ភ្នំពេញ ៖ អដ្ឋិធាតុទាហានស្ម័គ្រចិត្តវៀតណាម ៥៤០ ធាតុ ត្រូវបានរកឃើញ នៅក្នុងប្រទេសកម្ពុជា ក្នុងរយៈពេល៦ខែ ដើមឆ្នាំ២០១៩នេះ។ នេះបើតាមការបញ្ជាក់របស់ នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ។
នៅព្រឹកថ្ងៃទី៣ ខែកក្កដា ឆ្នាំ២០១៩នេះ ក្រសួងការពារជាតិ រៀបចំកិច្ចប្រជុំបូកសរុបលទ្ធផលការងារ ប្រចាំឆមាសទី១ និងលើកទិសដៅបន្ត អនុវត្តន៍ការងារសម្រាប់ឆមាសទី២ ឆ្នាំ២០១៩ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ។
លោកនាយឧត្តមសេនីយ៍ បានបញ្ជាក់ថា ក្នុងឆមាសទី១ ឆ្នាំ២០១៩នេះ កងយោធពលខេមរភូមិន្ទ បានសហការ ជាមួយក្រុមរុករកអដ្ឋិធាតុវៀតណាម រកឃើញអដ្ឋិធាតុទាហានស្ម័គ្រចិត្តវៀតណាម ចំនួន៥៤០ធាតុ ក្នុងនោះ មានការរកឃើញដោយយោធភូមិភាគពិសេស ចំនួន៦២ធាតុ យោធភូមិភាគទី១ ចំនួន៤០ធាតុ យោធភូមិភាគទី២ ចំនួន២២៨ធាតុ យោធភូមិភាគទី៣ ចំនួន ៥៨១ធាតុ យោធភូមិភាគទី៤ ចំនួន៤៨ធាតុ និងយោធភូមិភាគទី៥ ចំនួន៨៤ធាតុ។
សូមបញ្ជាក់ថា រាជរដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាលើកិច្ចព្រមព្រៀងមួយ កាលពីថ្ងៃទី២៨ ខែសីហា ឆ្នាំ២០០០ ស្តីពីការរុករកការប្រមូលផ្តុំ និងការធ្វើមាតុភូមិនិវត្តន៍អដ្ឋិធាតុ របស់កងទ័ពស្ម័គ្រចិត្តវៀតណាម ដែលពលី ក្នុងសម័យសង្រ្គាម នៅប្រទេសកម្ពុជា៕ ដោយ៖កូឡាប