ខេត្តព្រះសីហនុ៖ អភិបាល នៃគណៈអភិបាលខេត្តព្រះសីហនុ លោក គួច ចំរើន បានបញ្ជាឲ្យសមត្ថកិច្ចឃាត់ខ្លួនកម្មករសំណង់ ជនជាតិចិនចំនួន ២នាក់ ដែលមិនស្តាប់តាមការណែនាំ របស់អាជ្ញាធររដ្ឋបាលខេត្ត ដែលបានចុះផ្អាកការសាងសង់អគារជាបណ្តោះអាសន្ន។
ការហាមឃាត់ និងផ្អាកការដ្ឋានសំណង់ខាងលើ របស់អាជ្ញាធរខេត្តព្រះសីហនុ ធ្វើឡើងដើម្បីទុកពេលឲ្យមន្ត្រីជំនាញពិនិត្យទៅច្បាប់សាងសង់ , ពិនិត្យបច្ចេកទេសសាងសង់ នៃគុណភាពសំណង់អគារនោះ។
លោក គួច ចំរើន ចាត់ទុកការឃាត់ខ្លួនកម្មករសំណង់ចិនទាំងពីរនាក់នេះ ថាជាសារព្រមានជាទូទៅមួយ ដល់គ្រប់ការដ្ឋានសំណង់ទាំងទ្បាយ ដើម្បីឲ្យគោរពច្បាប់ក្នុងការសាងសង់នៅក្នុងមូលដ្ឋានខេត្តព្រះសីហនុ ឱ្យបានត្រឹមត្រូវ។
សូមបញ្ជាក់ថា កាលពីរសៀលថ្ងៃទី២ ខែកក្កដា ឆ្នាំ២០១៩ លោក គួច ចំរើន អភិបាលខេត្តព្រះសីហនុ បានដឹកនាំមន្ត្រីជំនាញចុះពិនិត្យ ការដ្ឋានសំណង់គ្រោងដែកចំនួន ៣ទីតាំង ស្ថិតនៅភូមិ២ សង្កាត់លេខ៤ ក្រុងព្រះសីហនុ និង បានធ្វើការណែនាំឲ្យមេការសំណង់ចំនួន៣ បញ្ឈប់សកម្មភាពសាងសង់ ជាបណ្តោះអាសន្ន ដោយរង់ចាំឲ្យមន្ត្រីជំនាញចុះមកត្រួតពិនិត្យលក្ខណ:បច្ចេកទេសឲ្យរួចរាល់ជាមុនសិន ទើបអនុញ្ញាតឲ្យការដ្ឋានសំណង់ទាំង៣នោះដំណើរការសាងសង់ជាបន្តទៀត។
យ៉ាងនេះក្តី កាលពីថ្ងៃទី៣ ខែកក្កដា មានកម្មករការដ្ឋានសំណង់១កន្លែង ក្នុងចំណោម៣កន្លែង ដែលអាជ្ញាធរខេត្តព្រះសីហនុ បានចុះផ្អាកការសាងសង់ជាបណ្តោះអាសន្ននោះ នៅតែបន្តធ្វើសកម្មភាពសាងសង់ ទើបឈានដល់ លោក គួច ចំរើន អភិបាលខេត្តព្រះសីហនុ បានបញ្ជាឲ្យសមត្ថកិច្ចចុះឃាត់ខ្លួនកម្មករចិនចំនួន២នាក់ មកសួរនាំ និងធ្វើកិច្ចសន្យាតាមនីតិវិធីច្បាប់។
មន្ត្រីនគរបាលក្រុងព្រះសីហនុ បានឲ្យដឹងថា ការឃាត់ខ្លួនកម្មករសំណង់ជនជាតិចិនទាំង២នាក់ខាងលើនេះ គឺបាននាំយកមករក្សាទុកនៅកន្លែងសមត្ថកិច្ចមួយយប់ ទើបដោះលែងវិញ កាលពីថ្ងៃទី៤ ខែកក្កដា ឆ្នាំ២០១៩ ដោយមានការធានាធ្វើកិច្ចសន្យាតាមនីតិវិធីច្បាប់៕ ដោយ៖ ដែន សីមា
