ប្រទេសកូរ៉េខាងជើង បានធ្វើការចោទប្រកាន់អាមេរិចថា ជាប្រទេសដែលមានៈចង់តែយកឈ្នះ ដោយមិនគិតពីគ្រោះថ្នាក់ និងផលលំបាក។ ការចោទប្រកាន់នេះធ្វើឡើង តែប៉ុន្មានថ្ងៃប៉ុណ្ណោះ ក្រោយពេលប្រទេសទាំងពីរ ព្រមព្រៀងគ្នា បន្តការចរចាលើបញ្ហានុយក្លេអ៊ែរ។
គណៈប្រតិភូរបស់កូរ៉េខាងជើង ប្រចាំអង្គការសហប្រជាជាតិ បានថ្លែងនៅថ្ងៃពុធម្សិលមិញថា អាមេរិច ‘ញៀននឹងការដាក់ទណ្ឌកម្ម’។
ព្យុងយ៉ាងក៏បានចោទអាមេរិចថា ប៉ុនប៉ងបំផ្លាញបរិយាកាសសន្តិភាព នៅឧបទ្វីកូរ៉េផងដែរ។
សូមបញ្ជាក់ថា ប្រទេសទាំងពីរ ទើបតែព្រមព្រៀងគ្នា បន្តការចរចាឡើងវិញ ដើម្បីដោះស្រាយបញ្ហានុយក្លេអ៊ែរ។
ការព្រមព្រៀងនោះ កើតឡើងក្រោយពេលប្រធានាធិបតី ដូណាល់ ត្រាំ បានធ្វើការជួបដោយផ្ទាល់ ជាមួយនឹងមេដឹកនាំកូរ៉េខាងជើង គីម ជុងអ៊ុន នៅតំបន់គ្មានកងទ័ព ដែលខ័ណ្ឌចែកប្រទេសកូរ៉េ
ទាំងពីរ។
លោក ត្រាំ គឺជាប្រធានាធិបតីអាមេរិចទី ១ ស្ថិតក្នុងដំណែង ដែលបានឈានជើងជាន់ដីកូរ៉េខាងជើង។ លោកបានធ្វើការពិភាក្សា ជាមួយមេដឹកនាំកូរ៉េខាងជើងជិត ១ម៉ោង ហើយភាគីទាំងពីរព្រមព្រៀងគ្នា បង្កើតក្រុមការងារ ដើម្បីបន្តការចរចាលើបញ្ហានុយក្លេអ៊ែរ ដែលបានជាប់គាំជាយូរ។ ប្រភព៖ BBC៕ អត្ថបទប្រែសម្រួលដោយ៖ សុភ័ក្រ