេត្តព្រៃវែង ឃាត់ខ្លួនជនសង្ស័យ២នាក់ ប្តីប្រពន្ធ ករណីចោរកម្ម កេងបន្លំលុយបានជាង១១ម៉ឺនដុល្លារ នៅគ្រឹះស្ថានមីក្រូហិរញ្ញវត្ថុ AMK សាខាព្រៃវែង កាលពីថ្ងៃទី២៧ ខែមិថុនា ឆ្នាំ២០១៩ នៅភូមិលេខ៤ សង្កាត់កំពង់លាវ ក្រុងព្រៃវែង ខេត្តព្រៃវែង។
ការឃាត់ខ្លួនជនសង្ស័យទាំង២នាក់ ដោយយោងតាមពាក្យបណ្តឹង របស់ដើមបណ្ដឹងឈ្មោះ ប៉ុក គង្គារិទ្ធ ភេទប្រុស អាយុ៣៤ឆ្នាំ ជាប្រធានសាខាAMK ព្រៃវែង។
ជនសង្ស័យឈ្មោះ សោម អង្គា ភេទស្រី អាយុ២៨ឆ្នាំ ប្រធានហិរញ្ញឹក AMK ប្ដីឈ្មោះ សុខ សុភារ៉ា អាយុ៣០ឆ្នាំ មុខរបរលក់គ្រឿងម៉ាស៊ីន នៅភ្នំពេញ ជាអ្នករៀបចំគំរោង ឲ្យប្រពន្ធយកលុយពីមីក្រូហិរវត្ថុ AMK។
ជនសង្ស័យទាំង២នាក់ប្តីប្រពន្ធ លួចបានចំនួន ១១៥៤០០ ដុល្លារអាមេរិក ដោយ មូលហេតុ ប្ដីចាញ់ល្បែង នៅភ្នំពេញ ក៏រៀបគម្រោងឲ្យប្រពន្ធលួចលុយយ៉ាងងាយស្រួលពីព្រោះថា ស្ត្រីជាប្រពន្ធមានតួនាទីជាប្រធានហិរញ្ញឹកនៅក្នុងធនាគារមួយនេះ ។
ជនសង្ស័យទាំង២នាក់ ត្រូវបានសមត្ថកិច្ចឃាត់ខ្លួន បណ្តោះអាសន្ន នៅអធិការក្រុងព្រៃវែង ដើម្បីកសាងសំណុំរឿង បញ្ជូនទៅតុលាការ ចាត់ការតាមនីតិវិធី ៕ ដោយ ៖ បញ្ញាស័ក្តិ
