តាកែវ៖ លោក អ៊ូច ភា អភិបាលនៃគណៈអភិបាលខេត្ត និងជាប្រធានកិត្តិយស សាខាកាកបាទក្រហមខេត្តតាកែវ លោកស្រី នូ សុវណ្ណនី ប្រធានសាខាកាកបាទក្រហមខេត្ត រួមជាមួយសប្បុរសជន នាព្រឹកថ្ងៃទី២ ខែ កក្កដា ឆ្នាំ២០១៩ បានអញ្ជើញចុះចែកអំណោយមនុស្សធម៌ របស់សាខាកាកបាទក្រហមខេត្ត ជូនគ្រួសារប្រជាពលរដ្ឋ ដែលរងគ្រោះដោយខ្យល់កន្រ្តាក់ ចំនួន៤១គ្រួសារ នៅស្រុកបូរីជលសារ ខេត្តតាកែវ ។
នៅក្នុងឱកាសចុះចែកអំណោយមនុស្សធម៌ របស់កាកបាទក្រហម លោកប្រធានកិត្តិយសសាខាកាកបាទក្រហម បានមានប្រសាសន៍ថា ទីណាមានទុក្ខលំបាក និងមានគ្រោះមហន្តរាយនានា ទីនោះតែងតែមានមន្រ្តីគ្រប់លំដាប់ថ្នាក់ និងមន្រ្តីកាកបាទក្រហម ចុះទៅដល់ភ្លាមៗ ពោលគឺកាកបាទក្រហមកម្ពុជា នឹងនៅជិតប្រជាពលរដ្ឋ ចុះជួយបងប្អូនគ្រប់ពេលវេលា គ្រប់ទីកន្លែង ដោយមិនទុកឲ្យនរណាម្នាក់ស្លាប់ ដោយសារតែអត់អាហារ ដែលយើងមិនបានដឹងនោះឡើយ ។
លោក អ៊ូច ភា បានបន្ថែមទៀតថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តែងតែណែនាំដល់មន្រ្តីកាកបាទក្រហម ពិសេសក្រុមយុវជនកាកបាទក្រហម ឲ្យចុះជួយបងប្អូនប្រជាពលរដ្ឋណា ដែលមានទុក្ខលំបាកលើបញ្ហាជីវភាព ជួបគ្រោះធម្មជាតិនានា ជនចាស់ជរាគ្មានទីពឹង ស្រ្តីមេម៉ាយទីទ័លក្រជាដើម ជាពិសេស គឺឧស្សាហ៍ចុះសាកសួរសុខទុក្ខបងប្អូន ប្រជាពលរដ្ឋឲ្យដល់ខ្នងផ្ទះ ។
ជាមួយគ្នានេះដែរ លោក អ៊ូច ភា ក៏បានធ្វើការផ្តាំផ្ញើទៅដល់បងប្អូន ប្រជាពលរដ្ឋទាំងអស់ ត្រូវប្រកាន់ភ្ជាប់នូវអនាម័យល្អ ហូបស្អាត ផឹកស្អាត និងរស់នៅស្អាត ព្រោះបើកាលណាបងប្អូន ប្រកាន់យករបៀបរស់នៅស្អាត និងមានអនាម័យល្អ ពិសេសគឺត្រូវប្រុងប្រយ័ត្ន ចំពោះគ្រោះធម្មជាតិផ្សេងៗ ដែលកើតមានឡើង ដោយកត្តាប្រែប្រួលអាកាសធាតុ ។
អំណោយដែលបានផ្តល់ជូនរួមមាន ៖ អង្ករ ២៥គីឡូក្រាម មី ១កេស កន្ទេល១ មុង១ ភួយ១ សារុង១ ក្រមា១ អាវយឺត និងថវិកាចំនួន ហើយដោយឡែក ចំពោះគ្រួសារ ដែលរងគ្រោះធ្ងន់ ទទួលថវិកាពីលោកឧបនាយករដ្ឋមន្រ្តី ប៊ិន ឈិន ប្រធានក្រុមការងារថ្នាក់ជាតិ ចុះជួយខេត្តតាកែវ ចំនួន៥០ម៉ឺនរៀលផងដែរ ៕ ដោយ៖ តាកែវ
