ខេត្តស្វាយរៀងៈ ការិយាល័យច្រកចេញចូលតែមួយ ដើម្បីឲ្យបងប្អូនប្រជាពលរដ្ឋ ងាយស្រួលទទួលសេវា ព្រោះថាក្នុងនោះ មានមន្រ្តីមន្ទីរ អង្គភាពគ្រប់ជំនាញ បានមកបម្រើការនូវការិយាល័យច្រកចេញចូលតែមួយ សាលាស្រុកផ្ទាល់តែម្តង ដែលធ្វើឲ្យបងប្អូនចំណេញពេលវេលា និងមានតម្លាភាព គ្មានអំពើពុករលួយ ។ លោក ម៉ែន វិបុល អភិបាលខេត្តស្វាយរៀង នៅព្រឹកថ្ងៃទី៤ ខែកក្កដា ឆ្នាំ២០១៩នេះ បានអញ្ជើញជាអធិបតី នៅក្នុងពិធីសម្ពោធដាក់ឲ្យដំណើរការ “ការិយាល័យច្រកចេញចូលតែមួយ” នៅបរិវេណសាលាស្រុកស្វាយជ្រំ ។
ពិធីនេះ ក៏មានការអញ្ជើញចូលរួមពី អស់លោកជាអភិបាលរងខេត្ត លោក លោកស្រីជាសមាជិក ក្រុមប្រឹក្សាខេត្ត លោក លោកស្រី ប្រធានមន្ទីរ អង្គភាពពាក់ព័ន្ធនានាជុំវិញខេត្ត កងកម្លាំងប្រដាប់អាវុធទាំងបីប្រភេទ មេឃុំទាំង១៦ឃុំ មន្ត្រីរាជការពាក់ព័ន្ធ និងប្រជាពលរដ្ឋ សរុបវត្តមាន ៤៦៦នាក់។
លោក ហែម សារិទ្ធ អភិបាលស្រុកស្តីទី បានលើកឡើង ពីស្ថានភាពភូមិសាស្ត្ររបស់ស្រុក និងវឌ្ឍនភាពការងារ នៃការរៀបចំការិយាល័យច្រកចេញចូលតែមួយ របស់ស្រុកស្វាយជ្រំ ហើយត្រូវសម្ពោធដាក់ឲ្យដំណើរការនៅថ្ងៃនេះ។
លោក ម៉ែន វិបុល អភិបាលខេត្តស្វាយរៀង បានបញ្ជាក់ឲ្យបងប្អូនប្រជាពលរដ្ឋ ដឹងថា ការបង្កើតការិយាល័យច្រកចេញចូលតែមួយ ដែលកំពុងសម្ពោធដាក់ឲ្យដំណើរការ នៅថ្ងៃនេះ គឺដើម្បីឲ្យបងប្អូនប្រជាពលរដ្ឋ ងាយស្រួលទទួលសេវា ព្រោះថាក្នុងនោះ មានមន្រ្តីមន្ទីរ អង្គភាពគ្រប់ជំនាញ បានមកបម្រើការនូវការិយាល័យច្រកចេញចូលតែមួយ សាលាស្រុកផ្ទាល់តែម្តង ដែលធ្វើឲ្យបងប្អូនចំណេញពេលវេលា និងមានតម្លាភាព គ្មានអំពើពុករលួយ ព្រោះនៅការិយាល័យច្រកចេញចូលតែមួយ មានបិទតារាងតម្លៃ សេវាណាត្រូវយកកម្រៃ សេវាណាមិនយកកម្រៃ ហើយកំណត់តម្លៃច្បាស់លាស់ ហើយថវិកាទាំងនេះ ត្រូវបង់ចូលរដ្ឋ។
លោកអភិបាលខេត្ត ក៏បានផ្ដាំផ្ញើដល់មន្រ្តី និងបុគ្គលិកបម្រើការងារ នៅការិយាល័យច្រកចេញចូលតែមួយ ត្រូវធ្វើឲ្យសាមញ្ញ ចំពោះប្រជាពលរដ្ឋ ត្រូវប្រកាន់ភ្ជាប់នូវគោលការណ៍ក្រមសីលធម៌ វិជ្ជាជីវៈ ត្រូវទទួលការរាក់ទាក់ ជាមួយប្រជាពលរដ្ឋ ហើយរដ្ឋបាលស្រុក ត្រូវមានគណនេយ្យភាពដោយផ្ទាល់ ជាមួយប្រជាពលរដ្ឋ និងរដ្ឋាភិបាល ក្រសួងស្ថាប័ន ក្នុងការបំពេញតួនាទីរបស់ខ្លួន។ រដ្ឋបាលស្រុក ត្រូវធានាផ្ដល់សេវា អនុវត្តន៍បែបបទ នីតិវិធីជាទូទៅ ត្រូវបង្កើនជំនឿទុកចិត្ត ដល់បងប្អូនប្រជាពលរដ្ឋ លើការស្នើសុំសេវា តាមរយៈបង្កឲ្យមានលក្ខណៈងាយស្រួល ក្នុងការទំនាក់ទំនងការងារ៕ ដោយ៖ វ៉ៃកូ
