ខេត្តកោះកុង៖ សមត្ថកិច្ចនគរបាលខេត្តកោះកុង បានឲ្យដឹងថា កាលពីវេលាម៉ោង ៩ព្រឹក នៅថ្ងៃទី១ ខែ កក្កដា ឆ្នាំ២០១៩នេះ អធិការដ្ឋាននគរបាលស្រុកមណ្ឌលសីមា បានទទួលព័ត៌មានពីប្រជាពលរដ្ឋរាយការណ៍មកថា បានឃើញសាកសពអណ្តែតទឹក មកទើរនៅចំណុចក្នុងព្រែកជើងគ្រក់ ស្ថិតក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា។
មន្ត្រីនគរបាលបន្តថា ក្រោយទទួលបានព័ត៌មានខាងលើនេះភ្លាម កម្លាំងជំនាញនគរបាល ក៏បានសហការជាមួយក្រុមគ្រូពេទ្យជំនាញ ចុះពិនិត្យសាកសព និងបានស្រាវជ្រាវ ទៅលើភិនភាគ ទើបដឹងថា ជនរងគ្រោះមានឈ្មោះ ហ៊ីម ជីន ហៅតាបុក ភេទប្រុស អាយុ ៧២ឆ្នាំ មុខរបរ នេសាទ រស់នៅតែម្នាក់ឯងក្នុងខ្ទម មានទីលំនៅភូមិនាងកុក ឃុំប៉ាក់ខ្លង ស្រុកមណ្ឌលសីមា។
សមត្ថកិច្ចនគរបាល បានឲ្យដឹងថា ក្រោយពីបានធ្វើកោសល្យវិច័យទៅលើសាកសពរួច កម្លាំងជំនាញនគរបាល និងក្រុមគ្រូពេទ្យខេត្ត កោះកុង បានសន្និដ្ឋានថា សាកសពស្លាប់ដោយសារខ្យល់គរ ហើយបានធ្លាក់ទឹកលង់ស្លាប់ ក្រោយចេញពីផ្ទះទៅនេសាទម្នាក់ឯង កាលពីថ្ងៃទី២៩ ខែមិថុនា ឆ្នាំ២០១៩។
សមត្ថកិច្ចនគរបាលខេត្តកោះកុង បានឲ្យដឹងថា បច្ចុប្បន្ននេះ សាកសពជនរងគ្រោះ បានប្រគល់ទៅឲ្យកូនចៅ របស់សពជនរងគ្រោះ យកទៅធ្វើបុណ្យតាមប្រពៃណីជាតិ៕ ដោយ៖ ដែន សីមា