ស្វាយរៀង ៖ បុរសម្នាក់ជាមេបញ្ជាការរងកងរាជអាវុធហត្ថស្រុកចន្ទ្រា កំពុងជិះម៉ូតូ ស្រាប់តែឆ្កែរត់កាត់បុកម៉ូតូ បណ្តាលឲ្យដួលស្លាប់ភ្លាមៗនៅនឹងកន្លែង កាលពីវេលាម៉ោង១៤និង៥០នាទីរសៀលថ្ងៃទី១ ខែកក្កដា ឆ្នាំ ២០១៩ ស្ថិតតាមបណ្តោយផ្លូវជាតិលេខ១ ចន្លោះគីឡូម៉ែត្រ ១៤២-១៤៣ ក្នុងភូមិដើមពោធិ ឃុំ ស្វាយតាយាន ស្រុកកំពង់រោទ៌ ខេត្តស្វាយរៀង។
សមត្ថកិច្ចនគរបាលមូលដ្ឋាន បានឲ្យដឹងថា ជនរងគ្រោះមានឈ្មោះគង់ ឆែល អាយុ៥៣ឆ្នាំ ជា កងរាជអាវុធហត្ថខេត្ត មានឋានៈជាមេបញ្ជាការរង រស់នៅភូមិពោធិ ឃុំមេសថ្ងក ស្រុកចន្ទ្រា បើកបរម៉ូតូម៉ាក ហុងដាសេ១២៥ ស៊េរីឆ្នាំ២០១៦ ពណ៌ខ្មៅ ស្លាកលេខ ស្វាយរៀង ១H ៦៦៧០ បានគ្រោះថ្នាក់ចរាចរ បុកឆ្កែដួលស្លាប់នៅកន្លែងកើតហេតុចំណែកម៉ូតូខូចខាតស្រាល។ រីឯសាកសពបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី ។ ប្រភពបានឲ្យដឹងទៀតជនរងគ្រោះ បានឡើងមកប្រជុំនៅខេត្តស្វាយរៀង ហើយត្រឡប់ទៅស្រុកវិញ ក៏ជួបគ្រោះចរាចរស្លាប់បាត់បង់ជីវិត។
នៅមុនពេលកើតហេតុការណ៍នេះ កើតឡើងគេឃើញមានបុរសម្នាក់ ជិះម៉ូតូពីលិចទៅកើត លុះមកដល់ចំណុចកើតហេតុខាងលើ ស្រាប់តែមានសត្វឆ្កែ រត់កាត់ផ្លូវ បុកជាមួយម៉ូតូពេញទំហឹង បណ្តាលឲ្យបុរស ជាអ្នកបើកបរដួលបោកនឹងថ្នល់ប្រកាច់ស្លាប់ភ្លាមៗនៅនិងកន្លែង តែម្តង។
ចំពោះមធ្យោបាយយកមករក្សាទុក នៅអធិការដ្ឋាននគរបាលស្រុកស្វាយទាប៕ ដោយ៖កូឡាប