ក្រុមហ៊ុនផលិតយន្តហោះអាមេរិច Boeing នឹងធ្វើការផ្តល់ប្រាក់សំណងចំនួន ១០០លានដុល្លារ ដើម្បីជួយទៅដល់គ្រួសារ និងសហគមន៍របស់ជនរងគ្រោះ ដែលបានស្លាប់ក្នុងគ្រោះថ្នាក់ធ្លាក់យន្តហោះប្រភេទ Boeing 737 Max ពីរករណី។
ក្រុមហ៊ុនបញ្ជាក់ថា ទឹកប្រាក់ទាំងនោះ នឹងត្រូវផ្តល់ឲ្យក្រុមសហគមន៍ និងអង្គការមិនស្វែងរកប្រាក់កម្រៃ ដែលក្រុមទាំងនោះ នឹងជួយធ្វើការផ្តល់ប្រាក់ទៅដល់សាច់ញាតិ នៃជនរងគ្រោះចំនួន ៣៤៦នាក់ ដែលបានស្លាប់ក្នុងហេតុការណ៍ធ្លាក់យន្តហោះ។ លុយទាំងនោះ ក៏នឹងត្រូវប្រើប្រាស់ដើម្បីគាំទ្រដល់ការសិក្សា រួមមាន ថ្លៃសិក្សានៅមហាវិទ្យាល័យ និងការថ្លៃបង់សាលាផ្សេងទៀត របស់កូនជនរងគ្រោះ និងសម្រាប់ចំណាយ លើការរស់នៅរបស់គ្រួសារពួកគេ។ នេះបើតាមការបញ្ជាក់របស់ក្រុមហ៊ុន នៅក្នុងសេចក្តីប្រកាស។
មេធាវីតំណាងគ្រួសារជនរងគ្រោះ ដែលស្លាប់ក្នុងគ្រោះធ្លាក់យន្តហោះ កាលពីខែមីនា ក្នុងប្រទេសអេត្យូពី បានបញ្ជាក់ថា សាច់ញាតិជនរងគ្រោះ ដែលបានប្តឹងក្រុមហ៊ុន មិនបានទទួលព័ត៌មានគ្រប់ជ្រុងជ្រោយទេ ពីការផ្តល់ប្រាក់នោះ។
ទោះយ៉ាងណា លោកមេធាវីឈ្មោះ Bob Clifford បានរិះគន់ការផ្តល់របស់ក្រុមហ៊ុន Boeing ថាជាការមិនបានប្រាប់ឲ្យដឹងច្បាស់លាស់ ហើយលោកបញ្ជាក់ថា គ្រួសារជនរងគ្រោះ ចាប់អារម្មណ៍រឿងយកធាតុសាច់ញាតិពួកគេត្រឡប់មកវិញ ជាជាងសាច់ប្រាក់។
ជុំវិញបញ្ហាខាងលើ អ្នកនាំពាក្យរបស់ក្រុមហ៊ុន Boeing បានថ្លែងថា អ្នកដែលទទួលយកសំណង មិនតម្រូវឲ្យបោះបង់សិទ្ធិពួកគេ ក្នុងការដាក់ពាក្យប្រឆាំងនឹងក្រុមហ៊ុនឡើយ។
សូមរំលឹកថា កាលពីខែមីនាកន្លងទៅ យន្តហោះម៉ាក 737 Max របស់ក្រុមហ៊ុន Boeing ត្រូវបានប្រទេសជាច្រើន ផ្អាកមិនឲ្យមានការហោះហើរ ទូទាំងពិភពលោក ក្រោយពេលយន្តហោះមួយគ្រឿង របស់ក្រុមហ៊ុន ដែលធ្វើការហោះហើរ ដោយក្រុមហ៊ុនអាកាសចរណ៍ នៅប្រទេសអេត្យូពី បានធ្លាក់ ភ្លាមៗក្រោយពេលហោះឡើយ។ កាលពីចុងឆ្នាំ ២០១៨ ក៏មានយន្តហោះម៉ាកដដែល ធ្លាក់ផងដែរ នៅក្នុងប្រទេសឥណ្ឌូណេស៊ី។ ប្រភព៖ CNN៕ អត្ថបទប្រែសម្រួលដោយ៖ សុភ័ក្រ
