ភ្នំពេញ៖ រាជរដ្ឋាភិបាលបានសម្រេចដាក់ចេញនូវវិធានការចាំបាច់មួយចំនួន ចំពោះការដ្ឋានសំណង់ទាំងឡាយ ដែលគ្មានលិខិតអនុញ្ញាតសាងសង់ និង/ឬសាងសង់ខុសលក្ខណៈបច្ចេកទេស លើកលែងតែសំណង់លំនៅឋានផ្ទាល់ខ្លួនរបស់ប្រជាពលរដ្ឋ។
លោកបណ្ឌិតសាស្ត្រាចារ្យហ៊ីង ថូរ៉ាក់ស៊ី រដ្ឋលេខាធិការប្រចាំការ ទីស្ដីការគណៈរដ្ឋមន្ត្រី កាលពីថ្ងៃទី 5 ខែកក្កដាឆ្នាំ 2019 ដែលបានចេញលិខិតមួយច្បាប់ ជម្រាបជូន លោកឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដីនគរូបនីយកម្ម លោកទេសរដ្ឋមន្ត្រីរដ្ឋមន្ត្រីក្រសួងឧស្សាហកម្មនិងសិប្បកម្ម លោក ទេសរដ្ឋមន្ត្រីរដ្ឋមន្ត្រីក្រសួងសាធារណការនិងដឹកជញ្ជូន លោករដ្ឋមន្ត្រីក្រសួងព័ត៌មាន ករណីសំណើសុំការសម្រេចលើវិធានការចាំបាច់សំដៅទប់ស្កាត់ការដ្ឋានសំណង់ខុសច្បាប់ដើម្បីធានាអាយុជីវិតមនុស្ស ទ្រព្យសម្បត្តិ សុវត្ថិភាព និងគុណភាពសំណង់ទូទាំងប្រទេស។ បើតាមលោករដ្ឋលេខាធិការប្រចាំការនៃទីស្តីការគណៈរដ្ឋមន្ត្រីបានបញ្ជាក់ថា ការចេញលិខិតនេះ យោងតាមចំណារដ៏ខ្ពង់ខ្ពស់បំផុត របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ចុះថ្ងៃទី 27 ខែមិថុនាឆ្នាំ 2019។
ទីស្ដីការគណៈរដ្ឋមន្ត្រីសូមជម្រាបជួនឯកឧត្ដមជ្រាបថា រាជរដ្ឋាភិបាលសម្រេចដាក់ចេញនូវវិធានការចាំបាច់មួយចំនួន ចំពោះការដ្ឋានសំណង់សណ្ឋាគារ អាគារស្នាក់នៅរួម អគារពាណិជ្ជកម្ម អគាររោងចក្រ អគារសិប្បកម្ម និងសំណង់ផ្សេងៗទៀត ដែលគ្មានលិខិតអនុញ្ញាត និងឬសាងសង់ខុសលក្ខណៈបច្ចេកទេស លើកលែងតែសំណង់លំនៅឋានផ្ទាល់ខ្លួនរបស់ប្រជាពលរដ្ឋដូចខាងក្រោម៖ ក្រសួងរ៉ែនិងថាមពល ចាត់វិធានការមិនឱ្យមានការផ្គត់ផ្គង់ថាមពលដល់ការដ្ឋានសំណង់។ ឧស្សាហកម្មសិប្បកម្មកម្ម ចាត់វិធានការមិនឲ្យមានការផ្គត់ផ្គង់ទឹកស្អាតការដ្ឋានសំណង់។ ក្រសួងសាធារណការដឹកជញ្ជូន មិនត្រូវអនុញ្ញាតឲ្យតភ្ជាប់លូចូលបណ្ដាញលូសាធារណៈ។ ក្រសួង ស្ថាប័ន និងអង្គភាពមានសមត្ថកិច្ច មិនត្រូវផ្ដល់លិខិតអនុញ្ញាតឲ្យប្រកបអាជីវកម្ម និងក្រសួងព័ត៌មាន និងអង្គភាពមានសមត្ថកិច្ច មិនត្រូវអនុញ្ញាត ឱ្យផ្សព្វផ្សាយពាណិជ្ជកម្ម៕ ដោយ៖កូឡាប