ភ្នំពេញ ៖ តាម ការបញ្ជាក់របស់ នាយឧត្តមសេនីយ៍ ឈុំ សុជាត អ្នកនាំពាក្យការពារជាតិ បានចេញសេចក្តី បដិសេធចំពោះជំនួយសហរដ្ឋអាមេរិក ក្នុងការជួសជុល អគារមួយកន្លែង នៅមូលដ្ឋានកងទ័ពជើងទឹករាម ហើយលោកថា ក្រសួងការពារជាតិពុំដែលបានស្នើទៅអាមេរិក ដើម្បីជួសជុលអគារខាងលើនេះម្តងណាទេ។
នាយឧត្តមសេនីយ៍ ឈុំ សុជាត បានថ្លែងថា ឆ្លើយតបនឹងសំណួរអ្នកសារព័ត៌មានជាតិ និងអន្តរជាតិមួយចំនួន ពាក់ព័ន្ធនឹងការផ្សព្វផ្សាយចោទប្រកាន់មកលើក្រសួងការពារជាតិកម្ពុជា ដោយខុសឆ្គង នាថ្មីៗនេះ ។
លោកបន្តថា ការផ្សព្វផ្សាយចោទប្រកាន់ថា «ក្រសួងការពារជាតិកម្ពុជា បានបដិសេធជំនួយអាមេរិក ដែលសុំជួសជុលអគារហ្វឹកហ្វឺន និងផ្ទុកនាវា របស់មូលដ្ឋានកងទ័ពជើងទឹកកម្ពុជា» គឺជាដំណឹងមិនពិតទាល់តែសោះ ដោយហេតុថា ក្រសួងការពារជាតិពុំដែលបានស្នើទៅអាមេរិក ដើម្បីជួសជុលអគារខាងលើនេះម្តងណាទេ។
អគារហ្វឹកហ្វឺន និងផ្ទុកសម្ភារៈ ដែលរងការចោទប្រកាន់នេះ គឺមិនមែនចំណុះឱ្យ មូលដ្ឋានកងទ័ពជើងរាមទេ ប៉ុន្តែជាអគាររបស់ គណៈកម្មាធិការជាតិសន្តិសុខលំហសមុទ្រ មានទីតាំងបណ្តោះអាសន្ន នៅមូលដ្ឋានកងទ័ពជើងទឹករាម ដែលនឹងត្រូវផ្លាស់ប្តូរទៅកាន់កន្លែងថ្មី ក្នុងពេលឆាប់ៗខាងមុខនេះ ហើយមិនទាន់មានភាពចាំបាច់ ក្នុងការជួសជុលនោះទេ។
លោកអ្នកនាំពាក្យ បានបញ្ជាក់ថា ពាក់ព័ន្ធនឹងលិខិតរបស់ ឧបការីរង ក្រសួងការពារជាតិសហរដ្ឋអាមេរិកនោះ ក្រសួងការពារជាតិកម្ពុជា ក៏បានអញ្ជើញអនុព័ន្ធយោធាប្រចាំការនៅក្នុងស្ថានទូតអាមេរិក មកស្តាប់ការបំភ្លឺ អំពីមូលហេតុដែលកម្ពុជាមិនទាន់មានភាពចាំបាច់ ក្នុងការទទួលជំនួយសហរដ្ឋអាមេរិក ដើម្បីជួសជុលអគារខាងលើនេះផងដែរ។
ឆ្លៀតឱកាសនេះ ក្នុងនាមអ្នកនាំពាក្យក្រសួងការពារជាតិ ខ្ញុំសូមស្នើដល់សារព័ត៌មានទាំងអស់ សូមកុំបន្តធ្វើការបកស្រាយចំពោះដំណឹងមិនពិត ដែលអាចនាំឱ្យមានការភាន់ច្រឡំមកលើក្រសួងការពារជាតិកម្ពុជា៕ ដោយ៖កូឡាប