ភ្នំពេញ៖ សម្ដេចតេជោ ហ៊ុន សែន បានចេញមកឆ្លើយតបទៅនឹងចម្ងល់របស់មហាជន និងលើកឡើងជាបន្ដបន្ទាប់ តាមបណ្ដាញហ្វេសប៊ុក ករណីជនជាតិជប៉ុនមួយគ្រួសារ ដែលហាងរបស់ពួកគេ បានរងការខូចខាត ដោយអគារបាក់សង្កត់លើ កាលពីថ្ងៃទី២២ ខែមិថុនា ឆ្នាំ២០១៩ បណ្ដាលឲ្យខូចខ្ទេចខ្ទីគ្មានសល់ ហើយមកដល់ពេលនេះ នៅពុំទាន់បានប្រាក់សំណងផ្លូវការ នៅឡើយ។
សម្ដេចតេជោ ហ៊ុន សែន ក៏បានលើកឡើងពីយានដ្ឋានអារុណរះ នៅជាប់អគារបាក់រលំនោះ ក៏ត្រូវដាក់ពាក្យប្ដឹងទៅកាន់តុលាការ ដើម្បីទាមទារសំណង ពីការខូចខាត។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ នៅលើផេកហ្វេសប៊ុកធ្វើការនៅថ្ងៃទី ២៨ ខែមិថុនានេះថា “បងប្អូនមួយចំនួននៅលើកឡើងច្រំដែល អំពីជនជាតិជប៉ុនដែលហាងគាត់ត្រូវបំផ្លាញ ដោយអគាររលំសង្កត់លើ។ ខ្ញុំឆ្លើយតបច្រើនហើយ។ ខ្ញុំគួរតែបញ្ជាក់ជាថ្មីថា ប្រសិនបើគាត់ស្លាប់ ឬរបួសគាត់នឹងទទួលបានជំនួយដូចពលរដ្ឋខ្មែរដែរ តែនេះជាការខូចខាតទ្រព្យសម្បត្តិ គឺត្រូវដោះស្រាយតាមផ្លូវតុលាការ ដែលគាត់ត្រូវដាក់ពាក្យប្តឹងដើម្បីទាមទាសំណង។ សម្រាប់ការដោះស្រាយ កន្លែងស្នាក់នៅ ឯ.ឧ យន្ត មីន បានឲ្យស្នាក់នៅស្នាក់ការកាកបាទក្រហម និងបានឧបត្ថម្ភថវិកាមួយចំនួនរួចហើយដែរ។
មិនគ្រាន់ហាងជប៉ុននោះទេ សូម្បីតែបងប្អូនខ្មែរយើងដែលស្លាប់ និងរបួស ដែលបានជំនួយឧបត្ថម្ភរួចហើយ ក៏នៅប្តឹងដើម្បីទាមទារសំណងផងដែរ។ ហាងលាងឡានអារុណរះ ដែលរងការខូចខាតក៏ត្រូវប្តឹងទាមទារសំណងដូចគ្នា”។
កាលពីថ្ងៃទី ២៧ ខែមិថុនា គ្រួសារជនជាតិជប៉ុន និងជាម្ចាស់ហាងឈ្មោះ គូកៃ ដែលរងគ្រោះដោយសារអគារបាក់សង្កត់លើនេះ ត្រូវបានអភិបាលខេត្តព្រះសីហនុ លោក យន្ដ មីន ចុះទៅសួរសុខ ទុក្ខផ្ទាល់ និងយកថវិការួមទាំងអំណោយមួយចំនួន ជូនពួកគេសម្រាប់ដោះស្រាយជាបណ្ដោះអាសន្ន លើជាជីវភាពប្រចាំថ្ងៃ បន្ទាប់ពីរួចផុតពីគ្រោះថ្នាក់នៅ ពេលអគារបាក់សង្កត់លើហាងរបស់ខ្លួន។
ជនជាតិជប៉ុនម្នាក់បើកភោជនីយដ្ឋានឈ្មោះ “គូកៃ” នៅក្បែរ អគារចិនកម្ពស់៧ជាន់ ដែលដួលរលំស្ថិតនៅតាមបណ្ដោយផ្លូវ ៧ មករា ស្ថិតក្នុងភូមិ៣ សង្កាត់៤ ក្រុង-ខេត្តព្រះសីហនុ កាលពីរាត្រីទៀបភ្លឺថ្ងៃទីថ្ងៃទី២២ ខែមិថុនា ឆ្នាំ២០១៩ កន្លងទៅនេះ ក៏ត្រូវបានអគារ ៧ជាន់នោះ ដួលរលំសង្កត់លើខូចខាតទាំងស្រុង ហើយខណៈនោះ ជនជាតិជប៉ុនម្ចាស់ហាងមានប្រពន្ធកូនតូច និងបុគ្គលិកខ្មែរប្តីប្រពន្ធ និងកូនតូចកំពុងដេកលង់លក់នៅទីនោះ ហើយសំណាងណាស់ បានរួចផុតជីវិតពីឧប្បត្តិហេតុនោះ ដោយរលូនចេញពីទីនោះទាំងភ័យតក់ស្លុត។ ប៉ុន្តែសម្ភារៈទ្រព្យសម្បត្តិមួយចំនួនខូចខាតទាំងស្រុង។
ជនជាតិជប៉ុនម្ចាស់ភោជនីយដ្ឋាន ឈ្មោះ “គូកៃ” នៅក្បែរ អគារចិនកម្ពស់៧ជាន់ ដែលដួលរំនោះមានឈ្មោះ TOMO TAKA ARRI អាយុ៤៥ឆ្នាំ ប្រពន្ធឈ្មោះ YU KO អាយុ ៤៦ឆ្នាំ និង កូនឈ្មោះYU TO អាយុ១៤ឆ្នាំ រួមនឹងបុគ្គលិកជនជាតិខ្មែរពីរនាក់ប្ដីប្រពន្ធ និងកូនតូចផងដែរ(មិនបានប្រាប់ឈ្មោះ) ពួកគាត់មិនទាន់បាត់ភាពភ័យតក់ស្លុតនៅ ឡើយទេ បន្ទាប់ពីព្រឹត្តិការណ៍ដួលរលំអគារចិន៧ជាន់មកលើ ហាងលក់អាហាររបស់គាត់។ ជនជាតិជប៉ុនរូបនោះលើកឡើងថា ពួកគាត់ក៏ជាជនរងគ្រោះដែរ តែគ្មានអ្នកសួរនាំគ្រួសារគាត់ និងជួយគាត់ទេ គឺជួយតែអ្នករងគ្រោះក្នុងអគារបង្កតែប៉ុណ្ណោះ។ មកទល់ពេលនេះគ្រួសារគាត់ និងបុគ្គលិកបានបាត់មុខរបរទាំងស្រុង។
លោក TOMO TAKA ARRI បានត្អូញត្អែថា នៅរសៀលថ្ងៃទី២៥ ខែមិថុនា ឆ្នាំ ២០១៩ ជាថ្ងៃនៃការបិទបញ្ចប់ការសង្គ្រោះមនុស្សក្នុងអគារ៧ជាន់ដួលរលំនោះ ពួកគាត់មានការតូចចិត្តយ៉ាងខ្លាំង ចំពោះថ្នាក់ដឹកនាំខេត្តព្រះសីហនុ ពួកគាត់មានបញ្ហា អត់ឃើញអ្នកមកយកឈ្មោះពួកគាត់ ដែលរួចផុតជីវិតពីគ្រោះថ្នាក់ ដោយអគារសង្កត់ ហើយមិនមានសមត្ថកិច្ចណា មកសួរនាំយកឈ្មោះពួកគាត់ ទៅចុះក្នុងបញ្ជីអ្នករងគ្រោះផងដែរ។ ហើយពួកគាត់បានបន្តត្អូញត្អែថា គាត់មិនមែនជាអ្នកមានលុយកាក់ ធូរធារនោះទេ គាត់ជាអ្នករកស៊ី និងជួលផ្ទះគេបើកហាងតែប៉ុណ្ណោះ។ ដូច្នេះសូមថ្នាក់ដឹកនាំធ្វើយ៉ាងណា ជួយសម្រួលដល់ពួកគាត់ ក្នុងគ្រាលំបាកខ្វះខាតនេះ។ ហើយមកទល់ពេលនេះ ក៏ពុំទាន់មានព័ត៌មានទាក់ទង ទៅនឹងសំណង មកកាន់ពួកគាត់ជាជនរងគ្រោះដែរ៕ ដោយ៖កូឡាប