ប្រធានាធិបតីអាមេរិច ដូណាល់ ត្រាំ បានអញ្ជើញមេដឹកនាំកូរ៉េខាងជើង គីម ជុងអ៊ុន តាមរយៈ Twitter ឲ្យជួបគាត់នៅតំបន់គ្មានកងទ័ព ដែលខណ្ឌចែកប្រទេសកូរ៉េខាងជើង និងកូរ៉េខាងត្បូង។
លោក ត្រាំនឹងធ្វើដំណើរទៅកាន់ប្រទេសកូរ៉េខាងត្បូង នៅថ្ងៃសៅរ៍នេះ ក្រោយពេលកិច្ចប្រជុំកំពូល G20 ចប់សប់គ្រប់ក្នុងប្រទេសជប៉ុន។
គាត់នឹងធ្វើដំណើរទស្សនៈកិច្ចនៅប្រទេសកូរ៉េខាងត្បូងរយៈពេល ២ថ្ងៃ ដើម្បីសង្គ្រោះកិច្ចចរចារនុយក្លេអ៊ែរជាមួយនឹងកូរ៉េខាងជើង។
ថ្លែងនៅក្នុងកិច្ចប្រជុំកំពូល G20 ក្នុងទីក្រុងអូសាកា លោកត្រាំ បានផ្តល់ពត៌មានលំអិតខ្លះៗ ប្រាប់អ្នកសារពត៌មានដោយបញ្ជាក់ថា គាត់បានសម្រេចចិត្តនៅថ្ងៃសៅរ៍ព្រឹកនេះក្នុងការបង្ហាញយោបល់ដើម្បីចង់ដឹងលោក គីម។
ត្រាំ ថ្លែងប្រាប់ថា “ប្រសិនជាគាត់ (គីម ជុងអ៊ុន) នៅទីនោះ ពួកយើងនឹងជួបគ្នារយៈពេល ២នាទីក៏បានដែរ”។
សូមរម្លឹកថា លោក ត្រាំ ធ្លាប់ចង់ធ្វើដំណើរទៅកាន់តំបន់គ្មានកងទ័ពម្តងរួចមកហើយ កាលពីឆ្នាំ ២០១៧ ប៉ុន្តែគាត់ត្រូវបានបង្ខំឲ្យបោះបង់គម្រោងនោះចោលវិញ ដោយសារតែបញ្ហាអាកាសធាតុ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC