តបតាមការអញ្ជើញរបស់ សាលាបណ្តុះបណ្តាលវិជ្ជាជីវៈទេសចរណ៍ញូវហ្សេឡែន នៅ Willington នៅថ្ងៃទី៣ ខែកក្កដា ឆ្នាំ២០១៩នេះ លោករដ្ឋមន្ត្រី ថោង ខុន និងប្រតិភូ បានទទួលការស្វាគមន៍រាក់ទាក់ ពីលោក Ben Potter នាយកគ្រប់គ្រងផ្នែកទីផ្សារ និងលោកស្រី Marty Hiddleston នាយកគ្រប់គ្រងសាលា។
ថ្លែងក្នុងជំនួបនេះ លោករដ្ឋមន្ត្រី ថោង ខុន បានសម្តែងនូវការចាប់អារម្មណ៍ និងពេញចិត្តកោតសរសើរយ៉ាងខ្លាំង ចំពោះរចនាសម្ព័ន្ធ និងការគ្រប់គ្រងរបស់សាលា ដែលមានលក្ខណៈសាមញ្ញ ទំនើប ហើយមានគ្រប់វិស័យ ជំនាញ ទាំងខាងឧស្សាហកម្មធ្វើដំណើរ ឧស្សាហកម្មទេសចរណ៍ដូចជា ៖ flight attendant, Cruising, House keeping,Tour Guide,… ។ល ។ កម្មវិធីសិក្សាខ្លីៗ ៣០ម៉ោង ៦០ម៉ោង ដោយផ្សារភ្ជាប់ការអនុវត្តជាក់ស្តែងនៅនឹងកន្លែង។ ជាងនេះទៀត សាលានេះមិនត្រូវការដីធំដើម្បីសាងសង់ឡើយ ដែលចំណុចទាំងអស់នេះ កម្ពុជាអាចឆ្លើយតបបានទាំងនៅតំបន់សៀមរាបអង្គរ តំបន់ភ្នំពេញ តំបន់ឆ្នេរសមុទ្រ និងតំបន់អេកូទេសចរណ៍។
បន្ទាប់ពីបានស្តាប់ពីសភាពការណ៍អភិវឌ្ឍន៍រួម ក៏ដូចជា សំណូមពរជាក់ស្តែង នៃការអភិវឌ្ឍធនធានមនុស្ស ពិសេសផ្នែកជំនាញទេសចរណ៍ នៅកម្ពុជា ភាគី New Zealand មានការកោតសរសើរ ចំពោះការរីកចម្រើនរបស់កម្ពុជា រួមទាំង វិស័យទេសចរណ៍ ដែលបច្ចុប្បន្ន កំពុងមានតម្រូវការចាំបាច់ ខាងធនធានមនុស្ស ផ្នែកជំនាញវិជ្ជាជីវៈទេសចរណ៍ ទាំងផ្នែកឧស្សាហកម្មធ្វើដំណើរ និងទេសចរណ៍។ ភាគី New Zealand គាំទ្រចំពោះសំណូមពររបស់កម្ពុជា ក្នុងការផ្តល់អាហារូបករណ៍ ការចែករំលែកបទពិសោធន៍ និងពិចារណាក្នុងការវិនិយោគ សាលាបណ្តុះបណ្តាលវិជ្ជាជីវៈជំនាញ ទេសចរណ៍ នៅកម្ពុជា។
សូមជម្រាបជូនថា កម្ពុជាបច្ចុប្បន្ន មានអ្នកបម្រើការដោយផ្ទាល់ ក្នុងវិស័យទេសចរណ៍ប្រមាណ ៦២ម៉ឺននាក់។ ឆ្នាំ២០២០ យើងនឹងមានបុគ្គលិកបម្រើការប្រមាណ ១លាននាក់ និងឆ្នាំ២០២៥ ប្រមាណ ១.២លាននាក់ ។ តាមការវាយតម្លៃ របស់គណៈកម្មាការជាតិ អ្នកជំនាញទេសចរណ៍ ឆ្នាំ២០១៨ យើងទើបមានប្រមាណ៤០% ដែលមានសមត្ថភាពជំនាញ តាមស្តង់ដារអាស៊ាន។ ជាផែនការយុទ្ធសាស្រ្តរបស់ក្រសួងទេសចរណ៍ គឺនៅឆ្នាំ២០២០ ត្រូវឲ្យមាន៥០% នៃអ្នកបម្រើការងារក្នុងឧស្សហកម្មទេសចរណ៍ ត្រូវឆ្លងកាត់ការបណ្តុះបណ្តាល និងវាយតម្លៃសមត្ថភាព ស្របតាមស្តង់ដារសមត្ថភាពអ្នកជំនាញទេសចរណ៍អាស៊ាន និងឆ្នាំ២០២៥ ត្រូវសម្រេចយុទ្ធនាការ បុគ្គលិកម្នាក់ជំនាញមួយ (One staff One Skill) ពោលគឺ ១០០% នៃអ្នកជំនាញ គឺត្រូវមានការទទួលស្គាល់ សមត្ថភាពតាមស្តង់ដារអាស៊ាន៕ ដោយ៖កូឡាប
