ភ្នំពេញ ៖ អគ្គិភ័យដែលឆាបឆេះឃ្លាំងស្តុកអាវជជុះ និងផ្ទះប្រជាពលរដ្ឋ នៅកាលពីវេលាម៉ោងជាង ១យប់រំលងអធ្រាត្រ ថ្ងៃទី២ ខែកក្កដា ឆ្នាំ២០១៩នេះ នៅតាមបណ្តោយផ្លូវ១៧៣ ស្ថិតក្នុងសង្កាត់អូឡាំពិក ខណ្ឌបឹងកេងកង រាជធានីភ្នំពេញ បានបំផ្លាញទ្រព្យសម្បត្តិអស់ជាច្រើន ហើយមកទល់នឹងម៉ោង១១ព្រឹកនេះ អគ្គិភ័យខាងលើ នៅមិនទាន់រលត់ទាំងស្រុងនៅឡើយទេ។
កម្លាំងអាជ្ញាធរ និងសមត្ថកិច្ច ខណ្ឌចំការមន និងខណ្ឌបឹងកេងកង កំពុងបន្តការអន្តរាគមន៍ដោយយកអេស្កាវាទ័រ មកកាយគំនរខោអាវជជុះនោះចេញមក ខណៈដែលផ្ទះថ្មកំម្ពស់៣ជាន់នោះ ត្រូវភ្លើងឆេះយូរម៉ោងហើយ អាចនឹងប្រឈមនឹងការបាក់ស្រុត។
ពាក់ព័ន្ធនិងគ្រោះអគ្គិភ័យខាងលើនេះ ជំហ៊ានដំបូងសន្និដ្ឋានបណ្តាលមកពី ផ្ទុះធុងហ្គាស ទើបបង្កឲ្យឆាបឆេះបែបនេះ តែយ៉ាងណាមិញ លោកវរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យ រាជធានីភ្នំពេញ មិនទាន់អាចសន្ឋិដ្ឋានបាននៅឡើយ។
ក្នុងប្រតិបត្តិការបង្កាគ្រោះអគ្គិភ័យខាងលើនេះផងដែរ កម្លាំងសមត្ថកិច្ច និងក្រុមពន្លត់អគ្គិភ័យ ពិបាកអន្តរាគមន៍ ដោយសារច្រកចូលតូចចង្អៀតពេក មិនត្រឹមតែប៉ុណ្ណោះ ឃ្លាំងខាងលើ ពោរពេញទៅដោយដុំខោអាវជជុះជាច្រើនផងដែរ រហូតមកទល់ម៉ោង១១ព្រឹកនេះ ភ្លើងមិនទាន់អាចគ្រប់គ្រងបាននៅឡើយទេ ខណៈដែលកម្លាំងការិយាល័យបង្ការ និងពន្លត់អគ្គិភ័យរាជធានីភ្នំពេញ កំពុងប្រមូលកម្លាំងបន្ថែម ដើម្បីចេញជួយអន្តរាគមន៍៕ដោយ:កូឡាប
