ព្រះសីហនុ៖ នៅរសៀលថ្ងៃទី២ ខែ កក្កដា ឆ្នាំ២០១៩ លោកគួច ចំរើន អភិបាលខេត្តព្រះសីហនុ បានដឹកនាំមន្ត្រីជំនាញចុះពិនិត្យមើលការដ្ឋានសំណង់សង់ ពីគ្រោងដែកនៅក្នុងមូលដ្ឋានសង្កាត់លេខ ៤ ក្រុងព្រះសីហនុ ។ គ្រាចុះពិនិត្យនេះ លោក អភិបាលខេត្ត បានណែនាំឲ្យម្ចាស់ការដ្ឋានសំណង់ចំនួន ៣ កន្លែងត្រូវផ្អាកសកម្មភាព
សាងសង់ ជាបណ្ដោះអាសន្ន ដោយទុកពេលឲ្យក្រុមមន្ត្រីជំនាញ ធ្វើការត្រួតពិនិត្យបច្ចេកទេស និងគុណភាព នៃសំណង់រួចរាល់សិន ទើបធ្វើការសម្រេចជាក្រោយ ។
បន្ទាប់ពីពិនិត្យការដ្ឋានសំណង់ខាងលើនេះ លោកអភិបាលខេត្ត បានញ្ជើញចុះទៅពិនិត្យ មើលគ្រួសារជនជាតិជប៉ុន ដែលហាងរបស់គាត់ ត្រូវបានអគារបាក់រលំសង្កត់ នាំឲ្យខូចទាំងស្រុង កាលពីថ្ងៃទី២២ ខែមិថុនា ឆ្នាំ២០១៩ កន្លងទៅ ហើយលោកបានអនុញ្ញាតឲ្យជនជាតិជប៉ុន ដែលជាម្ចាស់អាហារដ្ឋាន សាងសង់ផ្ទះឈើ នៅលើទីតាំងដែលគាត់ បានជួលដីនោះ ដើម្បីស្នាក់នៅជាបណ្ដោះអាសន្ន ។
ទន្ទឹមនោះ លោកអភិបាលខេត្តបានជំរុញ ឲ្យអាជ្ញាធរក្រុងព្រះសីហនុ ត្រូវពន្លឿនការធ្វើលិខិតអនុញ្ញាត ក្នុងការសាងសង់សំណង់ ជូនម្ចាស់ហាងនេះ ឲ្យបានលឿន ដើម្បីពួកគាត់បានបើកអាជីវកម្មរកស៊ីឡើងវិញ ហើយលោកក៏បានជំរុញ មន្រ្តីជំនាញពាក់ព័ន្ធទាំងអស់ យកចិត្តទុកដាក់សម្របសម្រួលជូន និងចាត់ទុកជាកិច្ចការអាទិភាព ។
សូមបញ្ជាក់ជូនថា ជនជាតិជប៉ុន ដែលជាម្ចាស់ហាងនេះ បានមកលក់ដូររកស៊ី ក្នុងក្រុងព្រះសីហនុចំនួន១៥ ឆ្នាំ កន្លងមកហើយ៕ ដោយ៖បញ្ញាស័ក្តិ