ភ្នំពេញ ៖ រាជរដ្ឋាភិបាលបានឯកភាពប្រគល់ជូនអាជ្ញាធរជាតិដោះស្រាយទំនាស់ដីធ្លីពិនិត្យដោះស្រាយ និងចាត់ចែងអនុវត្ត តបតាមពាក្យបណ្ដឹងរបស់ពលរដ្ឋ ប្ដឹងលោកញឹក ប៊ុនឆៃ ពាក់ព័ន្ធនឹងភាពមិនប្រក្រតីនៃការលក់ដី៣កន្លែងស្ថិតនៅឃុំនិមិត្ត ឃុំប៉ោយប៉ែត និងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ តាមរយៈការស្រាវជ្រាវរបស់លោកវិល្លាម ប្រធានគណបក្សខ្មែរក្រោក ។
យោងតាមឯកសារពីទីស្ដីការគណៈរដ្ឋមន្ត្រីលេខ៖៨៩១ សជណ បណ្ឌិតសភាចារ្យ ហ៊ីង ថូរ៉ាក់ស៊ី ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីបានជម្រាបជូនដល់ឯកឧត្តម ជាសុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានអាជ្ញាធរជាតិដោះស្រាយទំនាស់ដីធ្លី ឲ្យពិនិត្យ និងដោះស្រាយករណីខាងលើនេះជូនពលរដ្ឋ៕ ដោយ៖កូឡាប
