ភ្នំពេញ៖ មន្រ្តីជាន់ខ្ពស់ ក្រសួងទេសចរណ៍ បានលើកឡើងថា ដើម្បីជំរុញឱ្យអ្នកប្រកបអាជីវកម្មកាណូតទេសចរណ៍ ចូលបង់ពន្ធនាំចូលយានយន្តរបស់ពួកគេ ឱ្យដូចទៅនឹងអ្នកប្រកបអាជីវកម្មដទៃ អន្តរក្រសួង-ស្ថាប័ននឹងស្នើទៅរាជរដ្ឋាភិបាល ក្នុងការបង្កើតគណៈការអន្តរក្រសួងមួយ ឱ្យបានឆាប់នាពេលខាងមុខ ដើម្បីចុះដោះស្រាយបញ្ហាពន្ធ និងបញ្ហាប្រឈមមួយចំនួន។
ក្នុងកិច្ចប្រជុំអន្តរក្រសួង-ស្ថាប័នមួយ ដែលធ្វើឡើងនៅទីស្ដីការក្រសួងទេសចរណ៍ នាព្រឹកថ្ងៃទី១ ខែកក្កដា ឆ្នាំ២០១៩ លោក ជា បូរ៉ា រដ្ឋលេខាធិការក្រសួងទេសចរណ៍ និងជាប្រធានអង្គប្រជុំ បានលើកឡើង ពីបញ្ហាប្រឈមមួយចំនួន ពាក់ព័ន្ធនឹងការប្រកបអាជីវកម្មកាណូតទេសចរណ៍ ពិសេសនៅរាជធានីភ្នំពេញ និងខេត្តព្រះសីហនុ ដែលតម្រូវឱ្យអន្តរក្រសួង-ស្ថាប័នរួមគ្នា ដោះស្រាយឱ្យបាន ក្នុងនោះរួមមាន កាណូតទេសចរណ៍ដែលប្រកបអាជីវកម្ម គ្មានពន្ធនាំចូល និងលិខិតស្នាមត្រឹមត្រូវ។
កាណូតទេសចរណ៍ដែលប្រកបអាជីវកម្ម គ្មានសៀវភៅត្រួតពិនិត្យបច្ចេកទេស ដែលចេញដោយក្រសួង ឬមន្ទីរសាធារណការ និងដឹកជញ្ជូន។ កាណូតមួយចំនួនផលិត និងដំឡើងក្នុងស្រុក គ្មានស្ដង់ដារគុណភាព។
កាណូតទេសចរណ៍មួយចំនួន មិនគោរពតាមច្បាប់ចរាចរណ៍ផ្លូវទឹក និងដឹកលើសកម្រិត ព្រមទាំងគ្មានអាជ្ញាប័ណ្ណ។ កំពង់ផែចំណត គ្មានគ្រប់តម្រូវការសម្រាប់កាណូតទេសចរណ៍ និងមិនគ្រប់ បំពេញតាមតម្រូវការស្ដង់ដារសុវត្ថិភាព ជាហេតុធ្វើឱ្យកាណូតចត ដោយគ្មានសណ្ដាប់ធ្នាប់ និងពិបាកគ្រប់គ្រង។
សមាសភាពដែលនឹង ចូលរួមជាមួយ គណៈកម្មការអន្តរក្រសួងនេះ រួមមាន ក្រសួងទេសចរណ៍ ក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារ អគ្គស្នងការនគរបាលជាតិ អគ្គនាយកដ្ឋានគយ និងរដ្ឋាករកម្ពុជា និងមន្ទីរអង្គភាពពាក់ព័ន្ធមួយចំនួនទៀត។
តាមការបញ្ជាក់ពីផ្នែកជំនាញ បច្ចុប្បន្ន មានកាណូតទេសចរណ៍ នៅទូទាំងប្រទេស ១២៤គ្រឿង (រាជធានីភ្នំពេញ និងខេត្តព្រះសីហនុ) ក្នុងនោះ គ្មានអាជ្ញាប័ណ្ណប្រកបអាជីវកម្ម ១៦គ្រឿង និងមានអាជ្ញាប័ណ្ណបណ្ដោះអាសន្នចំនួន ៣៥គ្រឿង ប៉ុន្តែកាណូតទេសចរណ៍ទាំងនោះ សុទ្ធតែមិនទាន់បានបង់ពន្ធនៅឡើយទេ។ អាជ្ញាប័ណ្ណបណ្ដោះអាសន្ន គឺផ្ដល់ឱ្យអាជីវកម្មដែល មិនទាន់មានឯកសារ ស្របច្បាប់គ្រប់គ្រាន់ ដោយទុករយៈពេលតែ៩០ថ្ងៃទេ តែបើនៅតែមិនទាន់ មានឯកសារគ្រប់គ្រាន់ទៀត ក្រសួងមិនបន្តសុពលភាព ឱ្យទៀតឡើយ។
លោកជា បូរ៉ា បានលើកឡើងថា លើកនេះ នឹងមានការឹតបន្ដឹង ធ្វើយ៉ាងណា ឱ្យអាជីវករ ទាំងនោះ ត្រូវតែមកបង់ពន្ធនាំចូលយានយន្តរបស់ខ្លួន ពីព្រោះកន្លងមក មានការសម្របសម្រួល ទន់ភ្លន់ច្រើនលើកហើយ តែអាជីវករ នៅតែមិនព្រមអនុវត្តន៍តាមច្បាប់។
ចំពោះអាជីវកម្មកាណូតទេសចរណ៍ ដែលចង់បង្កើតថ្មី ឬអាជីវករចាស់ ដែលចង់ពង្រីកអាជីវកម្មរបស់ខ្លួន ត្រូវតែមានឯកសារបង់ពន្ធត្រឹមត្រូវ ពីស្ថាប័នគយ និងពន្ធដារ និងត្រូវមានលិខិតត្រួតពិនិត្យបច្ចេកទេស យានយន្ត ពីក្រសួងសាធារណការ ទើបក្រសួងទេសចរណ៍ ផ្ដល់ជូនអាជ្ញាប័ណ្ណទេសចរណ៍ និងលិខិតវាយតម្លៃស្ដង់ដារ សេវាកម្មទេសចរណ៍ ដែលមានន័យថា អនុញ្ញាត ឱ្យអាជីវករប្រកបអាជីវកម្មរបស់ខ្លួនបាន៕ ដោយ៖កូឡាប