សៀមរាប៖ ឱសថក្លែងក្លាយ និងអន់គុណភាព គឺជាអាវុធលាក់មុខ ដែលអាចសម្លាប់មនុស្សដោយស្ងៀមស្ងាត់ និងធ្វើឲ្យប៉ះពាល់ដល់សេដ្ឋកិច្ចគ្រួសារ និងសង្គមជាតិយ៉ាងធ្ងន់ធ្ងរ។
នៅក្នុងកិច្ចប្រជុំស្តីពី ការពង្រឹងកិច្ចសហប្រតិបត្តិការថ្នាក់តំបន់ ក្នុងការប្រយុទ្ធប្រឆាំងនឹងឱសថក្លែងក្លាយ និងអន់គុណភាព នៅថ្ងៃទី១ ដល់ថ្ងៃទី២ ខែកក្កដា ឆ្នាំ២០១៩ នាខេត្ដសៀមរាប លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានថ្លែងថា ដើម្បីធានាគុណភាព សុវត្ថិភាព និងប្រសិទ្ធភាពរបស់ឱសថ អាជ្ញាធរឱសថប្រចាំប្រទេសជាសមាជិក អាស៊ានទាំងអស់ ចាំបាច់ត្រូវធ្វើការរួមគ្នា ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាព។ ដើម្បីពង្រឹងការឆ្លើយតបរួមគ្នាប្រឆាំង ការគំរាមកំហែង ពីឱសថក្លែងក្លាយ និងអន់គុណភាព នៅក្នុងតំបន់ និងដើម្បីឆ្លើយតបទៅនឹងគំនិតផ្តួចផ្តើមរបស់ សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដែលបានថ្លែង ក្នុងឱកាសបើកសន្និសីទថ្នាក់តំបន់ ស្តីពីការប្រយុទ្ធប្រឆាំងឱសថក្លែងក្លាយ និងអន់គុណភាព នាខែវិច្ឆិកា ឆ្នាំ២០១៨ នៅទីក្រុងភ្នំពេញ ដែលសម្តេចតេជោ បានសំណូមពរ ឱ្យប្រទេសសមាជិក នៃសមាគមប្រជាជាតិអាស៊ីអាគ្នេយ៍ (អាស៊ាន) ធ្វើការឲ្យកាន់តែសកម្ម ក្នុងការប្រយុទ្ធប្រឆាំងឱសថក្លែងក្លាយ និងអន់គុណភាពនេះ។
លោកស្រី រដ្ឋលេខាធិការ ក្រសួងសុខាភិបាល បានថ្លែងទៀតថា “ឱសថក្លែងក្លាយ និងអន់គុណភាព គឺជាអាវុធលាក់មុខ ដែលអាចសម្លាប់មនុស្ស ដោយស្ងៀមស្ងាត់ និងធ្វើឲ្យប៉ះពាល់សេដ្ឋកិច្ចគ្រួសារ និងសង្គមជាតិ យ៉ាងធ្ងន់ធ្ងរ។ ដូច្នេះ ដើម្បីធានាគុណភាព សុវត្ថិភាព និងប្រសិទ្ធភាព របស់ឱសថ អាជ្ញាធរឱសថប្រចាំប្រទេស ជាសមាជិកអាស៊ាន ទាំងអស់ ចាំបាច់ត្រូវធ្វើការរួមគ្នា ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាព”។
លោកស្រី បានថ្លែងបន្តថា ក្រសួងសុខាភិបាលកម្ពុជា ក្នុងនាមជាប្រធាន នៃកិច្ចប្រជុំឧត្តមមន្ត្រីសុខាភិបាលអាស៊ាន (SOMHD) បានសហការ ជាមួយអង្គការសុខភាពពិភពលោក (WHO) រៀបចំកិច្ចប្រជុំនេះឡើង ដើម្បីពិនិត្យមើលក្របខ័ណ្ឌច្បាប់ បទប្បញ្ញតិ្តនានា ដែលមានស្រាប់ នៅក្នុងប្រទេសសមាជិកអាស៊ាន ស្វែងរកយន្តការ រួមគ្នា បង្កើនសមត្ថភាពប្រតិបត្តិការ ប្រយុទ្ធប្រឆាំងនឹងឱសថក្លែងក្លាយ និងអន់គុណភាព និងពង្រឹងយន្តការ អភិបាលកិច្ច ដែលមានស្រាប់ ដើម្បីដោះស្រាយបញ្ហាស្មុគស្មាញនានា ដែលពាក់ព័ន្ធទៅនឹងគុណភាពឱសថ។
ការរៀបចំកិច្ចប្រជុំពិគ្រោះយោបល់នេះ ធ្វើឡើងក្នុងគោលបំណង ដើម្បីធ្វើផែនការសកម្មភាព រួមថ្នាក់តំបន់អាស៊ាន ជាមួយអង្គការសុខភាពពិភពលោក ស្តីពីការប្រយុទ្ធប្រឆាំងឱសថក្លែងក្លាយ និងអន់គុណភាព និងពិនិត្យចំណុចគោលសំខាន់ៗ ដើម្បីដាក់បញ្ចូល ទៅក្នុងសេចក្តីថ្លែងការណ៍រួម នៃកិច្ចប្រជុំថ្នាក់រដ្ឋមន្រ្តីសុខាភិបាល អាស៊ានលើកទី១៤ នៅខែសីហា ខាងមុខនេះ ដែលឯកលោកសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលកម្ពុជា ធ្វើជាប្រធាន នៃកិច្ចប្រជុំខាងមុខនេះ។ លទ្ធផល ដែលទទួលបាន ពីកិច្ចប្រជុំថ្នាក់រដ្ឋមន្រ្តីសុខាភិបាលអាស៊ាន លើកទី១៤ នឹងស្នើសុំដាក់បញ្ចូលទៅ ក្នុងកិច្ចប្រជុំកំពូលអាស៊ី-អឺរ៉ុប នៅឆ្នាំ២០២០ ខាងមុខ ដែលកម្ពុជា នឹងធ្វើជាម្ចាស់ផ្ទះ។
លោកស្រីវេជ្ជបណ្ឌិត ឱ វណ្ណឌីន បានស្នើសុំឱ្យគ្រប់ភាគីទាំងអស់ រួមគ្នាពង្រឹងបន្ថែម និងរិះរកយន្តការ ដ៏មានប្រសិទ្ធភាពថ្មីៗ ក្នុងទិសដៅប្រយុទ្ធប្រឆាំង ការគំរាមកំហែងឱសថក្លែងក្លាយ និងអន់គុណភាព នៅថ្នាក់តំបន់ទាំងមូល៕ ដោយ: កូឡាប