ខេត្តស្វាយរៀងៈ កាលពីវេលាម៉ោង ២០និង១០នាទីយប់ ថ្ងៃទី៣០ ខែមិថុនា ឆ្នាំ២០១៩ នៅចំណុចផ្ទះជួល ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង កម្លាំងអធិការដ្ឋាននគរបាលក្រុងបាវិត សហការ រួមនឹងកម្លាំងប៉ុស្តិ៍នគរបាលរដ្ឋបាលបាវិត សហការ ជាមួយកម្លាំងជំនាញការិយាល័យប្រឆាំងគ្រឿងញៀនខេត្ត និងកម្លាំងវរសេនាតូច៦០៩ និង៦១១ បានធ្វើការស៊ើបអង្កេត ដោយប្រើវិធានញ៉ុះញ៉ង់ ឈានទៅបង្ក្រាបមុខសញ្ញា ជួញដូរគ្រឿងញៀន១លើក ឃាត់ខ្លួនជនសង្ស័យ ចំនួន២នាក់។
សមត្ថកិច្ចបានឱ្យដឹងថា ជនសង្ស័យ ទី១/ឈ្មោះ វិន ធីឡាង ភេទស្រី អាយុ៥៦ឆ្នាំ ជនជាតិវៀតណាម ស្រុកកំណើតភូមិធីវ៉ា ឃុំមីថាន់ ទីរួមខេត្តឡុងសៀង ប្រទេសវៀតណាម បច្ចុប្បន្នស្នាក់នៅផ្ទះជូល ភូមិបាវិតកណ្តាល សង្កាត់បាវិត ដកហូតវត្ថុតាង ម៉្សៅក្រាមពណ៌សថ្លា ( ប្រភេទមេតំហ្វេតាមីន) ចំនួន២កញ្ចប់ (ធំ១កញ្ចប់) ទម្ងន់២៧,២៣ក្រាម គិតទាំងសម្បកវេចខ្ចប់។ ទី២/ ឈ្មោះ រ័ត្ន ដែប ភេទស្រី អាយុ៣៧ឆ្នាំ ជនជាតិវៀតណាម មុខរបរ មេរ៉ូលិញកាស៊ីណូ រស់នៅភូមិបាវិតកណ្តាល សង្កាត់បាវិត ក្រុងបាវិត ដកហូតវត្ថុតាង ម្សៅក្រាមពណ៌សថ្លា ប្រភេទមេតំហ្វេតាមីន ចំនួន២២កញ្ចប់ធំ ទម្ងន់៤៥១,៩២ក្រាម គិតទាំងសម្បកវេចខ្ចប់។ សរុបវត្ថុតាង ដកហូតរួមមាន ម៉្សៅក្រាមពណ៌សថ្លា ជាថ្នាំញៀន ប្រភេទមេតំហ្វេតាមីនចំនួន ២៣កញ្ចប់ (ធំ២២កញ្ចប់) ទម្ងន់៤៧៩,១៥ក្រាម ។
បច្ចុប្បន្ន ជនសង្ស័យ ត្រូវបានឃាត់ខ្លួន និងធ្វើការសាកសួរ ចាត់ការតាមនីតិវិធី៕ ដោយ៖ វ៉ៃកូ