ខេត្តព្រះសីហនុ៖ សមាសភាពក្បាលម៉ាស៊ីនសភាពាណិជ្ជកម្មខេត្តព្រះសីហនុ ដឹកនាំ ដោយ លោកឧកញ៉ា វណ្ណ សុខហេង បានអញ្ជើញចូលជួបសម្ដែងការគួរសមជាមួយ លោក គួច ចំរើន អភិបាលខេត្តព្រះសីហនុ ដែលទើបទទួលដំណែងថ្មី នៅសាលប្រជុំសាលាខេត្តព្រះសីហនុ កាលពីរសៀលថ្ងៃទី១ ខែកក្កដា ឆ្នាំ២០១៩។
នាឱកាសនោះ លោក គួច ចំរើន ក្រៅពីបានស្វាគមន៍សមាសភាពថ្នាក់ដឹកនាំ សភាពាណិជ្ជកម្មខេត្តព្រះសីហនុ ដែលបានមកសួរសុខទុក្ខ និងអបអរសាទររូបលោក ដែលបានមកដឹកនាំរដ្ឋបាលខេត្តព្រះសីហនុ។
លោក គួច ចំរើន ក៏បានលើកឡើងពីផែនការដឹកនាំជាអទិភាព របស់លោក ដែលត្រៀមរៀបចំដោះស្រាយឆាប់ៗ នៅក្នុងមូលដ្ឋានក្រុង-ខេត្តព្រះសីហនុមានដូចជា៖ ត្រូវរៀបចំហេដ្ឋារចនាសម្ព័ន្ធ ផ្លូវ លូ និងបរិស្ថានជាដើម ជូនថ្នាក់ដឹកនាំសភាពាណិជ្ជកម្មខេត្តព្រះសីហនុ ឲ្យបានដឹង និងស្នើឲ្យចូលរួមគាំទ្រផងដែរ។
ត្រង់ចំណុចនេះ លោក គួច ចំរើន បញ្ជាក់ថា ជាជំហានដំបូងរូបលោកក្នុងនាមរដ្ឋបាលខេត្ត នឹងឲ្យក្រុមការងារបច្ចេកទេសចុះសិក្សាប្រព័ន្ធលូទឹកភ្លៀង និងលូទឹកកខ្វក់រួមមាន៖
ទី១- ចុះវាស់ប្រវែងលូ
ទី២- វាយតម្លៃ នៃការសាងសង់
ទី៣- សិក្សាប្រើរយៈពេល នៃការសាងសង់ និងទី៤- ដាក់ឲ្យមានការវិនិយោគប្រព័ន្ធលូទឹកកខ្វក់ និងលូទឹកភ្លៀង..។
លោក គួច ចំរើន ឲ្យដឹងដូច្នេះ រួចបន្ថែមថា រឿងមួយទៀត រូបលោក ក្នុងនាមរដ្ឋបាលខេត្ត ក៏មានគំរោងសាងសង់ផ្លូវមួយខ្សែ ចេញពីអាកាសយានដ្ឋានអន្តរជាតិខេត្តព្រះសីហនុ មានទីរាំងក្នុងឃុំរាម ឆ្លងកាត់តាមផ្លូវឆ្ពោះទៅវត្តអូរត្រេះ បន្តចូលមកមូលដ្ឋានក្រុងព្រះសីហនុ ដើម្បីជួយសម្រួលការធ្វើដំណើរ និងឈានទៅកាត់បន្ថយការកកស្ទះចរាចរណ៍នៅតាមផ្លូវជាតិលេខ៤។
បន្ថែមលើនេះ លោក គួច ចំរើន បញ្ជាក់ថា នៅថ្ងៃខាងលើនេះ រដ្ឋបាលខេត្តព្រះសីហនុ ក៏មានគម្រោងបង្វែរឲ្យរថយន្តដឹកទំនិញធុនធ្ងន់ ឬឡានដឹកទំនិញធំៗមាន រថយន្តកុងតឺន័រ និងរថយន្តដឹកទំនិញធ្ងន់ៗជាដើម ឱ្យបើកបរតាមផ្លូវ ស្ថិតក្នុងភូមិសាស្ដ្រ ទឹកដីស្រុកស្ទឹងហាវជំនួសវិញ ដើម្បីបញ្ចៀសចរាចរណ៍កកស្ទះជារៀងរាល់ថ្ងៃនេះ ឲ្យបានប្រសើរឡើងវិញ។
ឆ្លៀតឱកាសនោះដែរ លោក គួច ចំរើន ក៏បានស្នើឲ្យសភាពាណិជ្ជកម្ម ខេត្ត ចូលរួមសហការជាមួយរដ្ឋបាលខេត្តព្រះសីហនុ ឲ្យជួយពន្យល់ណែនាំដល់អ្នកវិនិយោគទុន ឬវិស័យដឹកជញ្ជូនក្រុមហ៊ុនឯកជនទាំងក្នុង និងក្រៅប្រទេសទាំងអស់ ដែលចូលមកវិនិយោគក្នុងខេត្តព្រះសីហនុ ឲ្យយល់ច្បាស់អំពីច្បាប់ របស់ព្រះរាជាណាចក្រកម្ពុជា ដើម្បីជួយដល់អ្នកវិនិយោគទុននានា ជាពិសេសអ្នកវិនិយោគទុនមកពីក្រៅប្រទេស មានភាពងាយស្រួលក្នុងការប្រកបអាជីវកម្ម លើជំនួញជួញដូរ របស់ពួកគេ៕ ដោយ ៖ ដែន សីមា