ខេត្តស្វាយរៀង៖ លោកនាយឧត្តមសេនីយ៍ជៀង អំ រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះជួយ ស្រុករំដួល ខេត្តស្វាយរៀង បានថ្លែងទៅកាន់ប្រជាពលរដ្ឋចំនួន៣៥៧នាក់ បានបញ្ជាក់ថា នៅឆ្នាំ២០២០ថវិកាមូលនិធិឃុំ សង្កាត់នឹងកើនដល់៧ម៉ឺនដុល្លារ ហើយចាប់ពីឆ្នាំ២០២១ឡើងទៅ ថវិកានឹងឡើងដល់១០ម៉ឺនដុល្លារ ដើម្បីធ្វើការអភិវឌ្ឍ ឃុំសង្កាត់ឲ្យមានការរីកចម្រើន លើគ្រប់វិស័យហើយវិស័យជាអាទិភាពនោះគឺទឹក ភ្លើង ផ្លូវ និងធនធានមនុស្ស។
ការថ្លែងយ៉ាងដូច្នេះ នៅពេលដែលលោក បានដឹកនាំក្រុមការងារថ្នាក់ជាតិ ចុះជួយស្រុករំដួល ក្នុងការធ្វើវេទិកាសាធារណៈ ជាមួយអាជ្ញាធរដែន ដីនិងប្រជាពលរដ្ឋនៅឃុំបុសមន ស្រុករំដួល ស្ថិតក្នុងវត្តបុសមន នៅព្រឹកថ្ងៃទី៥ ខែកក្កដា ឆ្នាំ២០១៩ ដែលមានការចូលពីលោករស់ ផារិទ្ធ អភិបាលរងខេត្តស្វាយរៀង និងលោកណុប រតនា ជាក្រុមការងារថ្នាក់ជាតិ ព្រមទាំងលោក លោកស្រីជាប្រធាន អនុប្រធានមន្ទីរជុំវិញខេត្តជាច្រើនរូបផងដែរ។
លោកជៀង អំ បានបន្តថា អាជ្ញាធរដែនដី និងស្ថាប័នដែលពាក់ព័ន្ធទាំងអស់ ត្រូវអនុវត្តន៍កម្មវិធីនយោបាយ និងយុទ្ធសាស្រ្តចតុកោណ ដំណាក់ទី៤ របស់រាជរដ្ឋាភិបាលកម្ពុជា និងការបន្តថែរក្សាសុខសន្តិភាព សុវត្ថិភាព សណ្តាប់ធ្នាប់សង្គម និងការអភិវឌ្ឍសេដ្ឋកិច្ច សង្គម ដែលកំពុងមានការរីកចម្រើនលើគ្រប់វិស័យ ក្រោមការដឹកនាំប្រកប ដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ឲ្យមានប្រសិទ្ធភាពខ្ពស់ មានតម្លាភាព និងគណនេយ្យភាព។
លោកប្រធានក្រុមការងារ បានបញ្ជាក់ថា តួនាទី និងភារកិច្ច របស់ក្រុមការងារថ្នាក់ជាតិ គឺមានតួនាទីលើកកម្ពស់ការដឹកនាំ សម្របសម្រួល និងគាំទ្រ ដល់រដ្ឋបាលថ្នាក់ក្រោមជាតិ ក្នុងការលើកកម្ពស់ការផ្ដល់សេវា ការអភិវឌ្ឍមូលដ្ឋាន និងការដោះស្រាយបញ្ហានានា ជូនប្រជាពលរដ្ឋនៅមូលដ្ឋាន ប៉ុន្តែមិនមានតួនាទី ឬសិទ្ធិសម្រេចកិច្ចការជំនួសក្រសួង និងស្ថាប័ននានាឡើយ ហើយក៏ពុំអាចចាត់ចែងកិច្ចការជំនួសរដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ចនានានោះដែរ។ ប៉ុន្តែក្រុមការងារថ្នាក់ជាតិ អាចជំរុញឱ្យរដ្ឋបាលថ្នាក់ក្រោមជាតិ មន្ទីរ អង្គភាពជំនាញឱ្យលើកកម្ពស់ប្រសិទ្ធភាពក្នុងការបំពេញការងារ ស្របតាមតួនាទី ភារកិច្ច និងការទទួលខុសត្រូវ ដែលបានកំណត់ ហើយក្នុងករណីមានបញ្ហាប្រឈមដែលមិនអាចដោះស្រាយបានក្រុមការងារថ្នាក់ជាតិ ត្រូវជំរុញឱ្យក្រសួងស្ថាប័នពាក់ព័ន្ធទាំងនោះ ធ្វើការដោះស្រាយ និងធ្វើការតាមដានត្រួតពិនិត្យអំពីលទ្ធផល ដើម្បីរាយការណ៍ជូនរាជរដ្ឋាភិបាល។
នៅក្នុងឱកាសនោះ ប្រជាពលរដ្ឋនៅឃុំបុសមន បានលើកឡើងអំពីកង្វល់មួយចំនួន ដូចជា បានស្នើសុំផ្លូវ ភ្លើង ប្រឡាយទឹក កសិផលនាំទៅលក់នៅទីផ្សារ និងក្រុមប្រជាការពារ ក៏បានស្នើសុំប្រាក់ឧបត្ថម្ភ ក្នុងការការពារសន្តិសុខសណ្តាប់ធ្នាប់ នៅមូលដ្ឋានផងដែរ។
ចំពោះមុខលោក លោកស្រី ដែលជាមន្ទីរពាក់ព័ន្ធក្នុងខេត្តបានឡើងឆ្លើយសំណួរ របស់ប្រជាពលរដ្ឋ និងទទួលយកសំណូមយកទៅដោះស្រាយ ទៅតាមដំណាក់កាលនីមួយៗ ឲ្យបានគ្រប់នៅសំណើរបស់ពលរដ្ឋ ដែលបានលើកឡើងផងដែរ។ សូមបញ្ជាក់នៅក្នុងវេទិកាសាធារណៈនេះដែរ លោកជៀង អំ និងក្រុមការងារ បានចូលបច្ច័យដល់វត្តបុសមន នូវទឹកប្រាក់ជាង៣លានរៀលផងដែរ ដើម្បីកសាងទីអារាមវត្តមួយនេះ ឲ្យកាន់តែរីកចម្រើនថែមទៀត៕ ដោយ៖វ៉ៃកូ