កណ្តាល៖ កម្លាំងនគរបាលប្រឆាំង បទល្មើសសេដ្ឋកិច្ច នៃស្នងការនគរបាលខេត្តកណ្ដាល បានចុះបង្ក្រាប ទីតាំងកែច្នៃ ដំឡើង រថយន្តចង្កូតស្តាំ ដែលបើកប្រកបអាជីវកម្ម ដោយគ្មានច្បាប់អនុញ្ញាត នៅស្រុកអង្គស្នួល។ ហេតុការណ៍ ចុះបង្ក្រាបនេះ កាលពីថ្ងៃទី១ ខែកក្កដា ឆ្នាំ២០១៩ ស្ថិតនៅក្នុងភូមិដំណាក់កកោះ ឃុំសំរោងលើ ស្រុកអង្គស្នួល ខេត្តកណ្ដាល ។
ប្រតិបត្តិការធ្វើឡើង ដោយមានការបញ្ជារបស់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល និងមាន ការសម្របសម្រួល នីតិវិធី ដោយ លោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ដោយក្នុងឱកាសនោះ សមត្ថកិច្ចរកឃើញរថយន្ត ម៉ាក NISSAN DiESAlL ចំនួន ៦ គ្រឿង ទម្ងន់ ៥ តោន ជាប្រភេទរថយន្តចង្កូតស្ដាំ និងគ្មានពន្ធនាំចូលនោះទេ ។
លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានឲ្យដឹងថា នៅថ្ងៃទី ១ ខែកក្កដា ឆ្នាំ២០១៩ វេលាម៉ោង ១១ និង ៥ នាទី ការិយាល័យនគរបាលប្រឆាំងបទល្មើសសេដ្ឋកិច្ចខេត្តកណ្ដាល បានសហការជាមួយកម្លាំងសាខាគយ និងរដ្ឋាករខេត្តកណ្ដាល កម្លាំងអធិការដ្ឋាននគរបាលស្រុកអង្គស្នួល ប៉ុស្តិ៍នគរបាលរដ្ឋបាល និងអាជ្ញាធរមូលដ្ឋាន ភូមិ ឃុំ ដោយមានការសម្របសម្រួល នីតិវិធី ដោយលោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល បានចុះមកដល់ទីតាំងកែច្នៃ ដំឡើងរថយន្ត គ្មានច្បាប់ ប្រភេទរថយន្តចង្កូតស្ដាំគ្មានពន្ធ ស្ថិតនៅក្នុងភូមិដំណាក់កកោះ ឃុំសំរោងលើ ស្រុកអង្គស្នួល ខេត្តកណ្ដាល ។
ម្ចាស់ទីតាំងរថយន្តកែច្នៃ មានឈ្មោះ សុខ បញ្ញា ភេទប្រុស អាយុ ២១ឆ្នាំ ទីលំនៅបច្ចុប្បន្ន ផ្ទះជួលភូមិដំណាក់កកោះ ឃុំសំរោងលើ ស្រុកអង្គស្នួល ខេត្តកណ្ដាល ដោយដកហូតវត្ថុតាង រួមមាន រកឃើញរថយន្ត ម៉ាក NISSAN DiESAlL ចំនួន ៦ គ្រឿង ទម្ងន់ ៥ តោន រថយន្តចង្កូតស្ដាំ គ្មានពន្ធ ក្នុងនោះ មានពណ៌ទឹកប្រាក់ ចំនួន ២ គ្រឿង និងពណ៌សចំនួន ៤ គ្រឿង ដំឡើងទ្រុងរួច ចំនួន៣គ្រឿង និង មិនទាន់ដំឡើងទ្រុង ចំនួន ៣ គ្រឿង ។ ចំពោះរថយន្តទាំង៦គ្រឿងនេះ គឺជាប្រភេទរថយន្តដឹកធម្មតា កែច្នៃទៅជារថយន្តបែន សម្រាប់ដឹកដី ហើយមានម្ចាស់រាងរៀងខ្លួន ។ ចំពោះ វត្ថុតាងរថយន្តទាំង៦គ្រឿង ក្រុមចម្រុះសម្រេចរក្សាទុកនៅកន្លែងកើតហេតុ បណ្ដោះអាសន្ន រង់ចាំការអនុវត្តនីតិវិធីបន្តទៀត ដោយបានឲ្យកម្លាំងអធិការដ្ឋាននគរបាលស្រុកអង្គស្នួល ជា អ្នកមើលថែរក្សាវត្ថុតាងទាំងនេះ មិនឲ្យបាត់បង់ ៕ដោយ៖បញ្ញាស័ក្តិ
