ប្រទេសអង់គ្លេស បានថ្លែងក្តីរំពឹងថា ប្រទេសចិន នឹងគោរពតាមសន្និសញ្ញាឆ្នាំ ១៩៨៤ ដែលក្នុងសន្និសញ្ញានោះ ចិនយល់ព្រមធានាឲ្យមានសិទ្ធិសេរីភាព ជាមូលដ្ឋាននៅក្នុងទីក្រុងហុងកុង រយៈពេល ៥០ឆ្នាំ។ នេះបើតាមការបញ្ជាក់ របស់រដ្ឋមន្រ្តីការបរទេសអង់គ្លេស លោក Jeremy Hunt នៅថ្ងៃអង្គារម្សិលមិញនេះ។
ការប្រកាសប្រាប់ចិន ឲ្យគោរពតាមសិទ្ធិសញ្ញាឆ្នាំ ១៩៨៤នេះ កើតឡើង ក្រោយពេលប្រទេសចិន បានហៅការតវ៉ា នៅក្នុងទីក្រុងហុងកុងសប្តាហ៍នេះ ថាជាបញ្ហាប្រឈម ទៅនឹងការដឹកនាំរបស់ខ្លួន ក្រោយពេលក្រុមអ្នកតវ៉ាហុងកុង ជាច្រើនបានលុកលុយ ចូលអគាររដ្ឋសភា។
ប្រជាជនហុងកុងរាប់លាននាក់ បានធ្វើការតវ៉ាអស់ជាច្រើនសប្តាហ៍មកហើយ ដើម្បីប្រឆាំងទៅនឹងច្បាប់ធ្វើបត្យាប័ន ដែលច្បាប់នេះ អាចអនុញ្ញាតឲ្យមានការបញ្ជូនជនសង្ស័យ ពីហុងកុង ទៅធ្វើការកាត់ទោស នៅក្នុងប្រទេសចិនបាន។
ចិន និងអង់គ្លេស បានចុះហត្ថលេខាលើសេចក្តីប្រកាសរួមឆ្នាំ ១៩៨៤ លើការព្រមព្រៀង ប្រគល់ទីក្រុងហុងកុង ត្រឡប់ឲ្យចិនវិញ ប៉ុន្តែទីក្រុងប៉េកាំង បាននិយាយថា សន្និសញ្ញានោះ គឺជាឯកសារប្រវត្តិសាស្រ្ត ដែលមិនមានសារសំខាន់សម្រាប់ការអនុវត្តឡើយ។
កាលពីថ្ងៃចន្ទកន្លងទៅ ចិន បាននិយាយថា អង់គ្លេស មិនមានទំនួលខុសត្រូវទៀតឡើយ លើទីក្រុងហុងកុង ដូច្នេះអង់គ្លេសគួរឈប់ឆ្ការដៃឆ្ការជើងទៀត។
សូមរំលឹកថា ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញ នៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាពដល់ទីក្រុងហុងកុង រួមមានសិទ្ធិសេរីភាព ក្នុងការតវ៉ា និងប្រព័ន្ធតុលាការឯករាជ្យ។ ប្រភព៖ Channelnewsasia៕ អត្ថបទប្រែសម្រួលដោយ៖ សុភ័ក្រ
