ខេត្តពោធិ៍សាត់ ៖ សមត្ថកិច្ចនគរបាល បានចុះប្រតិបត្តិការ ឃាត់ខ្លួនជនសង្ស័យចំនួន២នាក់ ជួញដូរគ្រឿងញៀន និងដកហូតបានវត្ថុតាងគ្រឿងញៀនមួយចំនួនរួមទាំងកាំភ្លើងខ្លីផងដែរ កាលពីថ្ងៃទី២៨ ខែមិថុនា ឆ្នាំ២០១៩ ត្រង់ចំណុចព្រំប្រទល់ឃុំឈើតុំ ស្វាយស ក្នុងផ្ទះសំណាក់សុខម៉េង ស្ថិតក្នុងភូមិត្រពាំងស្នួល ឃុំស្វាយស ស្រុកក្រគរ ខេត្តពោធិ៍សាត់។
ជនសង្ស័យទាំង 2 នាក់ ឈ្មោះ ព្រីម សីលា ហៅផើង ភេទប្រុស អាយុ ៣៤ឆ្នាំ ជនជាតិខ្មែរ បច្ចុប្បន្ន រស់នៅភូមិកំពង់សំបួរ ឃុំសំរោងក្នុង ស្រុកឯកភ្នំ ខេត្តបាត់ដំបង និងឈ្មោះ សុន មុំ ភេទស្រី អាយុ ២៧ឆ្នាំ ជនជាតិខ្មែរ បច្ចុប្បន្ន រស់នៅភូមិទួលត្បែង ឃុំឈើតុំ ស្រុកក្រគរ ខេត្តពោធិ៍សាត់ ។ ដកហូតនូវវត្ថុតាង និងសម្ភារៈរួមមាន ម្សៅក្រាមពណ៌សថ្លា សង្ស័យជាសារធាតុញៀនចំនួន ០៦កញ្ចប់ តូចចំនួន ០២កញ្ចប់ ធំចំនួន០២កញ្ចប់ និងធំចំនួន០២កញ្ចប់ អាវុធខ្លីចំនួន ០១ដើម មានលេខ 021311និងគ្រាប់ចំនួន០៣គ្រាប់ លុយចំនួន ១០៥០០០រៀល លុយបាតចំនួន ១២២០បាត និងចំនួន ២៣៥ដូល្លារអាមេរិច ទូរស័ព្ទ និងរថយន្តកាម៉ារីចង្កូតស្តាំ ១គ្រឿងផងដែរ ។
ជនសង្ស័យរួមទាំងវត្ថុតាងគ្រឿងញៀនរួមនិងសម្ភារៈ កម្លាំងសមត្ថកិច្ចបានបំពេញសំណុំឯកសារបញ្ជូនបន្តទៅការិយាល័យជំនាញ នៃស្នងការដ្ឋាននគរបាលខេត្តពោធិ៍សាត់ ៕ ដោយ៖កូឡាប
