តាម Bangkok Post, ក្រុមប្រឹក្សាសន្តិភាព និងសណ្តាប់ធ្លាប់ជាតិថៃ (NCPO) កំពុងធ្វើការស៊ើបអង្កេតពិនិត្យមើលរូបភាពស្ត្រីម្នាក់ក្នុងរូបថត តើពិតជាអ្នកស្រីយីងឡាក់ ប្អូនស្រីបង្កើតរបស់លោកថាក់ស៊ីនមែនដែរឬទេ បន្ទាប់ពីរូបភាពនេះបានបែកធ្លាយពេញបណ្តាញសង្កមនៅយប់ថ្ងៃ ២៨/១២។
អ្នកនាំពាក្យរបស់ NCPO លោក Piyapong Klinpan ឲ្យដឹងថា សមត្ថកិច្ចរបស់ថៃកំពុងសហការគ្នាស៊ើបអង្កេតរឿងនេះ ប្រភពស្និទ្ធស្នាលអ្នកស្រីយីងឡាក់ ស្ត្រីក្នុងរូបថតនេះ មានលទ្ធភាពច្រើនណាស់គឺជាអតីតនាយករដ្ឋមន្ត្រី ប៉ុន្តែពុំប្រាកដពីពេលវេលាដែលបានថតនោះ ។ រូបថតដែលកំពុងចាត់ទុកថា ជាអ្នកស្រីយីងឡាក់ កំពុងស្ថិតនៅមជ្ឈមណ្ឌលពាណិជ្ជកម្មប្រទេអស់គ្លេស។
ប្រភពដដែលបញ្ជាប់ប្រាប់ថា ទោះបីរត់ភៀសខ្លួនទៅនៅប្រទេសក្រៅ តែអ្នកស្រីយីងឡាក់ កំពុងរស់នៅក្នុងជីវវភាពមួយធូរស្រាល ជាក់ស្តែងអ្នកស្រីយីងឡាក់ ធ្វើដំណើរតាមថ្នល់ពុំចាំបាច់លាក់កំបាំងខ្លួន គ្រាន់តែពេលខ្លះគេឃើញអ្នកស្រីពាក់វ៉ែនតាខ្មៅ។
ចំណែកអ្នកនាំពាក្យក្រសួងការបរទេសថៃ Busadee Santipitaks អះអាងថា ក្រសួងនេះពុំទទួលបានព័ត៌មានអ្វីពីស្ថានភាពបច្ចុប្បន្នរបស់អ្នកស្រីយីងឡាក់ឡើយ។
គួររំលឹកឡើងវិញថា អ្នកស្រីយីងឡាក់ គឺជានាយករដ្ឋមន្ត្រីស្រីដំបូងក្នុងប្រវត្តិសាស្ត្រថៃ។ អ្នកស្រីត្រូវបានចោទប្រកាន់ថា មានការធ្វេសប្រហែសក្នុងគោលនយោបាយថ្លៃស្រូវ ដែលនាំឲ្យរដ្ឋខាតបង់រាប់លានដុល្លារ ក្នុងពេលកាន់អំណាច។ ប៉ុន្មានថ្ងៃមុនពេលបើកសវនាការកាត់ទោសដែលនឹងប្រព្រឹត្តទៅនោះ អ្នកស្រីយីងឡាក់ បានរត់ភៀសខ្លួនទៅប្រទេសក្រៅ។ រដ្ឋាភិបាលថៃក៏បានពឹងពាក់ដល់ស្ថាប័ន Interpol ដើម្បីស្វែងរកអតីតនាយករដ្ឋមន្ត្រីស្រីរូបនេះ៕ សូយន
