ខេត្តព្រះសីហនុ ៖ អភិបាលនៃគណៈអភិបាលខេត្តព្រះសីហនុ លោក យន្ត មីន បានថ្លែងអំណរគុណដល់មន្ត្រីរាជការបំរើការងារនៅតាមមន្ទីរអង្គភាពទាំងអស់ នៃរដ្ឋបាលខេត្តព្រះសីហនុ ដែលបានខិតខំធ្វើការងារជំរុញឲ្យខេត្តព្រះសីហនុ មានការអភិវឌ្ឍរីកចំរើនលើគ្រប់វិស័យ ជាពិសេសជំរុញឲ្យ ជីវភាពប្រជាជនមានប្រាក់ចំណូលចិញ្ចឹមគ្រួសារបានធូធារ និងរីកចំរើនសម្បូរសប្បាយ។
ទន្ទឹមគ្នានេះ លោក យន្ត មីន ក៏បានផ្តាំផ្ញើដល់មន្ត្រីទាំងឡាយ ត្រូវខិតខំបំរើប្រជាជនដោយស្មោះត្រង់ និងត្រូវយកច្បាប់ជាគោល ជំរុញឲ្យស្រុកទេសមានការអភិវឌ្ឍ មានសុខសន្តិភាព និងការរស់នៅ របស់ប្រជាពលរដ្ឋមានសេចក្តីសុខក្សេមក្សាន្តគ្រប់ៗគ្នា។
បណ្តាំផ្តាំផ្ញើ របស់លោក យន្ត មីន អភិបាលខេត្តព្រះសីហនុបែបនេះ បានធ្វើឡើងនាឱកាស លោកបានចូលរួមដឹកនាំកិច្ចប្រជុំបូកសរុបលទ្ធផលការងារប្រចាំខែមិថុនា ឆ្នាំ២០១៩ និងលើកទិសដៅការងារ សម្រាប់ខែកក្កដា កាលពីរសៀលថ្ងៃទី២៧ ខែមិថុនា ឆ្នាំ២០១៩ មុនពេលដែល រូបលោក នឹងត្រូវផ្ទេរភារៈកិច្ចពីអភិបាលខេត្តព្រះសីហនុ ទៅទទួលតំណែងថ្មីនៅថ្ងៃទី២៩ ខែមិថុនា ឆ្នាំ២០១៩ខាងមុខនេះ។ ហើយថា ការផ្លាស់ប្តូរតំណែង ឬតួនាទីថ្មីនេះ គឺបានកើតមានបន្ទាប់ពីមានហេតុការណ៍បាក់រំលំអគារកំពស់៧ជាន់ កំពុងសាងសង់អត់ច្បាប់មួយកន្លែង នៅភូមិ៣ សង្កាត់៤ ក្រុង-ខេត្តព្រះសីហនុ បានបណ្តាលឲ្យ មានមនុស្សស្លាប់ និង របួសរហូតសរុបចំនួន ៥៤នាក់ កាលពីវេលាម៉ោងជិត ៥ព្រឹកថ្ងៃទី២២ ខែមិថុនា ឆ្នាំ២០១៩។
ឧបទ្ទវហេតុខាងលើនេះ ជម្រុញឲ្យលោក យន្ត មីន អភិបាលខេត្តព្រះសីហនុ បានសម្រេចចិត្តសុំលាលែងចេញពីតំណែងអភិបាលខេត្តព្រះសីហនុ ហើយលោកបានបង្ហាញការសោកស្តាយជាខ្លាំង ចំពោះហេតុការណ៍ ដ៏សោកសង្រេង ដែលបានកើតមានក្នុងអាណត្តិ នៃការគ្រប់គ្រងដឹកនាំ របស់លោក ដែលដឹកនាំមន្ត្រីក្រោមឱវាទបំពេញការងារមិនបានល្អ បណ្តាលឲ្យមូលដ្ឋានខេត្តព្រះសីហនុ កើតមានរឿងអកុសលធ្ងន់ធ្ងរឈានដល់ស្លាប់ និងរងរបួសមនុស្សរាប់សិបនាក់បែបនេះ។
ត្រង់ចំណុចនេះ លោក យន្ត មីន ដែលជិតផុតអាណត្តិជាអភិបាលខេត្តព្រះសីហនុ ត្រឹមថ្ងៃទី២៩ ខែមិថុនា ឆ្នាំ២០១៩ចុងសប្តាហ៍នេះ បានបង្ហាញទឹកមុខស្រងោតស្រងាត់ និងបង្ហាញអារម្មណ៍សោកស្តាយ នៅចំពោះមុខមន្ត្រីរាជការក្នុងកិច្ចប្រជុំប្រចាំខែមិថុនា របស់រដ្ឋបាលខេត្តព្រះសីហនុ ចំពោះសោកនាដកម្មនៃការបាក់រំលំអគារបណ្តាលឲ្យមានប្រជាពលរដ្ឋស្លូតត្រង់ចំនួន ២៨នាក់បានស្លាប់ និងរងរបួសធ្ងន់ស្រាលចំនួន ២៨នាក់ថ្មីៗនេះ។
លោក យន្ត មីន បានឲ្យដឹងដូច្នេះ រួចយល់ថា ហេតុការណ៍បាក់រំលំអគារខាងនេះ ទំនងជាអាចនាំឲ្យមានផលប៉ះពាល់ខ្លះដែរ ចំពោះដំណើរការវិនិយោគ នៅខេត្តព្រះសីហនុ ព្រោះអ្នកវិនិយោគ និងភ្ញៀវទេសចរ អាចមានការព្រួយបារម្ភខ្លះក្នុងរយៈពេលមួយ។
យ៉ាងនេះក្តីលោករំពឹងថា អ្វីៗនឹងប្រសើរឡើងវិញនៅពេលខាងមុខ ហើយខេត្តព្រះសីហនុ នឹងកាន់តែរីកចម្រើនថែមទៀត។
ព្រមជាមួយគ្នានេះ លោក យន្ត មីន អភិបាលខេត្តព្រះសីហនុជិតផុតអាណត្តិ បានថ្លែងអំណរគុណចំពោះមន្ត្រីរាជការនៅតាមមន្ទីរអង្គភាពនានា នៃរដ្ឋបាលខេត្តព្រះសីហនុ ដែលបានខិតខំបំពេញការងារ ព្រមទាំងបានគាំទ្រការដឹកនាំ របស់លោករយៈពេលជិត ៤ឆ្នាំកន្លងមកនេះ បានធ្វើជម្រុញឲ្យខេត្តព្រះសីហនុ មានការអភិវឌ្ឍ ជីវភាពប្រជាជន បានធូធារដូចសព្វថ្ងៃនេះ។ បន្ថែមលើនេះ លោកបានផ្តាំផ្ញើមន្ត្រីទាំងឡាយត្រូវខិតខំបំរើប្រជាជនដោយស្មោះត្រង់ និងយកច្បាប់ជាគោល។
លោកថា នៅមុនពេលរូបលោក ត្រូវផ្ទេរចេញពីតំណែងអភិបាលខេត្តព្រះសីហនុ រូបលោកបានផ្តាំផ្ញើជាចុងក្រោយដល់មន្ត្រីរាជការទាំងអស់ ឲ្យយកចិត្តទុកដាក់លើ ចំណុចសំខាន់ៗមួយចំនួនរួមមាន ៖
១- បញ្ហាសន្តិសុខ សណ្តាប់ធ្នាប់ ចរាចរណ៍ ២- បរិស្ថាន(ការគ្រប់គ្រងសំណល់រឹង /រាវ) ៣- ពិនិត្យភាពស្របច្បាប់ របស់ជនបរទេសមករកស៊ីនៅក្រុងព្រះសីហនុ ដើម្បីកុំអោយប្រជាជនថ្នើងថ្នាក់ ៤- ការគ្រប់គ្រងសំណង់ លោកស្នើអោយធ្វើអោយបានម៉ឺងម៉ាត់ស្របតាមច្បាប់ កន្លងមកមន្ត្រីហាក់មានការធ្វេសប្រហែសណាស់ ៥- បញ្ហាភាពអនាធិបត្តេយ្យដីធ្លី ត្រូវតែទប់ស្កាត់ដោះស្រាយអោយបាន។ កើតមានក្នុង ដែនដីស្រុកណាស្រុកនោះទទួលខុសត្រូវ ៦- ស្នើរដ្ឋបាលក្រុង លៃលករៀបចំ street food (កន្លែងលក់អាហារតាមចិញ្ចើមផ្លូវអោយពលរដ្ឋលក់ដូរពេលយប់) ៧- ការងារគ្រប់គ្រង អូរ ប្រឡាយ ត្រូវធ្វើអោយបានម៉ឺងម៉ាត់ទប់ស្កាត់ការរំលោភអោយបាន ៨- បន្តចុះពិនិត្យការធ្វើអាងប្រព្រឹត្តិកម្មតាមទីតាំងសំណង់ទាំងអស់ឡើងវិញ ៩- ពង្រឹងសេវាសាធារណៈជូនពលរដ្ឋអោយបានល្អ លឿន មានគុណភាព តម្លាភាព និងគណនីភាព ដើម្បីអោយប្រជាជនទុកចិត្តបាន ១០- យកចិត្តទុកដាក់ក្នុងការងារដោះស្រាយទំនាស់ដីធ្លីជូនប្រជាជន ១១- ពង្រឹងឯកសាររដ្ឋបាលអោយបានត្រឹមត្រូវច្បាស់លាស់ ១២- ការអនុវត្តការងារត្រូវយកច្បាប់ជាគោល។
គួររំលឹកថា នៅថ្ងៃរាត្រីទាបភ្លឺថ្ងៃទី២២ ខែមិថុនា ឆ្នាំ២០១៩ អាគារគ្រោងដែកកំពស់៧ជាន់ របស់ជនជាតិចិន មានទីតាំងនៅក្នុងភូមិ៣ សង្កាត់លេខ ៤ក្រុងព្រះសីហនុ បានបាក់រំលំ បានបណ្តាលឲ្យកម្មករខ្មែរចំនួន២៦នាក់របួស និង២៨នាក់ទៀត បានស្លាប់ក្នុងគំនរបំណែក នៃអគារបាក់បែក។
ហេតុការណ៍បាក់រលំអគារសង់អត់ច្បាប់កំពស់ ៧ជាន់ ខាងលើនេះ សមត្ថកិច្ចបានឃាត់ខ្លួនអ្នកជាប់ពាក់ពន្ធ័មួយចំនួនបញ្ជូនទៅនាក់តុលាការផ្តន្ទាទោស និងមនុស្សមួយចំនួនទៀត កំពុងចាត់ការតាមផ្លូវច្បាប់ ។ ដោយឡែកចំពោះមូលហេតុ នៃការបាក់រលំកំពុងត្រូវបានស៊ើបអង្គេតដោយយកចិត្តទុកដាក់ពីក្រុមការងារជំនាញថ្នាក់ជាតិ៕ ដែន សីមា
