ប្រធានាធិបតីអាមេរិច នៅថ្ងៃចន្ទម្សិលមិញនេះ បានធ្វើការព្រមានថា ប្រទេសអ៊ីរ៉ង់ កំពុងប្រឡែងលេងជាមួយនឹងភ្លើងហើយ។ ការព្រមាននេះ កើតឡើងក្រោយពេលអ៊ីរ៉ង់ ប្រកាសថាខ្លួន បានបង្កើនការផលិត និងស្តុកសារធាតុអ៊ុយរ៉ាញ៉ូម លើសចំនួនកំណត់ ក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ដែលអាមេរិចប្រកាសដកខ្លួនចេញ។
ជុំវិញបញ្ហានេះ ប្រទេសអ៊ីស្រាអ៊ែល បានជំរុញឲ្យរដ្ឋសមាជិកអឺរ៉ុប ដាក់ទណ្ឌកម្មលើអ៊ីរ៉ង់ ខណៈដែលរុស្ស៊ី បានសម្តែងការសោកស្តាយ ប៉ុន្តែបាននិយាយថា សកម្មភាពអ៊ីរ៉ង់ គឺកើតឡើងដោយសារតែការដាក់ សម្ពាធរបស់អាមេរិចដែលបានរុញច្រាន កិច្ចព្រមព្រៀងនុយក្លេអ៊ែរឲ្យដួលរលំ។
ប្រទេសអង់គ្លេស បានស្នើឲ្យក្រុងតេហេរ៉ង់ កុំឲ្យធ្វើអ្វីចាកឆ្ងាយពីកិច្ចព្រមព្រៀង ចំណែកអង្គការសហប្រជាជាតិ បាននិយាយថា អ៊ីរ៉ង់ ត្រូវតែអនុវត្តការប្តេជ្ញាចិត្តរបស់ខ្លួនក្រោមកិច្ចព្រមព្រៀង។
រដ្ឋមន្រ្តីការបរទេសអ៊ីរ៉ង់ បានថ្លែងប្រាប់សារព័ត៌មាន ISNA ដូច្នេះថា “អ៊ីរ៉ង់ បានផលិតលើសចំនួន ៣០០គីឡូក្រាម”។
ចំណែកលោកដូណាល់ ត្រាំ បានប្រាប់អ្នកសារព័ត៌មាន នៅសេតវិមាន ដូច្នេះថា “ពួកគេដឹងថា ពួកគេកំពុងធ្វើអ្វី។ ពួកគេដឹងថា ពួកគេកំពុងលេងជាមួយអ្វី ហើយខ្ញុំគិតថា ពួកគេកំពុងលេងជាមួយភ្លើង”។
សូមរំលឹកថា អាមេរិច បានដកខ្លួនចេញពីកិច្ចព្រមព្រៀងនុយក្លេអ៊ែរ ជាមួយអ៊ីរ៉ង់ កាលពីឆ្នាំមុន និងបានដាក់ទណ្ឌកម្មលើអ៊ីរ៉ង់ មិនឲ្យនាំប្រេងចេញ និងការជួញដូរហិរញ្ញវត្ថុ ព្រមទាំងទណ្ឌកម្មលើវិស័យផ្សេងៗទៀត។
អ៊ីរ៉ង់គំរាមបោះបង់ចោល ការប្តេជ្ញាចិត្តរបស់ខ្លួនបន្ថែមទៀត ក្រោមកិច្ចព្រមព្រៀងនុយក្លេអ៊ែរ ប្រសិនជារដ្ឋនៅសល់ក្នុងកិច្ចព្រមព្រៀង មានដូចជា ចិន អង់គ្លេស បារាំង អាឡឺម៉ង និងរុស្ស៊ី មិនជួយខ្លួនឲ្យគេចផុតពីទណ្ឌកម្ម ជាពិសេសការលក់ប្រេង។ ប្រភព៖ Channelnewsasia៕ អត្ថបទប្រែសម្រួលដោយ៖ សុភ័ក្រ