ប្រទេសចិនបានធ្វើការព្រមានអង់គ្លេស កុំឲ្យជ្រៀតជ្រែងចូលកិច្ចការផ្ទៃក្នុងរបស់ខ្លួន បន្ទាប់ពីមានជម្លោះការទូតរវាងប្រទេសទាំងពីរកាន់តែខ្លាំងឡើង ជុំវិញការតវ៉ានៅទីក្រុងហុងកុង។
ឯកអគ្គរដ្ឋទូតចិនប្រចាំអង់គ្លេស លោក Liu Xiaoming បាននិយាយថា ទំនាក់ទំនងរវាងចិន និងអង់គ្លេសត្រូវបានបំផ្លាញដោយសារតែការថ្លែងរបស់រដ្ឋមន្ត្រីការបរទេសអង់គ្លេស Jeremy Hunt និងមនុស្សមួយចំនួនទៀតដែលគាំទ្រសកម្មភាពរបស់ក្រុមអ្នកតវ៉ានៅហុងកុង។
លោកបានថ្លែងថា “អ្នកដែលបានលុកលុយចូលរដ្ឋសភាហុងកុងគួរតែត្រូវបានថ្កោលទោសថា ជាអ្នករំលោភច្បាប់”។
ពេលបន្ទាប់មក ឯកអគ្គរដ្ឋទូតចិន ត្រូវបានកោះហៅទៅកាន់ការិយាល័យកិច្ចការបរទេស ជុំវិញការថ្លែងរបស់លោក។
អ្នកនាំពាក្យការិយាល័យកិច្ចការបរទេសអង់គ្លេសបានថ្លែងថា លោក Simon McDonald ដែលជាអនុរដ្ឋមន្ត្រី និងជាប្រធានកិច្ចការការទូតអង់គ្លេស បានថ្លែងប្រាប់ឯកអគ្គរដ្ឋទូតចិនថា ការថ្លែងរបស់គាត់គឺមិនអាចទទួលយកបាន និងមិនត្រឹមត្រូវឡើយ។
កាលខាងដើម នាយករដ្ឋមន្ត្រីអង់គ្លេស អ្នកស្រី Theresa May បាននិយាយថាអ្នកស្រីបានបង្ហាញក្តីកង្វល់ជាមួយនឹងមេដឹកនាំចិន ជុំវិញបញ្ហានៅហុងកុង។
សូមរម្លឹកថា បច្ចុប្បន្ន ក្រុមបាតុករនៅទីក្រុងហុងកុងកំពុងបន្តការតវ៉ារបស់ពួកគេអស់ជាច្រើនសប្តាហ៍មកហើយ។ កាលពីថ្ងៃច័ន្ទកន្លងទៅនេះ មានការផ្ទុះការតវ៉ាខ្លាំងរហូតដល់មានក្រុមអ្នកតវ៉ាជាច្រើនបានលុកលុយ ចូលអាគារក្រុមប្រឹក្សារដ្ឋអស់ជាច្រើនម៉ោង និងបានលើកទង់ជាតិរបស់អង់គ្លេស។
ក្រុមអ្នករិះគន់ បាននិយាយថា សេចក្តីព្រាងច្បាប់ធ្វើបត្យាប័ន អាចនឹងត្រូវបានគេប្រើប្រាស់ដើម្បីធ្វើការបញ្ជូនអ្នកនយោបាយប្រឆាំងទៅកាត់ទោសនៅប្រទេសចិន។
ក្រុមអ្នកតវ៉ា បានទាមទារឲ្យរដ្ឋាភិបាលក្រុងហុងកុងបោះបង់ចោលច្បាប់នោះ និងបានទាមទារឲ្យមេដឹកនអ្នកចុះចេញពីដំណែង។ ពួកគេក៏បានទាមទារឲ្យមានការដោះលែងសកម្មជនទាំងអស់ផងដែរ និងធ្វើការស៊ើបអង្កេតលើអំពើហឹង្សា។
ទីក្រុងហុងកុងត្រូវបានអង់គ្លេសប្រគល់ទៅឲ្យចិនវិញនៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាពដល់ទីក្រុងហុងកុង រួមមានសិទ្ធិសេរីភាពក្នុងការតវ៉ា និងប្រព័ន្ធតុលាការឯករាជ្យ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC