ភ្នំពេញ ៖ នាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី២កក្កដានេះ បានដឹងថា សម្រាប់លោកអ្នកដែលពុំធ្លាប់ប្រើអ៊ែរដ្រប់ អ៊ែរដ្រប់គឺជាកម្មវិធីមួយរបស់ iPhone ដែលអាចផ្ញើរូបភាព ឬវីដេអូរវាង iPhone មិនត្រឹមតែមានល្បឿនលឿន ថែមទាំងអាចរក្សាគុណភាពរបស់រូបភាពបានល្អដូចដើម ដោយមិនចាំបាច់មានសេវាអុីនធឺណិត (WiFi ឬ 4G) ក្នុងចម្ងាយរហូតដល់៩ម៉ែត្រ។ ដោយសារភាពងាយស្រួលនេះហើយ ទើបជនខិលខូចមួយចំនួនបានប្រើមុខងារនេះ ដើម្បីផ្ញើរូបភាពអាសអាភាសក្នុងគោលបំណងរំខានអ្នកដ៏ទៃ ដែលគេហៅថា “Cyber Flashing”។
នាយកដ្ឋានប្រឆាំងបទល្មើសបច្ចេកវិទ្យា បានបន្ថែមថា ដូច្នេះដើម្បីជៀសវាងបញ្ហានេះ លោកអ្នកគួរតែបិទអ៊ែរដ្រប់ នៅពេលដែលលោកអ្នកពុំត្រូវការប្រើប្រាស់ ឬបើកសម្រាប់ឱ្យតែអ្នកនៅក្នុងបញ្ជីឈ្មោះអាចផ្ញើក៏បាន។
នេះជាវិធីដើម្បីបើក បិទកម្មវិធីអ៊ែរដ្រប់ ៖
១-ចូលទៅ Control Center (ចូលពី lock screen ក៏បាន) ដោយអូសពីលើចុះក្រោមនៅលើកញ្ចក់ ផ្នែកខាងស្ដាំ (iPhone X XS ឬ XR)
២-ចុចសង្កត់ចំកណ្ដាលក្នុងការ៉េដំបូងគេ
៣-ចុចលើ AirDrop ហើយជ្រើសយកជម្រើសដែលអ្នកចង់បាន៕ ដោយ៖បញ្ញាស័ក្តិ
