ប្រទេសជាច្រើនបានធ្វើការស្នើជាផ្លូវការ នៅថ្ងៃព្រហស្បតិ៍ម្សិលមិញនេះ ឲ្យអង្គការសហប្រជាជាតិ ធ្វើការស៊ើបអង្កេតលើការសម្លាប់មនុស្សរាប់ពាន់នាក់ នៅក្នុងប្រទេសហ្វីលីពីន នៅពេលដែលលោកប្រធានាធិបតី Rodrigo Duterte បានធ្វើយុទ្ធនាការសង្រ្គាមប្រឆាំងគ្រឿងញៀន។
ប្រទេសអ៊ីស្លង់ (Iceland ) បានដាក់សេចក្តីសម្រេច ដែលគាំទ្រភាគច្រើន ដោយប្រទេសនៅអឺរ៉ុប។ នៅក្នុងលិខិត ប្រទេសជាច្រើន បានជំរុញឲ្យរដ្ឋាភិបាលការពារកុំឲ្យមានការសម្លាប់ក្រៅប្រព័ន្ធច្បាប់ ហើយក្រុមប្រឹក្សាសិទ្ធិមនុស្ស កំពុងត្រូវបានចោទសួរ ដើម្បីឲ្យមានការដោះស្រាយវិបត្តិនោះ។
រដ្ឋាភិបាលរបស់លោក Rodrigo Duterte អះអាងថា ជនសង្ស័យជួញដូរគ្រឿងញៀនជាង ៥.០០០នាក់ ត្រូវបានប៉ូលិសសម្លាប់ នៅក្នុងប្រតិបត្តិការប្រឆាំងគ្រឿងញៀន ប៉ុន្តែសកម្មជនបញ្ជាក់ថា មនុស្សយ៉ាងតិច ២៧.០០០នាក់ ត្រូវបានសម្លាប់ចាប់តាំងពីលោក Rodrigo Duterte ឡើងកាន់ដំណែងជាប្រធានាធិបតីមក។
កិច្ចប្រជុំនៅទីក្រុងហ្សឺណែវ នឹងធ្វើការបោះឆ្នោត ទៅលើសេចក្តីសម្រេច មុនពេលបញ្ចប់កិច្ចប្រជុំរយៈពេល ៣សប្តាហ៍របស់ខ្លួនកៅថ្ងៃទី ១២ ខែកក្កដានេះ។ ប្រទេសហ្វីលីពីន គឺជាប្រទេសសមាជិក ក្នុងចំណោមសមាជិកទាំង ៤៧។
ឯកអគ្គរដ្ឋទូតមកពីប្រទេសអាស៊ី ដែលថ្លែងក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា ប្រទេសរបស់លោក នឹងមិនធ្វើការគាំទ្រឲ្យមានការស៊ើបអង្កេតនោះទេ ព្រោះមានរឿងអាក្រក់ៗជាច្រើនជាងនោះ កើតឡើងក្នុងពិភពលោក។ ប្រភព៖ Channelnewsasia៕ អត្ថបទប្រែសម្រួលដោយ ៖ សុភ័ក្រ