ភ្នំពេញ៖ តំណាងអយ្យការអមសាលាដំបូងរាជធានីភ្នំពេញ បានចេញដីកាកោះហៅលោកវេជ្ជបណ្ឌិត សរ ច័ន្ទចិត្រា ដែលបម្រើការងារនៅមន្ទីរពេទ្យកុមារជាតិ ឲ្យចូលបំភ្លឺនៅតុលាការក្រុងភ្នំពេញ ក្រោយពីមានបណ្តឹងរបស់ឪពុកម្តាយកុមារម្នាក់ ដែលបានស្លាប់ ។
បើតាមដីកាកោះ ចុះថ្ងៃទី០១ ខែកក្កដា ឆ្នាំ២០១៩ បានបង្គាប់ឲ្យលោកវេជ្ជបណ្ឌិត សរ ច័ន្ទចិត្រា ចូលខ្លួនបំភ្លឺនៅព្រឹកថ្ងៃទី១៧ ខែកក្កដា ឆ្នាំ២០១៩ ពាក់ព័ន្ធបណ្តឹងរបស់ឈ្មោះ ហៃ ឡុង និងឈ្មោះ ចោម ស្រីពៅ ជាអាណាព្យាបាលកុមាររងគ្រោះ។ តំណាងអយ្យការចោទប្រកាន់លោកវេជ្ជបណ្ឌិតរូបនេះ ពីបទធ្វេសប្រហែសបណ្តាលកុមារម្នាក់ស្លាប់។
គួររំលឹកថា កាលពីទី១៨ ខែមិថុនា ឆ្នាំ២១៩ ឪពុកម្តាយរបស់កុមាររងគ្រោះ បានដាក់ពាក្យប្តឹង ប្រធានមន្ទីរពេទ្យ កុមារជាតិ និងវេជ្ជបណ្ឌិតម្នាក់ឈ្មោះ សរ ច័ន្ទចិត្រា ទៅតុលាការ ពីបទ ធ្វេសប្រហែសឲ្យកុមារស្លាប់។
យោងតាមពាក្យបណ្តឹងចុះថ្ងៃទី១៨ ខែមិថុនា ឆ្នាំ២០១៩ មានឈ្មោះ ហៃ ឡុង ជាឪពុក និងឈ្មោះ ចោម ស្រីពៅ ជាម្តាយ របស់កុមារឈ្មោះ ឡុង ឌីណា ភេទប្រុស អាយុ ១៦ខែ បានរៀបរាប់ថា កាលពីព្រឹកថ្ងៃទី១៤ ខែ មិថុនា ឆ្នាំ២០១៩ ពួកគាត់ បានយកកូនប្រុស ដែលក្តៅខ្លួន ទៅព្យាបាលនៅមន្ទីរពេទ្យកុមារជាតិ។ នៅម៉ោង១រសៀលថ្ងៃដដែល គ្រូពេទ្យបានចាក់ថ្នាំ និងព្យួរសេរ៉ូម ឲ្យកូនប្រុសពួកគាត់ ព្រោះក្រោយពិនិត្យឈាមទៅឃើញថា ជាជំងឺគ្រុនឈាមកម្រិតស្រាល។ ស្រាប់តែដល់ម៉ោង ៥ និង៥៥ នាទីព្រឹកថ្ងៃទី១៥ ខែមិថុនា ឆ្នាំ២០១៩ កូនប្រុសពួកគាត់បានស្លាប់ ។
ក្រោយពីកូនប្រុសរបស់ពួកគាត់ស្លាប់ ស្រាប់តែលោកវេជ្ជបណ្ឌិត សរ ច័ន្ទចិត្រា និងគ្រូពេទ្យចំនួន ៤នាក់ទៀត មកសម្រួល និងសន្យាថា មន្ទីរពេទ្យនឹងដោះស្រាយ ដូច្នេះទើបពួកគាត់ព្រមយកកូនទៅធ្វើបុណ្យនៅ ស្រុកកំណើ ត ខេត្តព្រៃវែង ។ ពាក់ព័ន្ធករណីនេះ លោកវេជ្ជបណ្ឌិត ញឹប អង្គាបុស្ស ប្រធានមន្ទីរពេទ្យកុមារជាតិ ធ្លាប់បានប្រាប់នៅរសៀលថ្ងៃទី២១ ខែមិថុនា ឆ្នាំ២០១៩នេះថា បន្ទាប់ពីយកឈាមទៅពិនិត្យគ្រូពេទ្យរកឃើញថា កុមារឈ្មោះ ឡុង ឌីណា បានស្លាប់ដោយសារមានជំងឺ EV71 និងជំងឺពងបែកលើខ្លួនប្រាណ ដែលជាប្រភេទជំងឺអាចបណ្តាលឲ្យកុមារក្រោមអាយុ ២ឆ្នាំងាយនឹងស្លាប់ ជាងមនុស្សពេញវ័យ។
លោកវេជ្ជបណ្ឌិត បានបន្តថា ក្រោយពីអ្នកជំងឺចូលមកសម្រាកនៅមន្ទីរពេទ្យ ក្រុមគ្រូពេទ្យបានខិតខំជួយសង្គ្រោះយ៉ាងយកចិត្តទុកដាក់ ប៉ុន្តែជាអកុសលមិនអាចជួយបាន ។ ប្រធានមន្ទីរពេទ្យ បានអះអាងថា មន្ទីរពេទ្យ និងគ្រូពេទ្យមិនចង់ឲ្យអ្នកជំងឺស្លាប់នោះទេ និងព្យាយាមពន្យល់ឪពុកម្តាយអ្នកជំងឺដែរ ប៉ុន្តែពួកគាត់នៅតែមិនយល់ និងទាមទារសំណងពីមន្ទីរពេទ្យ ចំនួន ៣២០០០ ដុល្លារ ។ដោយសារតែអាណិតកុមារដែលស្លាប់ ក្រុមគ្រូពេទ្យបានចូលបុណ្យ សព ចំនួន ៣លានរៀល ប៉ុន្តែអាព្យាបាលមិនព្រមទទួល៕ ដោយ៖កូឡាប
