ភ្នំពេញ ៖ លោករដ្ឋមន្ត្រីកសិកម្ម បានកោតសរសើរ ចំពោះឆន្ទ:បន្តធ្វើការវិនិយោគ របស់សម្ព័ន្ធកៅស៊ូវៀតណាម បើទោះបីស្ថិតក្នុងស្ថានភាពទីផ្សារជ័រមិនអំណោយផលផ្នែកតម្លៃ តែសម្ព័ន្ធ នៅតែបន្តអនុវត្តគម្រោងវិនិយោគ រហូតប្រមូលផលបានជាង ៥០% និងបានយកចិត្តទុកដាក់ទទួលខុសត្រូវ លើកាតព្វកិច្ចបង់ពន្ធជូនរដ្ឋបានទាន់ពេលវេលា។
នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃអង្គារ ១កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០២ ខែកក្កដា ឆ្នាំ២០១៩ លោករដ្ឋមន្ត្រី វេង សាខុន បានទទួលជួបលោក ជិន ង៉ុកធួក ប្រធានក្រុមប្រឹក្សាភិបាលនៃសម្ព័ន្ធកៅស៊ូវៀតណាម VRG និងសហការី ដែលជាតំណាងក្រុមហ៊ុនវិនិយោគដំណាំកៅស៊ូនៅកម្ពុជា។
តំណាងសម្ព័ន្ធកៅស៊ូវៀតណាម បានរាយការណ៍ជូនលោករដ្ឋមន្ត្រីកសិកម្ម ជ្រាបអំពីការងារដាំដុះ និងការប្រមូលផលជ័រដែលសម្ព័ន្ធកៅស៊ូសម្រេចជៀជ័របានជាង ៥០% លើផ្ទៃដីដាំដុះសរុប។ ក្រៅពីការងារផលិតកម្ម លោកក៏បានលើកឡើងអំពីផែនការផលិតកម្ម ការសាងសង់រោងចក្រកែច្នៃជ័រនៅជនបទ និងការកសាងហេដ្ឋា រចនាសម្ព័ន្ធសំខាន់ៗ ដែលសមិទ្ធផលទាំងអស់នោះវាបាននិងកំពុងបំពេញតួនាទីយ៉ាងសំខាន់ក្នុងការលើកស្ទួយកម្រិតជីវភាពរបស់បុគ្គលិក កម្មករ និងប្រជាពលរដ្ឋដែលរស់នៅជិតតំបន់វិនិយោគ និងជាពិសេសជួយលើកតម្កើងមុខមាត់ព្រះរាជាណាចក្រកម្ពុជា លើឆាកអន្តរជាតិតាមរយ:ការនាំចេញផលិតផលជ័រដែលផលិតនៅកម្ពុជា។ លោកបានបន្តទៀតថា សមិទ្ធផលដែល សម្ព័ន្ធកៅស៊ូសម្រេចបាននេះ គឺបានមកពីការជួយគាំទ្រ លើកទឹកចិត្ត និងផ្តល់កិច្ចសហប្រតិបត្តិការបានយ៉ាងល្អប្រសើរពីសំណាក់មន្ត្រីជំនាញ អគ្គនាយកដ្ឋានកៅស៊ូកម្ពុជា និងលោកថ្នាក់ ដឹកនាំទទួលបន្ទុកកៅស៊ូ និងជាពិសេសឯកឧត្តមរដ្ឋមន្ត្រីផ្ទាល់នាពេលកន្លងមក។ លោកប្រធានបានបញ្ជាក់ជូនថា ក្នុងនាមឲ្យសម្ព័ន្ធកៅស៊ូ និងតំណាងក្រុមហ៊ុនវិនិយោគទាំងអស់នឹងបន្ត អនុវត្តផែនការសកម្មភាពឲ្យបានពេញលេញតាមអ្វីដែលសម្ព័ន្ធបានឯកភាពជាមួយក្រសួង និងជាពិសេសអនុវត្តឲ្យបានត្រឹមត្រូវតាមគោលការណ៍ច្បាប់ និងបច្ចេកទេសរបស់ព្រះរាជាណាចក្រកម្ពុជា ដើម្បីឈានទៅសម្រេចឲ្យបានជោគជ័យ នៃការអភិវឌ្ឍដំណាំកៅស៊ូនៅកម្ពុជា នាពេលអនាគត។
នាឱកាសនេះ លោករដ្ឋមន្ត្រី វេង សាខុន បានវាយតម្លៃខ្ពស់ចំពោះសមិទ្ធផល ដែលសម្ព័ន្ធកៅស៊ូវៀតណាម សម្រេចបាន ពិសេសបានផ្តល់កិច្ចសហការយ៉ាងល្អប្រសើរ ជាមួយក្រសួង អគ្គនាកដ្ឋានកៅស៊ូ ក៏ដូចជាមួយអាជ្ញាធរដែនដីក្នុងរយ:ពេលកន្លងមក។ ក្រៅពីនេះ សម្ព័ន្ធកៅស៊ូបានអនុវត្តតាមផែនការមេក្នុងការដាំដុះ ការបំពេញបានតាមនីតិវិធីរដ្ឋបាល ច្បាប់ និងបច្ចេកទេសដែលបានឯកភាពជាមួយក្រសួង និងបានចូលរួមយ៉ាងសកម្ម ក្នុងការកសាងហេដ្ឋារចនាសម្ព័ន្ធរូបវន្តសំខាន់ៗ ដែលបានបង្កលក្ខណ:យ៉ាងល្អប្រសើរសម្រាប់ជីវភាពរស់នៅរបស់បុគ្គលិក កម្មកររបស់ក្រុមហ៊ុន។ លោករដ្ឋមន្ត្រី ក៏បានកោតសរសើរចំពោះឆន្ទ:បន្តធ្វើការវិនិយោគរបស់សម្ព័ន្ធកៅស៊ូ បើទោះបីស្ថិតក្នុងស្ថានភាពទីផ្សារជ័រមិនអំណោយផលផ្នែកតម្លៃក៏ពិត តែសម្ព័ន្ធនៅតែបន្តអនុវត្តគម្រោងវិនិយោគ រហូតប្រមូលផលបានជាង ៥០% ដែលសកម្មភាព គឺពិតជាឆ្លើយតបបានត្រឹមត្រូវតាមអនុសាសន៍ខ្ពង់ខ្ពស់របស់សម្តេចតេជោ ហ៊ុន សែន ក្នុងការដាំដុះ គ្រប់គ្រង និងជារួមបន្តអភិវឌ្ឍន៍ដំណាំកៅស៊ូកម្ពុជាប្រកបដោយចីរភាព និងនិរន្តរភាព។ មិនត្រឹមតែប៉ុណ្ណោះ សម្ព័ន្ធកៅស៊ូ បានយកចិត្តទុកដាក់ទទួលខុសត្រូវ លើកាតព្វកិច្ចបង់ពន្ធជូនរដ្ឋបានទាន់ពេលវេលាទៀតផង។ លោករដ្ឋមន្ត្រីបានបញ្ជាក់ថា ក្រសួង ដែលមានអគ្គនាយកដ្ឋានកៅស៊ូជាសេនាធិការ នឹងរួមសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្ត ពិសេសអាជ្ញាធរដែនដីដើម្បីចាត់ វិធានការលុបបំបាត់បញ្ហាអនាធិបតេយ្យផ្សេងៗ ដែលកើតឡើងជាយថាហេតុជាបន្ទាន់។
លោករដ្ឋមន្ត្រីបានជម្រាបជូនភ្ញៀវថា ក្នុងពេលអនាគតដ៏ខ្លី លោកនឹងដឹកនាំក្រុុមការងារ ចុះពិនិត្យវឌ្ឍនភាពរបស់ក្រុមហ៊ុន នៅតាមបណ្តាខេត្តគោលដៅវិនិយោគ៕ ដោយ៖កូឡាប
