ស្រុកស្រែអំបិល ៖ មានសេចក្តីរាយការណ៍មកថា ព្រះសង្ឃចំនួន៦អង្គដែលគង់លើរុឺម៉កម៉ូតូកង់បីនិមន្តបិណ្ឌបាត្រ បានរងរបួស ក្នុងនោះរបួសធ្ងន់ចំនួន៣អង្គ របួសមធ្យមនិងស្រាលចំនួន៣អង្គ ចំណែកបុរសអ្នកបើកបររុឺម៉កបានស្លាប់នៅនឹងកន្លែង ដោយគ្រោះថ្នាក់ចរាចររវាងរថយន្តបែនដឹកដី ពាក់ផ្លាកលេខ KPS 1168 ក្នុងទិសដៅពីភ្នំពេញឆ្ពោះទៅខេត្តព្រះសីហនុ បុកប៉ះជាមួយរុឺម៉កនៅផ្លូវជាតិ លេខ៤ គីឡូម៉ែត្រលេខ១៤៨-១៤៩ (ចំណែកផ្លូវខាងខេត្តកោះកុង) ក្នុងភូមិអូរជ្រៅឃុំបឹងព្រាវ ស្រុកស្រែអំបិល ខេត្តកោះកុងវេលាម៉ោងជិត៩ព្រឹកថ្ងៃ៣០ ខែមិថុនា ២០១៩នេះ ។
សមត្ថកិច្ចបានឲ្យដឹងថា មូលហេតុដែលបង្កឲ្យកើតមានឩបទ្វវហេតុគ្រោះថ្នាក់ខាងលើ គឺបណ្តាលមកពីម៉ូតូរុឺម៉កកង់បីគាំងប៉ាដាង ទើបធ្វើឲ្យរេចង្កូតចូលទៅខាងផ្លូវរថយន្តដឹកដី ម៉ាកនីសាន់ ពណ៌ស ចង្កូតស្តាំ ពាក់ស្លាកលេខចង្កូតស្តាំ KPS-1168 ដែលកំពុងបើកបរក្នុងទិសដៅបញ្ច្រាសទិសគ្នា បណ្តាលឲ្យបុកគ្នា និងធ្វើឲ្យអ្នកបើកបរម៉ូតូកង់បីឈ្មោះ ពេជ្រ ភេទប្រុស អាយុ២១ឆ្នាំ មានមុខរបរជាកូនសិស្សលោក រស់នៅភូមិមនោរម្យ ឃុំតាណៃ ស្រុកព្រៃនប់ ខេត្តព្រះសីហនុ ស្លាប់នៅនឹងកន្លែងភ្លាមៗ រួមទាំងអ្នករួមដំណើរជាព្រះសង្ឃចំនួន៥អង្គ ដែលគង់នៅវត្តមនោរម្យ បានរងរបួសធ្ងន់ ។
សមត្ថកិច្ចបន្តថា ក្រោយកើតហេតុ សមត្ថកិច្ចបានចុះទៅជួយអន្តរាគមន៍ បញ្ជូនជនរងគ្រោះ ទៅកាន់មន្ទីរពេទ្យបង្អែកស្រុកស្រែអំបិល និងប្រគល់សពជនរងគ្រោះដែលបានស្លាប់ ទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី ចំណែកវត្ថុតាងរថយន្ត និងម៉ូតូកង់បីត្រូវបានកម្លាំងនគរបាលប៉ុស្តិបឹងព្រាវ យកទៅរក្សាទុកនៅអធិការដ្ឋាននគរបាលស្រុកស្រែអំបិល រងចាំការដោះស្រាយ ។
សូមបញ្ជាក់ថា ចំពោះអ្នកបើកបររថយន្ត សមត្ថកិច្ចនៅពុំទាន់អាចបញ្ជាក់អត្តសញ្ញាណ បាននៅឡើយទេ ដោយសារតែបានរត់គេចខ្លួនបាត់ ហើយពេលនេះកម្លាំងសមត្ថកិច្ចកំពុងតាមស្វែងរក និងស្រាវជ្រាវ ចាប់ខ្លួន៕ ដោយ៖កូឡាប