តាកែវ៖ អាជ្ញាធរក្រុងដូនកែវអំពាវអោយបងប្អូនប្រជាពលរដ្ឋចូលរួមទាំងអស់គ្នា ដើម្បីសោភ័ណភាពទីក្រុង ជាពិសេសបងប្អូនអាជីវកដែលដាក់លក់ដូរនៅជុំវិញផ្សារតាកែវ ត្រូវតាំងសម្ភារៈលក់ដូររបស់ខ្លួននៅត្រឹមគំនូសសញ្ញាដែលបានកំណត់ដោយអាជ្ញាធរ ដើម្បីអោយនៅជុំវិញផ្សារតាកែវរបស់យើងមានផ្លូវទូលាយ សម្រួលដល់ការធ្វើដំណើររបស់ប្រជាពលរដ្ឋ និងអ្នកទិញ ។
ការអំពាវនាវរបស់អាជ្ញាធរនេះដែរ គឺក្នុងពេលដែលលោក ស្រី ដា អភិបាលរងក្រុងដូនកែវ បានដឹកនាំកំលាំងចំរុះ ចុះអនុវត្តលើការងាររៀបចំសណ្តាប់ធ្នាប់ជុំវិញផ្សារតាកែវ អោយមានសោភ័ណភាព និងមានផ្លូវទូលាយសម្រួលដល់ការធ្វើដំណើររបស់បងប្អូនប្រជាពលរដ្ឋ នាព្រឹកថ្ងៃទី ០២ ខែកក្កដា ឆ្នាំ២០១៩ នេះ ។
លោក ស្រី ដា អភិបាលរងក្រុងដូនកែវ បានប្រាប់អោយអ្នកសារពត័មានដឹងថា មុននិងធ្វើការចុះអនុវត្តលើការរុះរើ និងលើកយកសំភារៈមួយចំនួន របស់អ្នកលក់ដូរ និងការចតម៉ូតូចោលគ្មានសណ្តាប់ធ្នាប់នេះ គឺធ្វើឡើងទៅបាន បន្ទាប់ពីអជ្ញាធរក្រុងបានធ្វើការផ្សព្វផ្សាយ និងជូនដំណឹងដល់បងប្អូនជាអាជីវករលក់ដូរ និងទីតាំងផ្ញើម៉ូតូនៅជុំវិញផ្សារតាកែវ ជាច្រើនលើកច្រើនសារមកហើយ ក៏ប៉ុន្តែមានអាជីវករមួយចំនួនតូច នៅតែមិនបានស្តាប់ និងគោរពទៅតាមគោលការផ្សព្វផ្សាយរបស់អាជ្ញាធរឡើយ ទើបរូបលោករួមជាមួយកំលាំងចំរុះ រួមមានអាជ្ញាធរភូមិ សង្កាត់ អង្គភាពនគរបាលក្រុង កងកំលាំងអាវុធហត្ថក្រុង និងកំលាំងសន្តិសុខរៀបចំសណ្តាប់ធ្នាប់ក្រុង បានចុះរើ និងតម្រឹមទីតាំងលក់អោយសមស្របទៅតាមការកំណត់តែម្តង ។
បើតាមការអោយដឹងពីលោក កង អាណាន់ អភិបាលក្រុងដូនកែវ បានបញ្ជាក់ថា នេះជាតំណាក់កាលទី ០១ ក្នុងការរៀបចំសណ្តាប់ធ្នាប់នៅជុំវិញផ្សារតាកែវ ហើយលោកនិងបន្តអនុវត្តការងារនេះជាប្រចាំ ដើម្បីសោភ័ណភាពនៅក្នុងទីក្រុងដូនកែវ ។ ហើយចំពោះការរៀបចំសណ្តាប់ធ្នាប់នៃការលក់ដូរនៅផ្នែកខាងក្នុងផ្សារ គឺនិងបន្តនៅពេលខាងមុខ ដោយគ្រោងក្នុងការអនុវត្តលើការស្តារប្រព័ន្ធលូរ នៅក្នុងផ្សារបញ្ជៀសការជនលិចទឹកនៅក្នុងរដូវខែភ្លៀងធ្លាក់ និងតម្រូវអោយម្ចាស់តូបលក់ដូរមួយចំនួន ដែលបានធ្វើការចាក់សាបស៊ីម៉ុង បិទលើគម្របលូរនោះ ត្រូវរុះរើឡើងវិញ ដើម្បីសម្រួលដល់ការស្តារប្រព័ន្ធលូរបញ្ចៀសការជនលិចផ្សារ ៕ ដោយ ៖តាកែវ
