មេដឹកនាំអាមេរិច និងចិន នៅថ្ងៃសៅរ៍នេះ បានព្រមព្រៀងគ្នាបន្តធ្វើការចរចាបញ្ហាពាណិជ្ជកម្ម ដែលវាទំនងជាធ្វើឲ្យសង្គ្រាមពាណិជ្ជកម្មរវាងប្រទេសមហាអំណាចទាំងពីរបានធូរស្រាលឡើងវិញ។
កិច្ចព្រមព្រៀងក្នុងការបកត្រឡប់ទៅរកការចរចាវិញ កើតឡើងក្នុងកំឡុងពេលជំនួបរវាងលោក ត្រាំ និងស៊ី នៅក្រៅកិច្ចប្រជុំកំពូល G20 នៅក្នុងទីក្រុងអូសាកា ប្រទេសជប៉ុន។
លោក ត្រាំ បញ្ជាក់ថា កិច្ចពិភាក្សារបស់លោក ជាមួយនឹងមេដឹកនាំចិនប្រព្រឹត្តទៅយ៉ាងល្អឥតខ្ជោះ។
សូមរម្លឹកថា មេដឹកនាំអាមេរិចធ្លាប់ព្រមានថានឹងធ្វើការយកពន្ធបន្ថែមទៀតលើទំនិញនាំចូលពីប្រទេសចិនដែលមានទំហំទឹកប្រាក់ ៣០០ពាន់លានដុល្លារ ក្រោយពេលបានដំឡើងពន្ធរហូតដល់ ២៥ភាគរយលើទំនិញចិន ដែលមានតម្លៃជាទឹកប្រាក់ ២០០ពាន់លានដុល្លារ។
ប្រទេសមហាអំណាចសេដ្ឋកិច្ចទាំងពីរបានធ្វើសង្គ្រាមពាណិជ្ជកម្មជាមួយគ្នាអស់រយៈពេលជាង ១ឆ្នាំទៅហើយ។
លោក ត្រាំ ធ្លាប់ចោទចិនថា បានលួចកម្មសិទ្ធិបញ្ញា និងបានបង្ខំក្រុមហ៊ុនអាមេរិចឲ្យធ្វើការចែករំលែកពត៌មានពាណិជ្ជកម្មសម្ងាត់ជាមួយខ្លួន ដើម្បីជាថ្នូរទៅនឹងការធ្វើជំនួញក្នុងប្រទេសចិន។
ចំណែកចិនវិញ បានបញ្ជាក់ថា ការទាមទាររបស់អាមេរិចដើម្បីឲ្យមានកំណែរទម្រងពាណិជ្ជកម្មគឺ
មិនសមហេតុផលទាល់តែសោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC