ខេត្តព្រះសីហនុ៖ លោកឧកញ៉ា ទៀ វិចិត្រ ប្រធានក្រុមហ៊ុន ជី.ធី.វី.ស៊ី ស្ពីដប៊ូត កម្ពុជា (G.T.V.C SPEEDBOAT CAMBODIA) និងជាស្ថាបនិកឆ្នេរភ្លោះកោះឋានសួគ៌។ នៅរសៀលថ្ងៃទី៥ ខែកក្កដា ឆ្នាំ២០១៩នេះ លោកបាន ចាត់តំណាងឲ្យនាំយកវិទ្យុទាក់ទង (អាយកូម) ចំនួន ១១គ្រឿង ទៅឧបត្ថម្ភជូនដល់កងកម្លាំងមូលដ្ឋានកងរាជអាវុធហត្ថស្រុកព្រៃនប់ ខេត្តព្រះសីហនុ សម្រាប់យកទៅប្រើប្រាស់ ក្នុងកិច្ចការប្រចាំថ្ងៃ ដើម្បីរក្សាការពារសន្តិសុខ និងសុវត្ថិភាព ជូនប្រជាពលរដ្ឋ ក្នុងមូលដ្ឋាននេះ។
លោកឧកញ៉ា ទៀ វិចិត្រ ដែលជាម្ចាស់ ម៉ាហ្វីយ៉ា រីស៊ត (Mafiya Resort) ផងនោះ បានឲ្យដឹងថា វិទ្យុទាក់ទង (អាយកូម) ចំនួន១១គ្រឿង ដែលបានផ្តល់ជូនកម្លាំងកងរាជអាវុធហត្ថស្រុកព្រៃនប់ពេលនេះ ក្នុង១គ្រឿងមានតម្លៃ១០៥ដុល្លារអាមេរិក សរុបទាំងអស់មានចំនួន ១.១៥៥ដុល្លារ។
ឆ្លើយតបចំពោះការផ្តល់សម្ភារចាំបាច់ខាងលើនេះ លោកវរសេនីយ៍ត្រី ពៅ នាវ មេបញ្ជាការមូលដ្ឋានកងរាជអាវុធហត្ថស្រុកព្រៃនប់ បានថ្លែងអំណរគុណ ចំពោះទឹកចិត្តមនុស្សធម៌ របស់លោកឧកញ៉ា ទៀ វិចិត្រ ដែលបានចាត់តំណាងរបស់លោក ឲ្យនាំយកវិទ្យុទាក់ទង (អាយកូម) ចំនួន១១គ្រឿង មកជួយឧបត្ថម្ភដល់កម្លាំងអាវុធហត្ថស្រុកព្រៃនប់ សម្រាប់យកប្រើប្រាស់ ក្នុងសកម្មភាព ចុះបំពេញការងារប្រចាំថ្ងៃនាឱកាសនេះ។
ទន្ទឹមគ្នានេះ លោក ពៅ នាវ ក្នុងនាមកម្លាំងកងរាជអាវុធហត្ថស្រុកព្រៃនប់ ក៏បានជូនពរ លោកឧកញ៉ា និងក្រុមគ្រួសារ ព្រមទាំងសហការី សូមឲ្យមានសុខភាពល្អ សុភមង្គល និងសម្រេចបានជោគជ័យគ្រប់កិច្ចការងារ ជំនួញជួញដូរ។
សូមរំលឹកថា ថ្មីៗនេះ លោកឧកញ៉ា ទៀ វិចិត្រ ក៏បានផ្តល់ជូនសម្លៀកបំពាក់ជាង ៤០កំប្លេរ ដំបងភ្លើងចំនួន៤ និងពិលចំនួន២ដើម ជូនប្រជាការពារ នៅប៉ុស្តិ៍រដ្ឋបាលឃុំទួលទទឹង ស្រុកព្រៃនប់ ខេត្តព្រះសីហនុ ដើម្បីបំពេញការងាររក្សាសន្តិសុខសណ្តាប់ធ្នាប់ ជូនប្រជាពលរដ្ឋក្នុងមូលដ្ឋាន។ ហើយថា ការងារមនុស្សធម៌នេះ លោកឧកញ៉ា ទៀ វិចិត្រ តែងបានយកចិត្តទុកដាក់ជួយឧបត្ថម្ភ គាំទ្រជាថវិកា និងសម្ភារ: ដល់កម្លាំងសមត្ថកិច្ចគ្រប់ស្ថាប័នជាបន្តបន្ទាប់មកនេះ ដើម្បីរួមចំណែកថែរក្សាការពារសន្តិសុខ ជូនសង្គមជាតិ និងប្រជាពលរដ្ឋ។ ជាពិសេសជាងនេះ ក៏ដើម្បីលើទឹកចិត្តដល់កងកម្លាំងមានសមត្ថកិច្ចផងដែរ៕ ដោយ៖ ដែន សីមា